നാഗ്പൂർ: കേന്ദ്ര മന്ത്രി നിതിൻ ഗഡ്കരിയെ അപകീർത്തിപ്പെടുത്താൻ ബോധപൂർവ്വം ഗൂഢാലോചന നടത്തിയെന്ന പരാതിയിൽ പ്രമുഖ യൂട്യൂബർ മനീഷ് കശ്യപ് ഉൾപ്പെടെ നാല് സോഷ്യൽ മീഡിയ ഇൻഫ്ലുവൻസർമാർക്കെതിരെ നാഗ്പൂർ സൈബർ പോലീസ് കേസെടുത്തു. എഥനോൾ ഇന്ധന ഉപയോഗവുമായി ബന്ധപ്പെട്ട് തെറ്റായ വിവരങ്ങൾ പ്രചരിപ്പിക്കുകയും കൽപ്പിത കഥകളിൽ കേന്ദ്രമന്ത്രിയുടെ പേര് വലിച്ചിഴച്ച് അദ്ദേഹത്തിന്റെ പ്രതിച്ഛായ തകർക്കാൻ ശ്രമിക്കുകയും ചെയ്തതിനാണ് എഫ്.ഐ.ആർ രജിസ്റ്റർ ചെയ്തത്.(Four Influencers Booked For Defaming Union Minister Nitin Gadkari)
ബീഹാറിൽ നിന്നുള്ള പ്രശസ്ത യൂട്യൂബറായ മനീഷ് കശ്യപിനെ കൂടാതെ, ‘ദേശി ബോയ്സ് എൻ.സി.ആർ’, ഹർഷിത് രാഠി, അങ്കലേഷ് ഇൻവാത്തെ എന്നിവരാണ് കേസിൽ പ്രതി ചേർക്കപ്പെട്ടിട്ടുള്ള മറ്റ് മൂന്ന് ഇൻഫ്ലുവൻസർമാർ. രാജ്യത്തെ എഥനോൾ നയത്തിന്റെ മറവിൽ വൻതോതിലുള്ള സാമ്പത്തിക തട്ടിപ്പുകളും വ്യാജ ഇടപാടുകളും നടക്കുന്നുണ്ടെന്നും ഇതിന് പിന്നിൽ നിയമലംഘനമുണ്ടെന്നും ആരോപിച്ച് ഇവർ യൂട്യൂബ്, ഇൻസ്റ്റാഗ്രാം തുടങ്ങിയ പ്ലാറ്റ്ഫോമുകളിൽ വിവാദ വീഡിയോകൾ പ്രചരിപ്പിച്ചതായി പോലീസ് പറഞ്ഞു.
കേന്ദ്രമന്ത്രി നിതിൻ ഗഡ്കരിയുടെ എഥനോൾ നയങ്ങളെ ഇവർ വീഡിയോകളിലൂടെ ബോധപൂർവ്വം വളച്ചൊടിക്കുകയായിരുന്നുവെന്നാണ് ആക്ഷേപം. ബി.ജെ.പി നാഗ്പൂർ സോഷ്യൽ മീഡിയ സെൽ മേധാവി ശിശിർ ത്രിപാഠി നൽകിയ ഔദ്യോഗിക പരാതിയുടെ അടിസ്ഥാനത്തിലാണ് പോലീസ് നടപടി. വീഡിയോകൾക്ക് വിശ്വാസ്യത വരുത്തുന്നതിനായി സാധാരണക്കാരുമായി നടത്തിയ വ്യാജ അഭിമുഖങ്ങൾ പ്രതികൾ ഉപയോഗിച്ചുവെന്നും, വെറും വ്യൂസും ഫോളോവേഴ്സും കൂട്ടാൻ വേണ്ടി മാത്രമാണ് ഒരു കേന്ദ്രമന്ത്രിയുടെ പേര് ദുരുപയോഗം ചെയ്തതെന്നും പരാതിയിൽ വ്യക്തമാക്കുന്നു.
Story Summary
The Nagpur Cyber Police have registered an FIR against four social media influencers, including popular YouTuber Manish Kashyap, for allegedly conspiring to defame Union Minister Nitin Gadkari. The accused circulated misleading videos on YouTube and Instagram falsely claiming large-scale fraud in the government’s ethanol policy.
