രാജസ്ഥാനിൽ കുതിരപ്പുറത്തു സഞ്ചരിച്ച ദളിത് യുവാവായ നവവരന് മര്ദനം
ബിക്കാനര്: രാജസ്ഥാനിലെ ബിക്കാനറില് കുതിരപ്പുറത്തു സഞ്ചരിച്ച ദളിത് യുവാവായ നവവരന് മര്ദനം.ബുധനാഴ്ച രാത്രി ബിക്കാനറിലെ നപാസാറില് വിവാഹഘോഷയാത്രയുടെ ഭാഗമായി കുതിരപ്പുറത്തു സഞ്ചരിച്ച ദളിത് യുവാവിനെ രജപുത് വിഭാഗത്തില്പ്പെട്ട ഒരു സംഘമാണ് മര്ദിച്ചത്.
ദളിത് – മേഘ്വാല് വിഭാഗത്തിലുള്ള യുവാവിന്റെ വിവാഹത്തിനു കുതിരയെ ഉപയോഗിക്കുന്നതില് എതിര്പ്പുമായി രജപുത് ആളുകളെത്തി. ദളിതര് കുതിരപ്പുറത്ത് സഞ്ചരിക്കുന്നത് ഗ്രാമത്തിന്റെ ആചാരത്തില്പ്പെട്ടതല്ലെന്ന് ഇവര് വാദിച്ചു. ഇതോടെ തര്ക്കവും സംഘര്ഷവുമായി. വരന്റെ ബന്ധുക്കളെയും സുഹൃത്തുക്കളെയും രജപുത് വിഭാഗക്കാര് മര്ദിച്ചു. ഒരു വാഹനം നശിപ്പിക്കുകയും ചെയ്തു. തുടര്ന്ന് പോലീസ് സ്ഥലത്തെത്തി വിവാഹം മേഘ്വാല് വിഭാഗത്തിന്റെ ആചാരപ്രകാരം നടത്തി.