തിരുവനന്തപുരം: പതിനാറാം കേരള നിയമസഭയുടെ സമ്മേളനത്തിലെ ആദ്യ അടിയന്തര പ്രമേയമായി സംസ്ഥാനത്തെ കടുത്ത ഇന്ധനവില വർദ്ധനവും വിലക്കയറ്റവും ഉന്നയിച്ച് പ്രതിപക്ഷം സഭയിൽ ഭരണപക്ഷത്തിനെതിരെ കടുത്ത കടന്നാക്രമണം നടത്തി (Kerala Assembly Fuel Price Hike Adjournment Motion). മുൻ ധനകാര്യ മന്ത്രിയും സിപിഐഎം നേതാവുമായ കെ.എൻ. ബാലഗോപാലാണ് ജനജീവിതം ദുസ്സഹമാക്കുന്ന ഈ വിഷയം അടിയന്തര പ്രമേയമായി സഭയുടെ മുൻപാകെ കൊണ്ടുവന്നത്. അന്താരാഷ്ട്ര തലത്തിൽ നിലനിൽക്കുന്ന ഗൾഫ് യുദ്ധത്തിന്റെ പശ്ചാത്തലത്തിലാണ് കേന്ദ്രസർക്കാർ രാജ്യത്ത് നിരന്തരമായി പെട്രോൾ, ഡീസൽ, പാചകവാതക വിലകൾ വർദ്ധിപ്പിക്കുന്നതെന്ന് മുഖ്യമന്ത്രി വി.ഡി. സതീശൻ മറുപടി നൽകി. കഴിഞ്ഞ മേയ് 15 മുതൽ മാത്രം നാല് വട്ടമാണ് രാജ്യത്ത് ഇന്ധനവില വർദ്ധിപ്പിച്ചത്. ഇന്ധനവില വർദ്ധനവ് ഉയർത്തുന്ന സാമൂഹ്യ ആഘാതങ്ങളെക്കുറിച്ച് സർക്കാർ കൃത്യമായി പഠിച്ചുവരികയാണെന്നും വിപണിയിലെ അനിശ്ചിതത്വം മാറി കൃത്യമായൊരു തീരുമാനമെടുക്കാൻ സർക്കാരിന് കുറഞ്ഞത് പത്ത് ദിവസത്തെ സമയം കൂടി ആവശ്യമാണെന്നും മുഖ്യമന്ത്രി സഭയെ അറിയിച്ചു.
എന്നാൽ, തീരുമാനമാകട്ടെ എന്ന് പറഞ്ഞ് മുഖ്യമന്ത്രി വി.ഡി. സതീശൻ സഭയെ മനഃപൂർവ്വം തെറ്റിദ്ധരിപ്പിക്കുകയാണെന്ന് അടിയന്തര പ്രമേയത്തിന് നോട്ടീസ് നൽകിയ കെ.എൻ. ബാലഗോപാൽ കുറ്റപ്പെടുത്തി. മുൻപ് യുഡിഎഫ് പ്രതിപക്ഷത്തിരുന്നപ്പോൾ ഇന്ധനവില കൂടുമ്പോൾ സംസ്ഥാനം അധിക നികുതി കുറച്ചു കൊടുക്കണമെന്ന് ആവശ്യപ്പെട്ട് സമരം ചെയ്ത വി.ഡി. സതീശൻ, ഇപ്പോൾ മുഖ്യമന്ത്രി കസേരയിലിരുന്ന് പറയുന്ന ന്യായങ്ങൾ അംഗീകരിക്കാൻ കഴിയില്ലെന്ന് അദ്ദേഹം പറഞ്ഞു. വാണിജ്യ സിലിണ്ടറുകൾ, പെട്രോൾ, ഡീസൽ എന്നിവയ്ക്ക് പുറമെ നിർമ്മാണ മേഖലയെ പൂർണ്ണമായി തകർക്കുന്ന രീതിയിൽ ടാറിന്റെയും ബിറ്റുമിന്റെയും വിലയും വിമാന ഇന്ധനവിലയും ഒറ്റയടിക്ക് വർദ്ധിപ്പിച്ചു. കേന്ദ്ര സർക്കാർ ജനങ്ങളെ കൊള്ളയടിക്കുമ്പോൾ അതിനെതിരെ ശക്തമായ നിലപാട് പ്രഖ്യാപിക്കാൻ സംസ്ഥാന സർക്കാർ തയ്യാറാകണം. ജനങ്ങളുടെ പ്രശ്നങ്ങൾ പരിഹരിക്കാനുള്ള സാമ്പത്തിക സ്ഥിതി നിലവിൽ സംസ്ഥാനത്തിനുണ്ടെന്നും സഭ നിർത്തിവെച്ച് ഈ വിഷയം ഗൗരവമായി ചർച്ച ചെയ്യണമെന്നും പ്രതിപക്ഷം ആവശ്യപ്പെട്ടു.
ഇന്ധന നികുതി മുഴുവനായി ഒഴിവാക്കാൻ സംസ്ഥാന സർക്കാരിന് കഴിയില്ലെന്ന് മുഖ്യമന്ത്രി വി.ഡി. സതീശൻ സഭയിൽ വ്യക്തമാക്കി. മുൻ എൽഡിഎഫ് സർക്കാരിന്റെ കാലത്ത് ഇന്ധനവില കൂടിയപ്പോൾ 3100 കോടി രൂപയുടെ അധിക വരുമാനം ഖജനാവിലേക്ക് ഉണ്ടായിട്ടും ജനങ്ങൾക്ക് വേണ്ടി ഒരു രൂപ പോലും നികുതി കുറയ്ക്കാൻ അന്ന് തയ്യാറായിരുന്നില്ല. നികുതി കുറയ്ക്കുന്ന മണ്ടത്തരങ്ങൾ തങ്ങൾ കാണിക്കില്ല എന്നാണ് മുൻ ധനകാര്യ മന്ത്രി തോമസ് ഐസക്ക് അന്ന് സഭയിൽ പരസ്യമായി പറഞ്ഞത്. അന്ന് സ്വന്തം മുന്നണി ഭരിക്കുമ്പോൾ ധനമന്ത്രി പറഞ്ഞ ആ ‘മണ്ടത്തരം’ ഇപ്പോൾ തന്നോട് ചെയ്യാൻ ആവശ്യപ്പെടുന്നത് എന്ത് യുക്തിയുടെ അടിസ്ഥാനത്തിലാണെന്ന് മുഖ്യമന്ത്രി വി.ഡി. സതീശൻ സഭയിൽ തിരിച്ചടിച്ചു. ഇരുപക്ഷവും തമ്മിലുള്ള കടുത്ത വാദപ്രതിവാദങ്ങൾക്കൊടുവിൽ അടിയന്തര പ്രമേയത്തിന് അനുമതി നിഷേധിച്ചതിനെ തുടർന്ന് പ്രതിപക്ഷം സഭയിൽ നിന്നും ഇറങ്ങിപ്പോയി.
Summary: The opposition raised the fuel price hike as the first adjournment motion in the 16th Kerala Legislative Assembly, with CPIM leader K.N. Balagopal demanding an immediate state tax reduction. Chief Minister V.D. Satheesan stated that the price hikes were driven by the central government due to the Gulf war situation and promised structural measures within ten days. The assembly witnessed heated debates as the Chief Minister recalled former Finance Minister Thomas Isaac’s stance against cutting state fuel taxes during the previous tenure.
