വാഷിങ്ടൺ: ലെബനൻ തലസ്ഥാനമായ ബെയ്റൂത്തിൽ ഇസ്രയേൽ തുടരുന്ന ശക്തമായ സൈനിക നടപടികളുടെ പേരിൽ അമേരിക്കൻ പ്രസിഡന്റ് ഡൊണാൾഡ് ട്രംപ് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനോട് ഫോണിൽ രൂക്ഷമായ ഭാഷയിൽ പൊട്ടിത്തെറിച്ചു (Donald Trump Benjamin Netanyahu Beirut Attack). ബെയ്റൂത്തിൽ ഇസ്രയേൽ നടത്തുന്ന വ്യോമാക്രമണങ്ങളും സൈനിക നീക്കങ്ങളും പ്രഖ്യാപിത വെടിനിർത്തൽ കരാറിന്റെ നഗ്നമായ ലംഘനമാണെന്ന് ചൂണ്ടിക്കാട്ടി ഇറാൻ യുഎസുമായുള്ള നിർണായക സമാധാന ചർച്ചകളിൽനിന്ന് പിൻവാങ്ങുമെന്ന് ഭീഷണി മുഴക്കിയതിന് തൊട്ടുപിന്നാലെയാണ് ട്രംപിന്റെ ഈ ശക്തമായ ഇടപെടൽ ഉണ്ടായത്.
തിങ്കളാഴ്ച നെതന്യാഹുവിനെ ഫോണിൽ വിളിച്ച ട്രംപ്, തികച്ചും അസാധാരണവും രൂക്ഷവുമായ പദപ്രയോഗങ്ങളാണ് നടത്തിയതെന്ന് യുഎസ് ഉദ്യോഗസ്ഥരെ ഉദ്ധരിച്ച് പ്രമുഖ മാധ്യമമായ അക്സിയോസ് റിപ്പോർട്ട് ചെയ്തു. നെതന്യാഹുവിനെ ബുദ്ധിശൂന്യനെന്നും നന്ദികെട്ടവനെന്നും വിളിച്ച ട്രംപ്, ബെയ്റൂത്തിലെ ആക്രമണങ്ങൾ ഉടനടി നിർത്താൻ കർശന നിർദ്ദേശം നൽകുകയും ഇസ്രയേലിന്റെ സൈനിക നടപടി തടയുകയും ചെയ്തു.
താൻ നെതന്യാഹുവുമായി സംസാരിച്ചതായും ലെബനനിലെ ബെയ്റൂത്തിൽ വലിയ ആക്രമണം നടത്തരുതെന്ന് ആവശ്യപ്പെട്ടതിനെ തുടർന്ന് അദ്ദേഹം സൈന്യത്തെ പിന്തിരിപ്പിച്ചതായും ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെ ഔദ്യോഗികമായി സ്ഥിരീകരിച്ചു.
താൻ ഹിസ്ബുള്ള നേതാക്കളുടെ പ്രതിനിധികളുമായും ചർച്ച നടത്തിയെന്നും ഇസ്രായേലിന് നേരെ വെടിയുതിർക്കുന്നത് നിർത്താമെന്ന് അവർ സമ്മതിച്ചതായും ട്രംപ് വ്യക്തമാക്കി. ലെബനൻ തലസ്ഥാനത്ത് ബോംബിടാനുള്ള നീക്കം ഇസ്രായേലിനെ ആഗോളതലത്തിൽ കൂടുതൽ ഒറ്റപ്പെടുത്തുമെന്ന് ട്രംപ് മുന്നറിയിപ്പ് നൽകിയിട്ടുണ്ട്. താൻ ഇല്ലായിരുന്നെങ്കിൽ നെതന്യാഹു ജയിലിൽ ആയേനെ എന്നും, ഇപ്പോൾ എല്ലാവർക്കും ഇസ്രായേലിനോട് കടുത്ത വെറുപ്പാണെന്നും ട്രംപ് ഫോൺ സംഭാഷണത്തിൽ ആക്രോശിച്ചതായി യുഎസ് മാധ്യമങ്ങൾ റിപ്പോർട്ട് ചെയ്യുന്നു. യുഎസിന്റെ പരോക്ഷ അറിവോടെയാണ് ഇസ്രയേൽ ലെബനനിൽ ആക്രമണം നടത്തുന്നതെങ്കിലും, അത് പരിധി വിട്ടതും വൻതോതിൽ സാധാരണക്കാർ കൊല്ലപ്പെട്ടതുമാണ് ട്രംപിനെ പെട്ടെന്ന് ചൊടിപ്പിച്ചത്.
നേരത്തെ, ലെബനനിലെ ഇസ്രയേൽ ആക്രമണത്തിൽ പ്രതിഷേധിച്ച് യുഎസുമായുള്ള സമാധാനചർച്ചകൾ ഇറാൻ താൽക്കാലികമായി നിർത്തിവെച്ചതായി ഇറാനിയൻ വാർത്താ ഏജൻസിയായ തസ്നിം റിപ്പോർട്ട് ചെയ്തിരുന്നു. ഇറാൻ-യുഎസ് വെടിനിർത്തൽ കരാറിലെ പ്രധാന വ്യവസ്ഥകളിലൊന്നായ ലെബനനിലെ വെടിനിർത്തൽ ലംഘിക്കപ്പെട്ട സാഹചര്യത്തിലാണ് ഇറാൻ ഈ കടുത്ത നിലപാടിലേക്ക് നീങ്ങിയത്. വെടിനിർത്തൽ ലംഘനത്തിന്റെ പൂർണ്ണമായ അനന്തരഫലങ്ങൾക്ക് അമേരിക്കയും ഇസ്രയേലും മാത്രമായിരിക്കും ഉത്തരവാദികളെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി കടുത്ത മുന്നറിയിപ്പും നൽകിയിരുന്നു. എന്നാൽ, ട്രംപ് നേരിട്ട് ഇടപെട്ട് ഇസ്രയേലിന്റെ ആക്രമണം തടഞ്ഞതോടെ ഇറാൻ-യുഎസ് ചർച്ചകൾ വീണ്ടും പുനരാരംഭിച്ചതായി അന്താരാഷ്ട്ര മാധ്യമമായ സിഎൻഎൻ റിപ്പോർട്ട് ചെയ്യുന്നു. ട്രംപ് വീണ്ടും അധികാരത്തിൽ വന്നതിന് ശേഷം നെതന്യാഹുവുമായി നടത്തുന്ന ഏറ്റവും വഷളായ ഫോൺ സംഭാഷണമാണിതെന്നാണ് വൈറ്റ് ഹൗസ് വൃത്തങ്ങൾ സൂചിപ്പിക്കുന്നത്.
Summary: US President Donald Trump strongly criticized Israeli Prime Minister Benjamin Netanyahu over military actions in Beirut, calling him ungrateful and foolish during a tense phone call. Trump intervened to halt the airstrikes after Iran threatened to withdraw from peace talks, citing Israeli violations of the ceasefire agreement. Following Trump’s direct mediation and a pause in military strikes, Iran-US diplomatic discussions have successfully resumed, as confirmed by international sources.
