ന്യൂഡൽഹി: രാജ്യതലസ്ഥാനത്ത് സിഎൻജി (CNG) വിലയിൽ വീണ്ടും വൻ വർദ്ധനവ്. കിലോഗ്രാമിന് രണ്ട് രൂപയാണ് ഇന്ന് വർദ്ധിപ്പിച്ചത്. കഴിഞ്ഞ രണ്ടാഴ്ചയ്ക്കുള്ളിൽ സിഎൻജി വിലയിൽ വരുത്തുന്ന നാലാമത്തെ വർദ്ധനവാണിത്. പുതിയ നിരക്ക് പ്രകാരം ഡൽഹിയിൽ ഒരു കിലോ സിഎൻജിയുടെ വില 83.09 രൂപയായി ഉയർന്നു.(CNG Price Hiked By Two Rupees Per KG In Delhi NCR Fourth Hike In Two Weeks)
ഡൽഹിക്ക് പുറമെ സമീപ പ്രദേശങ്ങളായ നോയിഡ, ഗ്രേറ്റർ നോയിഡ, ഗാസിയാബാദ് എന്നിവിടങ്ങളിൽ വില കിലോയ്ക്ക് 91.70 രൂപയായും വർദ്ധിച്ചിട്ടുണ്ട്. പശ്ചിമേഷ്യൻ പ്രതിസന്ധിയെ തുടർന്ന് അന്താരാഷ്ട്ര വിപണിയിൽ പ്രകൃതിവാതകത്തിനുണ്ടായ വിലവർദ്ധനവും ഇറക്കുമതി ചെലവ് കൂടിയതുമാണ് പെട്ടെന്നുള്ള വിലക്കയറ്റത്തിന് കാരണമായി ചൂണ്ടിക്കാണിക്കുന്നത്.
മേയ് 15-ന് രണ്ട് രൂപയും, മേയ് 17-ന് ഒരു രൂപയും, മേയ് 23-ന് വീണ്ടും ഒരു രൂപയും വർദ്ധിപ്പിച്ചതിന് പിന്നാലെയാണ് ഇന്ന് വീണ്ടും രണ്ട് രൂപ കൂട്ടിയത്. തുടർച്ചയായുണ്ടാകുന്ന ഈ വിലവർദ്ധനവ് സാധാരണക്കാരെയും ഓട്ടോ-ടാക്സി ജീവനക്കാരെയും കടുത്ത പ്രതിസന്ധിയിലാക്കിയിരിക്കുകയാണ്. പെട്രോൾ, ഡീസൽ വിലകളും രാജ്യത്തുടനീളം വർദ്ധിച്ചുകൊണ്ടിരിക്കുന്ന സാഹചര്യത്തിലാണ് സിഎൻജി ഉപഭോക്താക്കൾക്കും ഈ അധികഭാരം നേരിടേണ്ടി വരുന്നത്. വിലക്കയറ്റത്തിനെതിരെ ഡൽഹിയിൽ വിവിധ ട്രാൻസ്പോർട്ട് യൂണിയനുകളുടെ നേതൃത്വത്തിൽ പ്രതിഷേധം ശക്തമാകുകയാണ്. ഇതിനൊപ്പം ഓട്ടോ-ടാക്സി നിരക്കുകൾ പരിഷ്കരിക്കണമെന്ന ആവശ്യവും ഉയർന്നിട്ടുണ്ട്.
Story Summary
CNG prices in Delhi have been hiked by Rs 2 per kg, marking the fourth increase in the last two weeks due to rising global natural gas costs. Following the latest revision, CNG will now cost Rs 83.09 per kg in Delhi and Rs 91.70 per kg in Noida and Ghaziabad, triggering protests from transport unions.
