കരുവൂർ ദുരന്തവുമായി ബന്ധപ്പെട്ട സംഭവത്തിൽ തമിഴ്നാട് മുഖ്യമന്ത്രി സി. ജോസഫ് വിജയ്യുടെ കരുവൂർ സന്ദർശനം തടയണമെന്നാവശ്യപ്പെട്ട് സുപ്രീം കോടതിയിൽ നൽകിയ ഹർജിയിൽ തിരിച്ചടി നേരിട്ടതിന് പിന്നാലെ, പുതിയ തന്ത്രങ്ങളുമായി ഡി.എം.കെ (Karur stampede). സന്ദർശനം തടയാൻ കോടതി തയ്യാറായില്ലെങ്കിലും, മറ്റ് മാർഗ്ഗങ്ങളിലൂടെ മുഖ്യമന്ത്രിയുടെ നീക്കങ്ങളെ പ്രതിരോധിക്കാനാണ് പാർട്ടിയുടെ തീരുമാനം. ഇതിന്റെ ഭാഗമായി സുപ്രീം കോടതി നിയോഗിച്ച മേൽനോട്ട സമിതിക്കും, സി.ബി.ഐക്കും ഡി.എം.കെ ഔദ്യോഗികമായി പരാതികൾ നൽകി.
ജൂലൈ 10-ന് കരുവൂർ സന്ദർശിക്കാനിരിക്കുന്ന മുഖ്യമന്ത്രി വിജയ്, ദുരന്തത്തിൽ മരിച്ചവരുടെ കുടുംബാംഗങ്ങളെ കാണുകയും സർക്കാർ സഹായങ്ങളും ജോലി നിയമന ഉത്തരവുകളും വിതരണം ചെയ്യുകയും ചെയ്യുമെന്നാണ് കരുതപ്പെടുന്നത്. എന്നാൽ, ഈ സന്ദർശനം സി.ബി.ഐ അന്വേഷണത്തെ ബാധിക്കുമെന്നും സാക്ഷികളെ സ്വാധീനിക്കാൻ സാധ്യതയുണ്ടെന്നും ഡി.എം.കെ ആരോപിക്കുന്നു. ഇതേ തുടർന്നാണ് മുഖ്യമന്ത്രിയുടെ സന്ദർശനവേളയിൽ സുരക്ഷാ മാനദണ്ഡങ്ങൾ പാലിക്കണമെന്നും നടപടികൾ സി.ബി.ഐയുടെ മേൽനോട്ടത്തിൽ മാത്രമേ പാടുള്ളൂ എന്നും ആവശ്യപ്പെട്ട് പാർട്ടി രംഗത്തെത്തിയത്. മുഖ്യമന്ത്രിയുടെ സന്ദർശനത്തെച്ചൊല്ലി ഭരണകക്ഷിയായ ടി.വി.കെയും ഡി.എം.കെയും തമ്മിൽ രൂക്ഷമായ വാഗ്വാദങ്ങളാണ് നടക്കുന്നത്. ദുരന്തബാധിതരെ ആശ്വസിപ്പിക്കുക എന്ന ലക്ഷ്യത്തോടെയാണ് സന്ദർശനം നടത്തുന്നതെന്നാണ് ടി.വി.കെ വാദിക്കുന്നത്.
അതേസമയം, ജൂലൈ രണ്ടിന് പി.ഡബ്ല്യു.ഡി മന്ത്രി ആദവ് അർജുന നടത്തിയ പ്രസംഗം സാക്ഷികളെ സ്വാധീനിക്കാനും സി.ബി.ഐ അന്വേഷണത്തെ തടസ്സപ്പെടുത്താനും ഉദ്ദേശിച്ചുള്ളതാണെന്നും ഡി.എം.കെ സംഘടനാ സെക്രട്ടറി ആർ.എസ്. ഭാരതി നൽകിയ പരാതിയിൽ ചൂണ്ടിക്കാട്ടുന്നു.2025 സെപ്റ്റംബർ 27-ന് കരുവൂരിൽ നടന്ന ടി.വി.കെ റാലിക്കിടെയുണ്ടായ തിക്കും തിരക്കിലും പെട്ട് 41 പേർ മരിക്കുകയും 142 പേർക്ക് പരിക്കേൽക്കുകയും ചെയ്തിരുന്നു. ഈ കേസിലെ അന്വേഷണം സി.ബി.ഐക്ക് കൈമാറാൻ 2025 ഒക്ടോബർ 13-നാണ് സുപ്രീം കോടതി ഉത്തരവിട്ടത്. നിലവിൽ അന്വേഷണം പുരോഗമിക്കുകയാണ്. സുപ്രീം കോടതിയിൽ നടന്ന ഹിയറിംഗിൽ, മുഖ്യമന്ത്രിയെ കേസിൽ പ്രതിയല്ലെന്ന് നിരീക്ഷിച്ച കോടതി, ഒരു മുഖ്യമന്ത്രിയുടെ സന്ദർശനത്തെ സുപ്രീം കോടതിക്ക് നിയന്ത്രിക്കാൻ കഴിയില്ലെന്ന് വ്യക്തമാക്കിയാണ് ഡി.എം.കെയുടെ ഹർജി തള്ളിയത്.
Summary:Following a setback in the Supreme Court, which refused to restrain CM C. Joseph Vijay from visiting Karur, the DMK has escalated its opposition by filing fresh representations with the SC-appointed supervisory committee and the CBI. The party aims to ensure safeguards during the CM’s scheduled July 10 visit to distribute compensation to the families of the 41 victims of the 2025 Karur stampede, alleging that the ruling party may attempt to influence witnesses or the ongoing CBI investigation.
