1400ന്റെ പവർബാങ്ക് ഓർഡർ ചെയ്ത യുവാവിന് കിട്ടിയത് 8000രൂപയുടെ ഫോൺ;തിരിച്ചുവേണ്ടെന്ന് ആമസോൺ
മലപ്പുറം: ഓൺലൈൻ വഴി സാധനങ്ങൾ ബുക്ക് ചെയ്തു പണികിട്ടിയ പലരെയും നമുക്കറിയാം. ആയിരങ്ങൾ മുടക്കി ബുക്ക് ചെയ്യുന്ന സാധനങ്ങൾക്ക് പകരം ചുടുകട്ട മുതൽ സോപ്പ് വരെ കിട്ടിയ കാര്യവും നമ്മൾ വാർത്തകളിൽ വായിച്ചിട്ടുണ്ട്. എന്നാലിപ്പോൾ 1,400 രൂപയുടെ പവര് ബാങ്ക് ഓര്ഡര് ചെയ്ത യുവാവിന് 8,000 രൂപ വിലമതിക്കുന്ന ഫോണ് ലഭിച്ച കാര്യമാണ് സാമൂഹ്യ മാധ്യമങ്ങളിൽ വൈറലാകുന്നത്. മലപ്പുറം കോട്ടക്കല് എടരിക്കോട് സ്വദേശി നബീല് നാഷിദിനാണു ഈ അനുഭവം ഉണ്ടായത്. സംഭവം ഉടൻ തന്നെ ഓണ്ലൈന് വില്പനക്കാരായ ആമസോണിനെ അറിയിച്ചപ്പോള് യുവാവിന്റെ സത്യസന്ധതയെ അവര് അഭിനന്ദിച്ചു. ഒപ്പം, ആ ഫോണ്താങ്കള് തന്നെ ഉപയോഗിച്ചോളൂ എന്ന ട്വീറ്റും മറുപടിയായി നല്കി.
ആഗസ്ത് 10 നാണ് ഷവോമിയുടെ 1,400രൂപ വിലയുള്ള 20,000 എം.എ.എച്ച് പവര് ബാങ്കിന് നബീല് ബുക്ക് ചെയ്തത്. ആഗസ്ത് 15ന് പാഴ്സലായി സാധനം എത്തി. പെട്ടി പൊളിച്ചപ്പോള് നബീല് ശരിക്കും ഞെട്ടി. ഷവോമിയുടെ തന്നെ 8,000 രൂപ വിലമതിക്കുന്ന റെഡ്മി 8A Dual എന്ന ഫോണായിരുന്നു അത്. തുടർന്നാണ് വിവരം ആമസോണിനെ അറിയിച്ചതും. തെറ്റ് പറ്റിയതില് ക്ഷമാപണം നടത്തിയ ആമസോണ്, പാര്സല് തിരിച്ചു നല്കാനുള്ള റിട്ടേണ് പോളിസി ലിങ്ക് ട്വീറ്റ് ചെയ്തു. ഫോണ് താങ്കള്ക്ക് തന്നെ ഉപയോഗിക്കുകയോ മറ്റാര്ക്കെങ്കിലും സംഭാവനചെയ്യുകയോ ചെയ്യാമെന്ന ട്വീറ്റും പിന്നാലെയെത്തി.