തിരുവനന്തപുരം: ലഹരിസംഘങ്ങൾക്കെതിരെയുള്ള കർശന നടപടിയായ ‘ഓപ്പറേഷൻ തൂഫാന്റെ’ ഭാഗമായി കല്ലമ്പലത്ത് നടത്തിയ മിന്നൽ പരിശോധനയിൽ മാരക മയക്കുമരുന്നായ എംഡിഎംഎയുമായി (MDMA) നാല് യുവാക്കൾ പിടിയിലായി (Operation Toofan Thiruvananthapuram). വർക്കല നടയറ സ്വദേശികളായ നിയാസ്, ആഷിക്, ചെറുണ്ണിയൂർ സ്വദേശികളായ സേതു, അഖിൽ എന്നിവരെയാണ് കല്ലമ്പലം പോലീസും ഡാൻസാഫ് (DANSAF) സംഘവും ചേർന്ന് അതിസാഹസികമായി അറസ്റ്റ് ചെയ്തത്.
വെള്ളിയാഴ്ച രാത്രി 9.15 ഓടെ കല്ലമ്പലം – വർക്കല റോഡിൽ വെച്ചായിരുന്നു നാടകീയ സംഭവങ്ങൾ അരങ്ങേറിയത്. ജില്ലാ റൂറൽ എസ്പിയുടെ നിർദേശാനുസരണം ലഹരി കടത്ത് സംഘത്തെ കാത്തിരുന്ന പോലീസ് സംഘം, പ്രതികൾ സഞ്ചരിച്ചിരുന്ന കാർ തടയാൻ ശ്രമിച്ചു. ഡാൻസാഫ് സംഘത്തിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ ബൈക്കിൽ പിന്തുടർന്നെത്തിയ ഉദ്യോഗസ്ഥരെ, പ്രതികൾ കാറിടിച്ചു വീഴ്ത്തി അലക്ഷ്യമായി ഓടിച്ചുപോവാൻ ശ്രമിക്കുകയായിരുന്നു.
തുടർന്ന് കാർ തടഞ്ഞുനിർത്തിയതോടെ വാഹനത്തിൽ നിന്നിറങ്ങി ഓടാൻ ശ്രമിച്ച രണ്ട് പ്രതികളെ പോലീസ് സംഘം ഓടിച്ചിട്ട് പിടികൂടി. ഇവരിൽ നിന്ന് 4.79 ഗ്രാം എംഡിഎംഎയാണ് പോലീസ് പിടിച്ചെടുത്തത്. പിടികൂടിയ പ്രതികളെ കല്ലമ്പലം പോലീസ് സ്റ്റേഷനിലെത്തിച്ച് അറസ്റ്റ് രേഖപ്പെടുത്തിയ ശേഷം കോടതിയിൽ ഹാജരാക്കി റിമാൻഡ് ചെയ്തു. ഇവരുടെ ലഹരി ശൃംഖലയെക്കുറിച്ച് കൂടുതൽ അന്വേഷണം നടത്തിവരികയാണെന്ന് പോലീസ് അറിയിച്ചു.
Story Summary: Four youth were arrested with 4.79 grams of MDMA in Kallambalam during a dramatic chase under ‘Operation Toofan’. The drug traffickers inside a car attempted to run over the chasing DANSAF and Kallambalam police officers before being aggressively captured and remanded by the court.
