തിരുവനന്തപുരം: കേരള നിയമസഭാ തിരഞ്ഞെടുപ്പിനുള്ള നാമനിർദേശ പത്രിക സമർപ്പിക്കാനുള്ള സമയം ഇന്ന് അവസാനിക്കുന്നു. മുന്നണി സ്ഥാനാർത്ഥികൾ ഉൾപ്പെടെ ശേഷിക്കുന്ന മുഴുവൻ പേരും ഇന്ന് പത്രിക നൽകുന്നതോടെ തിരഞ്ഞെടുപ്പ് നടപടികളുടെ ആദ്യ ഘട്ടം പൂർത്തിയാകും. നാളെയാണ് പത്രികകളുടെ സൂക്ഷ്മ പരിശോധന നടക്കുക.(Assembly elections, VD Satheesan to file nomination papers today)
പ്രതിപക്ഷ നേതാവ് വി.ഡി. സതീശൻ ഇന്ന് രാവിലെ 11 മണിയോടെ പറവൂർ അഡീഷണൽ തഹസിൽദാർക്ക് മുന്നിൽ പത്രിക സമർപ്പിക്കും. വി.ഡി. സതീശൻ നേരിടുന്ന ഏഴാമത്തെ തിരഞ്ഞെടുപ്പാണിത്. ശ്രദ്ധേയമായ ഒരു നീക്കമെന്ന നിലയിൽ, പ്ലാച്ചിമട സമരസമിതി നേതാക്കളാണ് അദ്ദേഹത്തിന് കെട്ടിവെക്കാനുള്ള തുക കൈമാറുന്നത്. പ്ലാച്ചിമട സമരത്തിന് നേരിട്ടെത്തി ഐക്യദാർഢ്യം പ്രഖ്യാപിച്ച പ്രതിപക്ഷ നേതാവിനോടുള്ള പിന്തുണ അറിയിക്കുന്നതിനാണ് സമരസമിതി ഈ ദൗത്യം ഏറ്റെടുത്തിരിക്കുന്നത്.
പത്രികാ സമർപ്പണം പൂർത്തിയാകുന്നതോടെ സംസ്ഥാനം ശക്തമായ പ്രചാരണ ഘട്ടത്തിലേക്ക് കടക്കും. ഏപ്രിൽ 9-ന് നടക്കുന്ന വോട്ടെടുപ്പിന് മുന്നോടിയായി ഇനി 17 ദിവസത്തെ പരസ്യപ്രചാരണ സമയം മാത്രമാണ് സ്ഥാനാർത്ഥികൾക്ക് മുന്നിലുള്ളത്. വോട്ടെടുപ്പ് പൂർത്തിയായ ശേഷം മേയ് 4-നാണ് വോട്ടെണ്ണൽ നിശ്ചയിച്ചിരിക്കുന്നത്.
