ന്യൂഡൽഹി: ഗുസ്തി താരങ്ങൾ നൽകിയ ലൈംഗികാതിക്രമ കേസിൽ ഡൽഹി കോടതി
കുറ്റവിമുക്തനാക്കിയതിന് പിന്നാലെ പ്രതികരണവുമായി ബിജെപി നേതാവും മുൻ റെസ്ലിംഗ് ഫെഡറേഷൻ ഓഫ് ഇന്ത്യ അധ്യക്ഷനുമായ ബ്രിജ് ഭൂഷൺ ശരൺ സിങ് (Brij Bhushan Singh Acquitted Sexual Harassment Case). കേസിൽ ആരോപണം ഉന്നയിച്ച വനിതാ ഗുസ്തി താരങ്ങൾക്കാണ് അവരുടെ വേദനയെക്കുറിച്ച് പറയാനാകുകയെന്നും താൻ സന്തോഷവാനാണെന്നും അദ്ദേഹം പറഞ്ഞു.
“അവരുടെ വേദനയെക്കുറിച്ച് അവർക്ക് മാത്രമേ പറയാനാകൂ. ഞാൻ വളരെ സന്തോഷവാനാണ്, എന്റെ ആളുകളും സന്തോഷത്തിലാണ്,” എന്ന് എൻഡിടിവിക്ക് നൽകിയ പ്രതികരണത്തിൽ ബ്രിജ് ഭൂഷൺ പറഞ്ഞു. കോടതി തന്നെ “ബഹുമാനപൂർവം കുറ്റവിമുക്തനാക്കി” എന്ന പരാമർശം നടത്തിയെന്നും ഇത് താൻ നേരത്തെ പറഞ്ഞ കാര്യങ്ങൾ ശരിവെക്കുന്നതാണെന്നും അദ്ദേഹം അവകാശപ്പെട്ടു. “ആരോപണം ഉയർന്ന ദിവസം തന്നെ കുറ്റം തെളിഞ്ഞാൽ തൂക്കിലേറാൻ തയ്യാറാണെന്ന് ഞാൻ പറഞ്ഞിരുന്നു. ഇന്ന് കോടതി എന്നെ കുറ്റവിമുക്തനാക്കി,” എന്നും അദ്ദേഹം പ്രതികരിച്ചു.
2023 ജനുവരിയിലാണ് കേസിന് തുടക്കം. ഒളിമ്പ്യൻമാരായ വിനേഷ് ഫോഗട്ട്, സാക്ഷി മാലിക്, ബജ്രംഗ് പുനിയ തുടങ്ങിയ ഗുസ്തി താരങ്ങൾ ഡൽഹിയിലെ ജന്തർ മന്തറിൽ പ്രതിഷേധവുമായി രംഗത്തെത്തുകയായിരുന്നു. ബ്രിജ് ഭൂഷണിനെതിരെ ലൈംഗിക ചൂഷണവും ഭീഷണിപ്പെടുത്തലും ആരോപിച്ച താരങ്ങൾ WFI അധ്യക്ഷ സ്ഥാനത്ത് നിന്ന് രാജിവെക്കണമെന്നും ആവശ്യപ്പെട്ടിരുന്നു.
അന്വേഷണത്തിന് ശേഷം ഡൽഹി പൊലീസ് 2023 ജൂൺ 15ന് 1500 പേജുള്ള കുറ്റപത്രം സമർപ്പിച്ചിരുന്നു. ഇന്ത്യൻ ഒളിമ്പിക് അസോസിയേഷൻ അധ്യക്ഷ പി.ടി. ഉഷയ്ക്ക് നൽകിയ പരാതിക്ക് പിന്നാലെ മേരി കോം, യോഗേശ്വർ ദത്ത് തുടങ്ങിയ പ്രമുഖ കായിക താരങ്ങൾ ഉൾപ്പെട്ട അന്വേഷണ സമിതിയും രൂപീകരിച്ചിരുന്നു. എന്നാൽ ആരോപണങ്ങൾ ബ്രിജ് ഭൂഷണും WFIയും നിഷേധിച്ചിരുന്നു. കോടതി വിധിക്കെതിരെ അപ്പീൽ നൽകുമെന്ന് കേസിലെ പരാതിക്കാരിയായ വിനേഷ് ഫോഗട്ട് അറിയിച്ചു. കുറ്റവിമുക്തനാക്കിയ തീരുമാനം അംഗീകരിക്കില്ലെന്നും നിയമ പോരാട്ടം തുടരുമെന്നും അവർ വ്യക്തമാക്കി.
“കോടതി ബ്രിജ് ഭൂഷൺ ശരൺ സിങ്ങിനെ കുറ്റക്കാരനായി കണ്ടെത്താത്തതിൽ ഞങ്ങൾ നിരാശരാണ്. തുടക്കം മുതൽ തന്നെ ശക്തനായ രാഷ്ട്രീയ നേതാവിനെതിരെ പോരാടാൻ വലിയ ധൈര്യം ആവശ്യമായി വന്നു,” എന്ന് ഫോഗട്ട് സമൂഹമാധ്യമമായ എക്സിൽ കുറിച്ചു.
അതേസമയം, കേസിനെ തുടർന്നുണ്ടായ രാഷ്ട്രീയ സമ്മർദങ്ങൾക്കിടെ 2024ലെ ലോക്സഭാ തിരഞ്ഞെടുപ്പിൽ കൈസർഗഞ്ച് മണ്ഡലത്തിൽ ബ്രിജ് ഭൂഷണിന് ബിജെപി സീറ്റ് നൽകിയിരുന്നില്ല. പകരം മകൻ കരൺ ഭൂഷൺ സിങ്ങിനെയാണ് പാർട്ടി മത്സരിപ്പിച്ചത്. വീണ്ടും പാർലമെന്റിലേക്ക് മടങ്ങുമോയെന്ന ചോദ്യത്തിന് തീരുമാനം പാർട്ടിയും ജനങ്ങളും എടുക്കുമെന്നും ബ്രിജ് ഭൂഷൺ പ്രതികരിച്ചു.
Summary: Former WFI chief Brij Bhushan Sharan Singh reacted after a Delhi court acquitted him in the sexual harassment case filed by women wrestlers. Wrestler Vinesh Phogat said the complainants will appeal against the verdict and continue their legal fight.
