സൂപ്പർഹീറോകൾ സിനിമകളിലും കോമിക് പുസ്തകങ്ങളിലുമാണ് ഉണ്ടാകാറുള്ളതെന്ന് പലരും കരുതും. എന്നാൽ അമേരിക്കയിലെ അർക്കൻസാസിൽ നടന്ന ഒരു സംഭവം ആ ധാരണയെ മാറ്റിമറിക്കുകയാണ്. സ്പൈഡർമാൻ വേഷം ധരിച്ചിരുന്ന 20-കാരനായ ക്രിസ്റ്റഫർ ഹെല്ലൻതാൽ തിരക്കേറിയ ആറുവരിപ്പാത മുറിച്ചുകടക്കാൻ ബുദ്ധിമുട്ടുകയായിരുന്ന വീൽചെയർ ഉപയോക്താവിനെ സുരക്ഷിതമായി റോഡ് മുറിച്ചുകടത്തിയ സംഭവമാണ് സമൂഹമാധ്യമങ്ങളിൽ വൈറലായത്. (Spider-Man Wheelchair user rescue)
അർക്കൻസാസിലെ ജോൺസ്ബോറോ നഗരത്തിലൂടെയാണ് ക്രിസ്റ്റഫർ കാറിൽ യാത്ര ചെയ്തിരുന്നത്. പ്രാദേശിക ട്രാംപോളിൻ പാർക്കിൽ നടന്ന സൂപ്പർഹീറോ പരിപാടിയിൽ പങ്കെടുത്ത് മടങ്ങുന്നതിനാൽ അദ്ദേഹം അപ്പോഴും സ്പൈഡർമാൻ വേഷത്തിലായിരുന്നു. ഇതിനിടെയാണ് തിരക്കേറിയ റോഡിലൂടെ ഒറ്റയ്ക്ക് വീൽചെയറിൽ കടക്കാൻ ശ്രമിക്കുന്ന ഒരാളെ അദ്ദേഹം ശ്രദ്ധിച്ചത്. ട്രാഫിക് സിഗ്നലിൽ വാഹനങ്ങൾ നിർത്തിയിരുന്ന സമയത്ത് വീൽചെയർ ഉപയോക്താവ് പതുക്കെ റോഡ് മുറിച്ചുകടക്കുകയായിരുന്നു. എന്നാൽ സിഗ്നൽ മാറാൻ സമയമടുത്തതോടെ അപകടസാധ്യത മനസ്സിലാക്കിയ ക്രിസ്റ്റഫർ ഉടൻ കാർ നിർത്തി പുറത്തേക്ക് ഓടി. “ഞാനുണ്ട്” എന്ന് പറഞ്ഞുകൊണ്ട് അദ്ദേഹം വീൽചെയർ പിടിച്ച് വേഗത്തിൽ റോഡിന്റെ മറുവശത്തേക്ക് എത്തിച്ചു. നിമിഷങ്ങൾക്കകം വാഹനഗതാഗതം പുനരാരംഭിക്കുകയും ചെയ്തു.
Spider-man jumps out of vehicle and helps disabled pedestrian cross the street pic.twitter.com/QlOypgv5hC
— made me smile (@mademe__smile) July 23, 2026
സംഭവം റോഡിലെ ട്രാഫിക് ക്യാമറയിൽ പതിഞ്ഞിരുന്നു. പിന്നീട് ജോൺസ്ബോറോ പൊലീസ് വകുപ്പ് ഈ വീഡിയോ സമൂഹമാധ്യമങ്ങളിൽ പങ്കുവെച്ചതോടെ ലക്ഷക്കണക്കിന് ആളുകളാണ് കണ്ടത്. സ്വാർഥതയില്ലാത്ത സഹായ മനോഭാവത്തെ അഭിനന്ദിച്ച പൊലീസ്, ക്രിസ്റ്റഫറുടെ പ്രവൃത്തിയെ യഥാർത്ഥ മനുഷ്യസ്നേഹത്തിന്റെ ഉദാഹരണമെന്നാണ് വിശേഷിപ്പിച്ചത്.
കുട്ടിക്കാലം മുതൽ സ്പൈഡർമാന്റെ വലിയ ആരാധകനാണെന്ന് ക്രിസ്റ്റഫർ പിന്നീട് പറഞ്ഞു. കുട്ടികളെ രസിപ്പിക്കാനായി ജോലിസ്ഥലത്ത് പലപ്പോഴും സ്പൈഡർമാൻ വേഷം ധരിക്കാറുണ്ടെന്നും, ആ വേഷമുണ്ടായാലും ഇല്ലെങ്കിലും ആരെങ്കിലും സഹായം ആവശ്യപ്പെട്ടാൽ താൻ തീർച്ചയായും സഹായിക്കുമായിരുന്നുവെന്നും അദ്ദേഹം വ്യക്തമാക്കി. സഹപ്രവർത്തകരും അദ്ദേഹത്തിന്റെ ഈ പ്രവൃത്തി അപ്രതീക്ഷിതമല്ലെന്നും, മറ്റുള്ളവരെ സഹായിക്കുന്നത് അദ്ദേഹത്തിന്റെ സ്വഭാവത്തിന്റെ ഭാഗമാണെന്നും പറഞ്ഞു. വീഡിയോ വൈറലായതോടെ “മഹത്തായ ശക്തിയോടൊപ്പം മഹത്തായ ഉത്തരവാദിത്വവും വരുന്നു” എന്ന സ്പൈഡർമാന്റെ പ്രശസ്ത സന്ദേശം പലരും ഓർമ്മിപ്പിച്ചു. വേഷം സ്പൈഡർമാന്റേതായിരുന്നെങ്കിലും, ആ നിമിഷത്തിൽ അദ്ദേഹം യഥാർത്ഥ ജീവിതത്തിലെ സൂപ്പർഹീറോ തന്നെയായിരുന്നുവെന്നാണ് സോഷ്യൽ മീഡിയയിലെ പൊതുവായ അഭിപ്രായം.
Summary: A 20-year-old man dressed as Spider-Man became a viral sensation after helping a wheelchair user safely cross a busy six-lane road in Arkansas. His quick and selfless act earned widespread praise, with many calling him a real-life superhero.
