കൊച്ചി: മലയാള സിനിമയിലെ അതുല്യ പ്രതിഭ സലിം കുമാറിന് വിടചൊല്ലി കലാകേരളം. പറവൂർ ടൗൺ ഹാളിൽ പൊതുദർശനത്തിന് വെച്ചിരിക്കുന്ന പ്രിയതാരത്തെ അവസാനമായി ഒരു നോക്ക് കാണാൻ ആയിരങ്ങളാണ് ഒഴുകിയെത്തുന്നത്. സാംസ്കാരിക മന്ത്രി പി.സി. വിഷ്ണുനാഥ്, ബെന്നി ബഹനാൻ എംപി തുടങ്ങി സിനിമ-രാഷ്ട്രീയ മേഖലയിലെ നിരവധി പ്രമുഖർ ടൗൺഹാളിലെത്തി അന്ത്യാഞ്ജലി അർപ്പിച്ചു.(Salim Kumar Public Viewing At Paravur Town Hall Thousands Pay Tribute)
മോഹൻലാലിന് വേണ്ടി നിർമ്മാതാവ് ആന്റണി പെരുമ്പാവൂർ പുഷ്പചക്രം അർപ്പിച്ചു. കമൽ, പ്രിയനന്ദൻ, ജയറാം, ടിനി ടോം, ബിബിൻ ജോർജ്, സൗബിൻ ഷാഹിർ, നവ്യ നായർ തുടങ്ങി സിനിമാരംഗത്തെ ഒട്ടേറെപ്പേർ ആദരാഞ്ജലി അർപ്പിക്കാനെത്തി. ഉച്ചയ്ക്ക് ഒരു മണി വരെ ടൗൺ ഹാളിൽ പൊതുദർശനം തുടരും. മുഖ്യമന്ത്രി വി.ഡി. സതീശൻ രാവിലെ 11 മണിയോടെ അന്ത്യോപചാരം അർപ്പിക്കാനെത്തും. വൈകിട്ട് മൂന്നുമണിക്ക് പറവൂരിലെ വസതിയിൽ വെച്ചാണ് സംസ്കാര ചടങ്ങുകൾ.
‘ആദാമിന്റെ മകൻ അബു’ എന്ന ചിത്രത്തിലൂടെ ദേശീയ, സംസ്ഥാന പുരസ്കാരങ്ങൾ നേടിയ അദ്ദേഹം, അഭിനയമികവുകൊണ്ട് ഇന്ത്യൻ സിനിമയിൽത്തന്നെ മലയാളത്തിന്റെ അഭിമാനം ഉയർത്തി. ഹാസ്യത്തിലും വൈകാരിക രംഗങ്ങളിലും ഒരുപോലെ തിളങ്ങിയ സലിം കുമാർ, സംവിധായകനായും കഥാകൃത്തായും തന്റെ കയ്യൊപ്പ് പതിപ്പിച്ചു. ‘കറുത്ത ജൂതൻ’, ‘ദൈവമേ കൈതൊഴാം കെ കുമാറാകണം’, ‘കംപാർട്ട്മെന്റ്’ എന്നിവയാണ് അദ്ദേഹത്തിന്റെ സംവിധാനത്തിലുള്ള ചിത്രങ്ങൾ.
ഓർമ്മയായി ഒരു കലാകാരൻ
1969 ഒക്ടോബർ 10-ന് എറണാകുളം ചിറ്റാറ്റുകരയിൽ ജനിച്ച അദ്ദേഹം, മിമിക്രി വേദികളിലൂടെയാണ് കലാരംഗത്ത് എത്തിയത്. മുന്നൂറിലേറെ ചിത്രങ്ങളിൽ അഭിനയിച്ച സലിം കുമാർ, മികച്ച നടൻ, മികച്ച രണ്ടാമത്തെ നടൻ, മികച്ച ഹാസ്യനടൻ, മികച്ച കഥാകൃത്ത് എന്നീ നിലകളിൽ സംസ്ഥാന ചലച്ചിത്ര പുരസ്കാരങ്ങൾ കരസ്ഥമാക്കിയിട്ടുണ്ട്. സാമൂഹിക വിഷയങ്ങളിൽ പൗരബോധത്തോടെ പ്രതികരിക്കാൻ മടിക്കാത്ത വ്യക്തിത്വമായിരുന്നു അദ്ദേഹത്തിന്റേത്. ഭാര്യ സുനിതയ്ക്കും മക്കളായ ചന്തുവിനും ആരോമലിനുമൊപ്പം മലയാളികളുടെ സ്മരണകളിൽ സലിം കുമാർ എന്നും ജീവിക്കും.
Story Summary
Malayalam cinema mourns the passing of legendary actor Salim Kumar, as thousands gather at the Paravur Town Hall to pay their final respects. The actor, a recipient of national and state awards, passed away following a cardiac arrest while undergoing treatment for pneumonia. His funeral is scheduled for 3:00 PM today at his residence, marking the end of a remarkable career spanning over three hundred films.
