ചന്ദ്രയാൻ–2 വിക്ഷേപണം മാറ്റി
ചെന്നൈ: ചന്ദ്രനിലേക്കുള്ള ഇന്ത്യയുടെ രണ്ടാം ദൗത്യമായ ചന്ദ്രയാൻ–2 വിക്ഷേപണം മാറ്റിയതായി ഐഎസ്ആർഒ ചെയർമാൻ കെ.ശിവൻ അറിയിച്ചു. ഈ വർഷം അവസാനത്തേക്കാണ് വിക്ഷേപണം മാറ്റിയിരിക്കുന്നത്. വിക്ഷേപണത്തിനു മുമ്പ് ചില പരിശോധനകൾകൂടി പൂർത്തിയാക്കാനുള്ളതിനാലാണ് വിക്ഷേപണം മാറ്റിയതെന്ന് ഐഎസ്ആർഒ വൃത്തങ്ങൾ അറിയിച്ചു. ഏപ്രിലിൽ വിക്ഷേപിക്കാനായിരുന്നു നേരത്തേ പദ്ധതിയിട്ടിരുന്നത്. എന്നാൽ ഒക്ടോബർ- നവംബർ മാസങ്ങളിലൊന്നിൽ ശ്രീഹരിക്കോട്ടയിൽനിന്നും വിക്ഷേപിക്കാൻ കഴിയുമെന്നാണ് ഇപ്പോൾ പ്രതീക്ഷിക്കുന്നത്. ചന്ദ്രനിലെ മണ്ണിന്റെ പ്രത്യേകതകൾ പഠിക്കുന്നതിനാണു രണ്ടാം ദൗത്യം ഊന്നൽ നൽകിയിരിക്കുന്നത്. 2008 ലാണ് ഐഎസ്ആർഒ ചന്ദ്രയാൻ–1 വിക്ഷേപിച്ചത്.