സൗദിയില്‍ മൂല്യവര്‍ധിത നികുതി ഉയര്‍ത്തണമെന്ന് നിര്‍ദേശം
ജിദ്ദ: രാജ്യത്ത് പൊതുചെലവുകളുടെ വര്‍ധനവ് സൗദിയുടെ ബജറ്റ് കമ്മിയെ ഏഴ് ശതമാനമായി ഉയര്‍ത്തുമെന്ന് അന്താരാഷ്ട്ര നാണയ നിധി അഭിപ്രായപ്പെട്ടു. ഈ വര്‍ഷം ബജറ്റ് കമ്മിയോടടുക്കുമെന്നായിരുന്നു സൗദി പ്രതീക്ഷിച്ചിരുന്നത്. എന്നാല്‍ ഇത് ഫലം കാണണമെങ്കില്‍ മൂല്യ വര്‍ധിത നികുതി ഉയര്‍ത്തണമെന്നും, പൊതു ചെലവുകള്‍ കുറക്കണമെന്നും അന്താരാഷ്ട്ര നാണയ നിധി നിര്‍ദേശിച്ചു. കഴിഞ്ഞ വര്‍ഷം സൗദിയുടെ ധനക്കമ്മി 5.9 ശതമാനമായിരുന്നു.2019 ല്‍ ബജറ്റ്കമ്മി 4.2 ശതമാനമായി കുറയുമെന്നാണ് സര്‍ക്കാര്‍ പ്രതീക്ഷിക്കുന്നത്.എന്നാല്‍ പൊതു ചെലവുകള്‍ വര്‍ധിക്കുന്നത് സൗദിയുടെ ബജറ്റ് കമ്മിയെ ഏഴ് ശതമാനമായി ഉയര്‍ത്തിയേക്കുമെന്ന് ഐ.എം.എഫ് നിരീക്ഷിക്കുന്നു. ഐ.എം.എഫ് ഉദ്യോഗസ്ഥന്‍ സൗദി സന്ദര്‍ശിച്ച ശേഷം നടത്തിയ പ്രസ്താവനയിലാണ് ഇക്കാര്യം പറഞ്ഞത്. ഈ വര്‍ഷം സൗദിയുടെ എണ്ണ ഉല്‍പാദനം പ്രതിദിനം 10.2 മില്യണ്‍ ബാരല്‍ ആയിരിക്കും. എണ്ണ വില ബാരലിന് ശരാശരി 65.5 ഡോളറാകുമെന്നും ഐ.എം.എഫ് വ്യക്തമാക്കി .
