ട്രാഫിക് ഡ്യൂട്ടിക്ക് നഗരത്തിലെത്തിയ പോലീസുകാരന്റെ ബൈക്ക് പട്ടാപ്പകല് മോഷ്ടിച്ചു
തിരുവല്ല: ട്രാഫിക് ഡ്യൂട്ടിക്ക് നഗരത്തിലെത്തിയ പോലീസുകാരന്റെ ബൈക്ക് പട്ടാപ്പകല് നഗരമധ്യത്തിൽ നിന്നും മോഷ്ടിച്ചു. തിരുവല്ല ട്രാഫിക് സ്റ്റേഷനിലെ സീനിയര് സിവില് പോലീസ് ഓഫീസര് അമിത്ബാബുവിന്റെ ഹീറോ ഹോണ്ട സ്പ്ലെന്ഡര് കെഎല് 03 ജി 1644 നമ്പര് ബൈക്കാണ് തിരുവല്ല എസ്സി ജങ്ഷനിൽ നിന്നുംഇന്നലെ ഉച്ചയോടെ മോഷണം പോയത്. പോലീസുകാരൻ സമീപത്തെ കടയില് നിന്ന് നാരങ്ങാവെള്ളം കുടിക്കാന് പോയി തിരികെ വന്ന സമയത്തിനിടെയാണ് മോഷണം നടന്നത്.
തുടർന്ന്, സമീപത്തെ സിസിടിവി ദൃശ്യങ്ങള് പരിശോധിച്ചപ്പോള് ഒരു യുവാവ് ബൈക്കുമായി പോകുന്ന ചിത്രം വ്യക്തമായി ലഭിച്ചിട്ടുണ്ട്. ബൈക്ക് മോഷ്ടിക്കുന്നതിനു മുമ്പായി ഇയാള് നഗരമധ്യത്തിലെ ബാര് ഹോട്ടലില് നിന്നിറങ്ങിവരുന്ന ദൃശ്യവും പൊലീസിന് ലഭിച്ചു.ഈ ദൃശ്യങ്ങൾ കേന്ദ്രീകരിച്ചു യുവാവിനെ പിടികൂടാനുള്ള ശ്രമത്തിലാണ് പോലീസ്.