ചാറ്റ്ജിപിടിയുടെ സഹായത്തോടെ സോഫ്റ്റ്വെയർ നിർമ്മിച്ച് ജപ്പാനിലെ പ്രമുഖ അനിമേഷൻ സ്ട്രീമിംഗ് പ്ലാറ്റ്ഫോമായ ‘ബന്ദായി ചാനലി’നെതിരെ സൈബർ ആക്രമണം നടത്തിയ 15-കാരൻ പിടിയിൽ (Bandai Channel Cyberattack). പ്ലാറ്റ്ഫോമിലെ സുരക്ഷാ പിഴവുകൾ മുതലെടുത്ത് 46,812 വരിക്കാരുടെ അക്കൗണ്ടുകൾ നിയമവിരുദ്ധമായി റദ്ദാക്കിയതിനാണ് ഹൈസ്കൂൾ വിദ്യാർത്ഥിയായ കൗമാരക്കാരനെ ടോക്കിയോ മെട്രോപൊളിറ്റൻ പോലീസ് അറസ്റ്റ് ചെയ്തത്.
2025 നവംബറിലായിരുന്നു സംഭവം. അക്കൗണ്ടുകൾ റദ്ദാക്കുന്ന പ്രക്രിയയ്ക്കായി താൻ സ്വന്തമായി സോഴ്സ് കോഡ് തയ്യാറാക്കിയെന്നും, പ്രോസസ്സിംഗ് സമയം കുറയ്ക്കുന്നതിനായി ചാറ്റ്ജിപിടിയുടെ സഹായത്തോടെ അത് മറ്റൊരു പ്രോഗ്രാമിംഗ് ഭാഷയിലേക്ക് മാറ്റുകയുമായിരുന്നുവെന്നും കൗമാരക്കാരൻ പോലീസിനോട് സമ്മതിച്ചു. 2025 നവംബർ 4-ന് ബന്ദായി ചാനലിന്റെ സെർവറുകളിലേക്ക് വ്യാജ കമാൻഡുകൾ അയച്ചാണ് ഇയാൾ കൂട്ടത്തോടെ അക്കൗണ്ടുകൾ റദ്ദാക്കിയത്. ഇതിനെത്തുടർന്ന് നവംബർ 6 മുതൽ കമ്പനിയുടെ സേവനങ്ങൾ തടസ്സപ്പെടുകയും ഡിസംബർ വരെ നീണ്ട അറ്റകുറ്റപ്പണികൾക്ക് ശേഷമാണ് പ്രവർത്തനം പൂർണ്ണമായി പുനഃസ്ഥാപിക്കുകയും ചെയ്തത്.
കമ്പനി ഇയാളുടെ പ്രവേശനം തടഞ്ഞെങ്കിലും, ഐ.പി അഡ്രസ് 30 തവണയോളം മാറ്റി ഇയാൾ ആക്രമണം തുടർന്നു. കേസിൽ തനിക്ക് യാതൊരുവിധത്തിലുള്ള മുൻവൈരാഗ്യവുമില്ലെന്നും, ലോഗിൻ ചെയ്യാൻ സാധിക്കുന്ന നിരവധി അക്കൗണ്ടുകൾ പ്ലാറ്റ്ഫോമിലുണ്ടെന്ന് കണ്ടപ്പോഴാണ് ആക്രമണം നടത്തിയതെന്നും പ്രതി പോലീസിനോട് വെളിപ്പെടുത്തി. താൻ നാലാം ക്ലാസ് മുതൽ സ്വന്തമായി പ്രോഗ്രാമിംഗ് പഠിച്ചതാണെന്നും ഇയാൾ പറയുന്നു.
നേരത്തെ മറ്റൊരു കമ്പ്യൂട്ടർ സംബന്ധമായ കുറ്റകൃത്യത്തിന് ജൂണിൽ ഇയാളെ പോലീസ് അറസ്റ്റ് ചെയ്തിരുന്നു. സംഭവത്തിൽ ബന്ദായി നാംകോ ഫിലിംവർക്ക്സ് ബാധിക്കപ്പെട്ട ഉപഭോക്താക്കൾക്ക് മുന്നറിയിപ്പ് നൽകുകയും, അക്കൗണ്ടുകൾ വീണ്ടും രജിസ്റ്റർ ചെയ്യാൻ നിർദ്ദേശിക്കുകയും ചെയ്തു. ഉപഭോക്താക്കളുടെ വിവരങ്ങൾ ചോർന്നതായോ ദുരുപയോഗം ചെയ്തതായോ തെളിവുകളില്ലെന്ന് കമ്പനി വ്യക്തമാക്കി. ഇത്തരം സംഭവങ്ങൾ ആവർത്തിക്കാതിരിക്കാൻ കർശനമായ പരിശോധനകൾ തുടരുമെന്നും അധികൃതർ അറിയിച്ചു.
Summary: A 15-year-old student in Japan has been arrested for using ChatGPT to assist in developing software that carried out a cyberattack on the Bandai Channel streaming service, resulting in the unauthorized cancellation of over 46,000 user accounts. The teenager, who taught himself programming, admitted to the act, claiming he had no grudge against the company but targeted the platform due to its accessible account vulnerabilities.
