Times Kerala

” നമ്മുടെ നാട്ടില്‍ തന്നെയാണ് നമ്മളേറ്റവും സുരക്ഷിതര്‍” ,നമുക്ക് നമ്മളെ ചേര്‍ത്ത് പിടിക്കുന്ന സര്‍ക്കാരുണ്ട്‌’;  നടന്‍ അനൂപ് മേനോന്‍

 
” നമ്മുടെ നാട്ടില്‍ തന്നെയാണ് നമ്മളേറ്റവും സുരക്ഷിതര്‍” ,നമുക്ക് നമ്മളെ ചേര്‍ത്ത് പിടിക്കുന്ന സര്‍ക്കാരുണ്ട്‌’;  നടന്‍ അനൂപ് മേനോന്‍

രാജ്യം  മുഴുവന്‍ ലോക്ക് ഡൗണിലേക്ക് നീങ്ങിയതിനാല്‍ നാട്ടിലെത്തിപ്പെടാനാവാതെ അന്യനാട്ടില്‍ കഴിയുന്ന നിരവധി പേരുണ്ട്. ഈ അവസരത്തില്‍ നടന്‍ അനൂപ് മേനോന്‍ പങ്കുവച്ച കുറിപ്പാണ് വൈറലാകുന്നത്.  കുറ്റങ്ങളും കുറവുകളും ഒരു പാടുണ്ടാകുമെങ്കിലും നമ്മുടെ നാട്ടില്‍ തന്നെയാണ് നമ്മളേറ്റവും സുരക്ഷിതരെന്നും അനൂപ് ഫെയ്‌സ്ബുക്ക് കുറിപ്പിൽ പറയുന്നു.

അനൂപ് മേനോന്റെ ഫെയ്‌സ്ബുക്ക് പോസ്റ്റ് ഇങനെ;

പ്രിയപ്പെട്ടവരെ,
നമുക്ക് ജീവിക്കാന്‍ ഏറ്റവും ആവശ്യമുള്ള മൂന്നു കാര്യങ്ങളിലേക്ക് കൂടുതല്‍ ശ്രദ്ധ പതിപ്പിക്കാന്‍ നമ്മുടെ ബുദ്ധിയെയും, ഹൃദയത്തെയും കൂട്ടിക്കൊണ്ടു പോവുകയാണ് COVID-19 എന്ന ഈ പുതുമുഖം. ആഹാരം, പാര്‍പ്പിടം, വസ്ത്രം എന്നിവയാണ് നമ്മുടെ ‘basic needs’ എന്നത് ആദ്യ പാഠങ്ങളില്‍ ഒന്നായിരുന്നു വിദ്യാലയത്തില്‍.നമുക്കാവശ്യമുള്ളതിനേക്കാള്‍ വാങ്ങാന്‍, ആവശ്യമില്ലാത്തതും വാങ്ങാന്‍, ആവശ്യമേ ഇല്ലാത്തതും വാങ്ങേണ്ടതാണ് എന്ന് നമ്മളെ തെറ്റിദ്ധരിപ്പിക്കാന്‍, ആര്‍ക്കാണ് സാധിച്ചത്?..

ഈ Lockdown പഠിപ്പിച്ച ഏറ്റവും വലിയ പാഠം നമുക്കിത്രയൊക്കെ മതി അല്ലലില്ലാതെ ജീവിക്കാന്‍ എന്നതാണ്. ആഹാരം ഉത്പാദിപ്പിക്കുന്നവനാണ് ഈ സമൂഹത്തിലെ ഏറ്റവും പ്രധാനിയായ കണ്ണി എന്നതും. നമ്മുടെ കൃഷിക്കാരന്‍ സമൂഹത്തിലെ ഏറ്റവും മുഖ്യമായ സ്ഥാനം അര്‍ഹിക്കുന്നു. ഇന്നത്തെയും നാളത്തേയും തലമുറ ഏറ്റവുമധികം നിക്ഷേപിക്കേണ്ടതും കാര്‍ഷിക വ്യവസായത്തില്‍ തന്നെ. ഭക്ഷ്യ സമൃദ്ധിയും ശുദ്ധമായ ജലവും തന്നെയായിരിക്കും ഇനിയുള്ള കാലം ഏതൊരു രാജ്യത്തിന്റെയും അടിത്തറ ശക്തമാക്കുന്നത്.

നിങ്ങളുടെ പറമ്പിലെ ചീര കൊടുത്തു അപ്പുറത്തെ പറമ്പിലെ തക്കാളി വാങ്ങുക എന്ന പഴയ ബാര്‍ട്ടര്‍ സമ്പ്രദായം സാമൂഹികമായ ഇടപെടലുകളെ, സഹോദര്യത്തെ, സ്‌നേഹത്തെ കുറച്ചൊന്നുമല്ല ശക്തമാക്കാന്‍ പോകുന്നത്. പറമ്പില്‍ കൃഷിചെയ്യുന്ന സമയത്തിന് കുറച്ചു വിറ്റാമിന്‍-D സൂര്യേട്ടന്റെ വഴി കിട്ടിയാല്‍ അതും ബോണസ്.

കോവിഡ് മനസ്സിലാക്കിത്തന്ന മറ്റൊരു വലിയ കാര്യം സ്വന്തം നാടുപോലെയാവില്ല നമുക്ക് മറ്റേതൊരു രാജ്യവും എന്നതാണ്. അവിടുത്തെ സമൃദ്ധിയും സമ്പത്തും sophistication നും ഒക്കെ ആത്യന്തികമായി അവരുടെ ദേശക്കാര്‍ക്കു മാത്രം അവകാശപ്പെട്ടതാണ് . കുറ്റങ്ങളും കുറവുകളും ഒരുപാടുണ്ടാകുമെങ്കിലും നമ്മുടെ നാട്ടില്‍ തന്നെയാണ് നമ്മളേറ്റവും സുരക്ഷിതര്‍. മറ്റ്‌ രാജ്യക്കാരന് നമ്മള്‍ ഹിന്ദുവെന്നോ മുസ്ലിമെന്നോ ക്രിസ്ത്യാനിയെന്നോ ജൈനനെന്നോ ബൗദ്ധനെന്നോ ഒന്നുമില്ല. ഒരു ഘട്ടം കഴിയുമ്പോള്‍ എല്ലാവരും അവര്‍ക്കു വിദേശി..’FOREIGNER’ മാത്രമാണ്.അല്ലെങ്കില്‍ ഒരു ഇമിഗ്രന്റ് . ഇവിടെ നമുക്ക് ‘നമ്മളുണ്ട്’ .നമ്മളെ ചേര്‍ത്ത് പിടിക്കുന്ന സര്‍ക്കാരും പോലീസും ആരോഗ്യ സംവിധാനങ്ങളും ഉണ്ട്. ആ ധൈര്യമാണ് നമ്മുടെ നാട്… ആ ധൈര്യമായിരിക്കും നമ്മുടെ നാട്…

Related Topics

Share this story