തെരുവുനായയുടെ ആക്രമണം; ആറു വയസുകാരന് ഗുരുതര പരിക്ക്
നെടുങ്കണ്ടം: തെരുവുനായയുടെ ആക്രമണത്തിൽ ഒന്നാംക്ലാസ് വിദ്യാർഥിക്കു ഗുരുതര പരിക്ക്. മുണ്ടിയെരുമ സ്വദേശി ജയൻ – സുധ ദമ്പതികളുടെ മകൻ ആറു വയസുകാരനായ സഞ്ജയ്ക്കാണ് തെരുവുനായയുടെ കടിയേറ്റത്.
ഇന്നലെ വൈകുന്നേരം നാലോടെ മുണ്ടിയെരുമ കല്ലാർ ഗവ. എൽപി സ്കൂൾ വിദ്യാർഥിയായ സഞ്ജയ് സ്കൂൾവിട്ടു സമീപത്തുതന്നെയുള്ള വീട്ടിലേക്ക് നടന്നുപോകുന്നതിനിടെയാണ് തെരുവുനായ ആക്രമിച്ചത്. ടൗണിൽ ശ്രീകൃഷ്ണസ്വാമി ക്ഷേത്രത്തിനു സമീപം എത്തിയ കുട്ടിയുടെ മേൽ തെരുവുനായ് ദേഹത്തു ചാടിക്കയറി മുഖത്തും വയറിലും കൈകാലുകളിലും പുറത്തും കടിച്ചു. ഭയന്നു നിലവിളിച്ച കുട്ടിയെ റോഡിലൂടെ വലിച്ചിഴയ്ക്കുകയും ചെയ്തു.
ഈ സമയം ഇതുവഴി കാറിലെത്തിയവർ സംഭവം കണ്ടു കുട്ടിയെ രക്ഷപ്പെടുത്തുകയായിരുന്നു. തുടർന്ന് ഇവർതന്നെ കുട്ടിയെ നെടുങ്കണ്ടം താലൂക്ക് ആശുപത്രിയിൽ എത്തിക്കുകയും പ്രാഥമിക ചികിത്സയ്ക്കുശേഷം കട്ടപ്പന സെന്‍റ് ജോണ്സ് ആശുപത്രിയിൽ പ്രവേശിപ്പിച്ചു.