തിരുവനന്തപുരം: പുതിയ യുഡിഎഫ് സർക്കാരിന്റെ മന്ത്രിസഭാരൂപീകരണ ചർച്ചകൾക്കിടെ കോൺഗ്രസ് നേതൃത്വത്തിലെ കടുത്ത ഭിന്നതകൾക്ക് പരിഹാരമാകുന്നു. എഐസിസി സംഘടനാ ജനറൽ സെക്രട്ടറി കെ. സി. വേണുഗോപാലും നിയുക്ത മുഖ്യമന്ത്രി വി. ഡി. സതീശനും തമ്മിൽ നടത്തിയ നിർണ്ണായക കൂടിക്കാഴ്ചയിൽ മഞ്ഞുരുകി.(VD Satheesan KC Venugopal meeting Kerala UDF Cabinet List Tomorrow)
കൂടിക്കാഴ്ചയ്ക്ക് ശേഷം ഇരുവരും ഒരുമിച്ച് മാധ്യമപ്രവർത്തകരെ കാണുകയും കെ സി വേണുഗോപാൽ പുതിയ വി. ഡി. സതീശൻ മന്ത്രിസഭയ്ക്ക് പൂർണ്ണ പിന്തുണ പ്രഖ്യാപിക്കുകയും ചെയ്തു. ഞങ്ങൾ രാഷ്ട്രീയത്തിൽ എന്നും ഒരുമിച്ച് കാണുന്നവരും സംസാരിക്കുന്നവരുമാണെന്നും സതീശന്റെ നേതൃത്വത്തിലുള്ള മന്ത്രിസഭ വിജയകരമായി മുന്നോട്ടുപോകാൻ എല്ലാ പിന്തുണയും നൽകുമെന്നും കെ. സി. വേണുഗോപാൽ മാധ്യമങ്ങളോട് പറഞ്ഞു.
ഹൈക്കമാൻഡിന്റെയും പാർട്ടിയുടെയും അന്തിമ തീരുമാനങ്ങളിൽ കോൺഗ്രസ് ഒന്നിച്ച് ഉറച്ചുനിൽക്കുമെന്നും അദ്ദേഹം വ്യക്തമാക്കി. കോൺഗ്രസ് നേതാക്കൾ ആർക്കെങ്കിലും വേണ്ടി വാശിപിടിക്കുന്നവരല്ലെന്നും വി. ഡി. സതീശനും കൂട്ടിച്ചേർത്തു. പുതിയ യുഡിഎഫ് മന്ത്രിമാരുടെ പൂർണ്ണമായ പട്ടിക നാളെ ഉച്ചയോടെ ഔദ്യോഗികമായി ഗവർണർക്ക് കൈമാറുമെന്നും അറിയിച്ചു. മുഖ്യമന്ത്രി പ്രഖ്യാപനത്തിന് ശേഷം ഇരുനേതാക്കളും തമ്മിൽ നടത്തുന്ന ആദ്യ ഔദ്യോഗിക കൂടിക്കാഴ്ചയായിരുന്നു ഇത്.
Story Summary
The political standoff between VD Satheesan and KC Venugopal resolved after a high-level meeting in Trivandrum. Addressing the media together, Venugopal declared full support for the Satheesan cabinet, while the designate CM announced that the final minister list will be handed over to the Governor tomorrow afternoon.
