ബീജിംഗ്: ചൈനീസ് ഇലക്ട്രിക് വാഹന നിർമ്മാതാക്കളായ എക്സ്പെങ് തങ്ങളുടെ പറക്കും കാറുകൾ 2027-ഓടെ ഉപഭോക്താക്കളിലെത്തിക്കാൻ ലക്ഷ്യമിടുന്നതായി റിപ്പോർട്ട് ( Xpeng Flying Car Delivery 2027). അടുത്ത വർഷം തന്നെ പറക്കും കാറുകളുടെ വൻതോതിലുള്ള ഉൽപ്പാദനം ആരംഭിക്കുമെന്നും 2026 അവസാനത്തോടെ മനുഷ്യരൂപത്തിലുള്ള റോബോട്ടുകളെ പുറത്തിറക്കുമെന്നും കമ്പനി പ്രസിഡന്റ് ബ്രയാൻ ഗു വ്യക്തമാക്കി.
ഇതിനോടകം തന്നെ 7,000-ത്തിലധികം ഓർഡറുകൾ ഈ പറക്കും കാറുകൾക്കായി കമ്പനിക്ക് ലഭിച്ചിട്ടുണ്ട്. നിലവിൽ ചൈനീസ് വ്യോമയാന അധികൃതരിൽ നിന്നുള്ള അനുമതിക്കായി കാത്തിരിക്കുകയാണ് കമ്പനി. ഈ വർഷം തന്നെ ചൈനീസ് നഗരമായ ഗ്വാങ്ഷൂവിൽ റോബോടാക്സികളുടെ പരീക്ഷണം ആരംഭിക്കും. 2027-ഓടെ ലോകമെമ്പാടുമുള്ള പങ്കാളികളുമായി ചേർന്ന് അന്താരാഷ്ട്ര തലത്തിൽ റോബോടാക്സി പരീക്ഷണങ്ങൾ വ്യാപിപ്പിക്കും.
2026-ന്റെ അവസാന പാദത്തിൽ പുറത്തിറങ്ങുന്ന ഈ റോബോട്ടുകളെ തുടക്കത്തിൽ റിസപ്ഷനിസ്റ്റുകളായും വിൽപ്പന സഹായികളായും ഉപയോഗിക്കും. വരും വർഷങ്ങളിൽ വാഹന നിർമ്മാണത്തേക്കാൾ വലിയ ബിസിനസ്സായി റോബോട്ട് വിപണി മാറുമെന്നാണ് കമ്പനിയുടെ പ്രതീക്ഷ. നിലവിൽ 60-ഓളം രാജ്യങ്ങളിൽ എക്സ്പെങ് സാന്നിധ്യമറിയിച്ചിട്ടുണ്ട്. അടുത്ത പത്ത് വർഷത്തിനുള്ളിൽ കമ്പനിയുടെ വരുമാനത്തിന്റെ 50 ശതമാനത്തിലധികവും ചൈനയ്ക്ക് പുറത്തുനിന്നായിരിക്കുമെന്ന് ബ്രയാൻ ഗു പറഞ്ഞു.
ജർമ്മൻ വാഹന നിർമ്മാതാക്കളായ ഫോക്സ്വാഗനുമായുള്ള സഹകരണം കൂടുതൽ ശക്തമാക്കാനും എക്സ്പെങ് ലക്ഷ്യമിടുന്നുണ്ട്. ഇരുവരും സംയുക്തമായി വികസിപ്പിച്ച ആദ്യ ഇലക്ട്രിക് മോഡലിന്റെ ഉൽപ്പാദനം കഴിഞ്ഞ മാസം ആരംഭിച്ചിരുന്നു.
Summary: Chinese EV maker Xpeng plans to start large-scale production of its flying cars next year, with deliveries expected by 2027. President Brian Gu also announced that the company will launch humanoid robots in late 2026 and start testing robotaxis in Guangzhou this year. Xpeng has already received over 7,000 orders for its flying cars. The company is also looking to expand its partnership with Volkswagen and aims to generate over 50% of its revenue from overseas markets within the next decade.
