തൃശ്ശൂർ: ചോറ് വേവിക്കാൻ വച്ച കുക്കറിൽ കഞ്ചാവ് ഒളിപ്പിച്ച് പോലീസിനെ പറ്റിക്കാൻ ശ്രമിച്ച യുവാവ് ഒടുവിൽ വിസിലടിച്ച മണത്തിൽ കുടുങ്ങി (Marijuana hidden in pressure cooker). ലഹരി വിരുദ്ധ കാമ്പെയ്നായ ‘ഓപ്പറേഷൻ തൂഫാന്റെ’ ഭാഗമായി കുന്നംകുളം പോലീസും ഡാൻസാഫ് (DANSAF) സംഘവും സംയുക്തമായി നടത്തിയ പരിശോധനയിലാണ് അടുപ്പൂട്ടി സ്വദേശിയായ തെങ്ങിങ്കൽ വീട്ടിൽ ബിനീഷ് (34) പിടിയിലായത്. ഇയാളുടെ വീട്ടിൽ നിന്ന് 400 ഗ്രാം കഞ്ചാവ് പോലീസ് പിടിച്ചെടുത്തു.
ബിനീഷിന്റെ വീട്ടിൽ വൻതോതിൽ കഞ്ചാവ് സൂക്ഷിച്ചിട്ടുണ്ടെന്ന രഹസ്യവിവരം ഡാൻസാഫ് സംഘത്തിന് ലഭിച്ചിരുന്നു. ഇതിന്റെ അടിസ്ഥാനത്തിൽ ശനിയാഴ്ച പോലീസ് സംഘം പെട്ടെന്ന് വീട്ടിലേക്ക് റെയ്ഡിനായി എത്തുകയായിരുന്നു. പോലീസ് വരുന്നത് കണ്ട് പരിഭ്രാന്തനായ ബിനീഷ്, കയ്യിലുണ്ടായിരുന്ന 400 ഗ്രാം കഞ്ചാവ് വേഗത്തിൽ ഒരു പ്രഷർ കുക്കറിനുള്ളിലേക്ക് മാറ്റി. തുടർന്ന് പോലീസിന് സംശയം തോന്നാതിരിക്കാൻ കഞ്ചാവിന് മുകളിലേക്ക് അരിയും വെള്ളവുമിട്ട് കുക്കർ അടുപ്പിലേക്ക് വെച്ച് വേവിക്കുകയായിരുന്നു.
വീട്ടിലെത്തിയ പോലീസ് മുറികളും പരിസരവുമെല്ലാം വിപുലമായി പരിശോധിച്ചെങ്കിലും കഞ്ചാവ് കണ്ടെത്താൻ കഴിഞ്ഞിരുന്നില്ല. തിരച്ചിൽ അവസാനിപ്പിച്ച് മടങ്ങാൻ ഒരുങ്ങുന്നതിനിടയിലാണ് അടുക്കളയിലെ അടുപ്പിലിരുന്ന കുക്കർ പെട്ടെന്ന് വിസിലടിച്ചത്. എന്നാൽ വിസിലിനൊപ്പം പുറത്തുവന്നത് ചോറിന്റെ മണത്തിന് പകരം കഞ്ചാവിന്റെ അതിശക്തമായ ഗന്ധമായിരുന്നു. ഇതോടെ സംശയം തോന്നിയ പോലീസ് സംഘം അടുക്കളയിലെത്തി കുക്കർ തുറന്ന് പരിശോധിച്ചപ്പോഴാണ് ചോറിനടിയിൽ ഒളിപ്പിച്ച നിലയിൽ കഞ്ചാവ് കണ്ടെത്തിയത്.
പിടിയിലായ ബിനീഷ് മുൻപും സമാനമായ രീതിയിൽ ലഹരിക്കടത്ത് കേസുകളിൽ പ്രതിയായിട്ടുള്ള ആളാണെന്ന് പോലീസ് പറഞ്ഞു. മുൻപ് ലഹരി റെയ്ഡിനിടെ എക്സൈസ് ഉദ്യോഗസ്ഥരെ മാരകായുധങ്ങളുമായി ആക്രമിച്ച കേസിലും ഇയാൾ പ്രതിയാണ്. പ്രതിയെ കോടതിയിൽ ഹാജരാക്കി റിമാൻഡ് ചെയ്യാനുള്ള നടപടികൾ പുരോഗമിക്കുകയാണ്.
Story Summary: In a bizarre incident in Thrissur, a history-sheeter named Bineesh was arrested during ‘Operation Toofan’ after hiding 400 grams of marijuana inside a pressure cooker with rice to evade police. Although officers initially missed it, the cooker’s whistle released a strong smell of cannabis, leading to his capture.
