ശ്വേതയും സഹോദരങ്ങളും ചേർന്നൊരുക്കിയ ഗാനം സോഷ്യൽ മീഡിയയിൽ ഹിറ്റ്
കൊച്ചി: സീ കേരളത്തിന്റെ റിയാലിറ്റി ഷോയായ ‘സരിഗമപ’ യിലൂടെ പ്രേക്ഷക ഹൃദയങ്ങളിൽ ഇടം നേടിയ ഗായിക ശ്വേത അശോകും സഹോദരങ്ങളും ചേർന്ന് ഒരുക്കിയ ഗാനം സോഷ്യൽ മീഡിയയിൽ തരംഗമാകുന്നു. കഴിഞ്ഞ ദിവസം റിലീസ് ചെയ്ത ‘നീയേ’ എന്ന് തുടങ്ങുന്ന ഗാനത്തിന് വലിയ പിന്തുണയാണ് സോഷ്യൽ മീഡിയയിൽ നിന്ന് ലഭിക്കുന്നത്. ശ്വേതയുടെ സഹോദരൻ വിഷ്ണു അശോകന് അതിമനോഹരമായ മെലഡിക്ക് ഈണം നൽകിയിരിക്കുന്നത്. സഹോദരി അശ്വതി അശോകാണ് വരികൾ എഴുതിയിരിക്കുന്നത്.
കോഴിക്കോട് സ്വദേശിയായ ഈ സഹോദരങ്ങൾ ഓണത്തിന് ചിട്ടപ്പെടുത്തിയ ഗാനവും സോഷ്യൽ മീഡിയയിൽ വലിയ ഹിറ്റ് ആയിരുന്നു. “ഒരു ഗായിക എന്ന നിലയിൽ സ്വന്തം പാട്ടുകൾ പാടണമെന്നാണ് ഓരോത്തരും ആഗ്രഹിക്കുക. ഇതെന്റെ രണ്ടാമത്തെ പാട്ടാണ്. എന്റെ ആദ്യ ഗാനം ഏറ്റെടുത്ത മലയാളികൾ ഈ ഗാനവും സ്വീകരിച്ചതിൽ സന്തോഷം ഉണ്ട്. ലോക്ക് ഡൗൺ കാലത്ത് വീട്ടിൽ ഒതുങ്ങിയിരിന്നപ്പോൾ ഞങ്ങൾക്ക് തോന്നിയ ഒരു ഐഡിയയാണ് സ്വന്തമായി ഗാനം ഉണ്ടാക്കണമെന്ന.സഹോദരൻ വിഷ്ണുവാണെങ്കിൽ ഒരു സംഗീത സംവിധായകൻ കൂടി ആണ്. അങ്ങനെ അശ്വതിയെയും കൂടെ കൂട്ടി”, ശ്വേത പറയുന്നു.
ഇതിനോടകം തന്നെ ശ്വേത നിരവധി സിനിമകളിൽ പാടി കഴിഞ്ഞു. ഗോപി സുന്ദർ ഈണമിട്ട മമ്മൂട്ടി ചിത്രമായ ഷൈലോക്കിലെ ഹിറ്റായ ഫാസ്റ്റ് നമ്പർ ശ്വേതക്ക് നിരവധി അവസരങ്ങൾക്കാണ് വഴി തുറന്നത്. ഈ കോവിഡ് കാലത്ത് ഒരു പിടി ആൽബങ്ങൾക്കും ശ്വേത ശബ്ദം നൽകി കഴിഞ്ഞു .
“നമ്മൾ ഒരു വല്ലാത്ത മഹാമാരിയുടെ പിടിയിലാണ്. അടഞ്ഞു പോയ ജീവിതത്തെ പതുക്കെ പതുക്കെ തിരികെ പിടിക്കാൻ ശ്രമിക്കുന്ന മനുഷ്യർക്ക് ഒരു പോസറ്റീവ് എനർജി ഈ ഗാനം കൊണ്ടുവരട്ടെ എന്നാണ് ഞാൻ പ്രാർത്ഥിക്കുന്നത്”. ഹൃദയത്തിലെ എല്ലാ അല്ലലുകളും കുറച്ചു നിമിഷത്തേക്ക് മറക്കാൻ കഴിയുമെങ്കിൽ അത്രയും വലിയ കാര്യം മറ്റു എന്തുണ്ടെന്നാണ് ശ്വേത കോഴിക്കോട്ടെ വീട്ടിൽ ഇരുന്നു ചോദിക്കുന്നത്.
വിഷ്ണു പറയുന്നത് താൻ വിനീത് ശ്രീനിവാസന്റെ ഒരു ആരാധകനാണ് എന്നാണ്. ഹൃദയത്തിൽ തൊടുന്ന ഒരു മെലഡി ഒരുക്കണമെന്നാണ് ഞാൻ ആഗ്രഹിച്ചത്. അത് നന്നായി വന്നുവെന്നറിയുന്നതിൽ സന്തോഷം. സിനിമയിൽ സംഗീതം ഒരുക്കണെമെന്നാണ് വിഷ്ണുവിന്റെ ആഗ്രഹം.