വാഷിംഗ്ടൺ: അമേരിക്കയിൽ ഡൊണാൾഡ് ട്രംപ് ഭരണകൂടം രണ്ടാം തവണ അധികാരമേറ്റതിന് പിന്നാലെ ഇമിഗ്രേഷൻ തടവുകാരുടെ ആത്മഹത്യാ നിരക്കിൽ ഭയപ്പെടുത്തുന്ന വർദ്ധനവ് ഉണ്ടായതായി വാർത്താ ഏജൻസിയായ അസോസിയേറ്റഡ് പ്രസ് നടത്തിയ അന്വേഷണ റിപ്പോർട്ട് പുറത്തുവിട്ടു (US Suicide Rise Immigration Detainees). 2025 ജനുവരിയിൽ ട്രംപ് സർക്കാർ അധികാരമേറ്റതു മുതൽ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് കസ്റ്റഡിയിലുള്ള പത്തോളം തടവുകാരാണ് മാനസിക സമ്മർദ്ദവും അധികൃതരുടെ അവഗണനയും മൂലം ജീവനൊടുക്കിയത്. ഇതിൽ ഭൂരിഭാഗവും വിവിധ രാജ്യങ്ങളിൽ നിന്ന് യുഎസിലേക്ക് എത്തിയ ഹിസ്പാനിക് വംശജരായ യുവാക്കളാണ്. അഭയാർത്ഥികളെ കൂട്ടത്തോടെ നാടുകടത്തുന്ന ട്രംപിന്റെ കർശനമായ ഇമിഗ്രേഷൻ നയങ്ങളുടെ ഭാഗമായി തടവിലാക്കപ്പെടുന്ന ലക്ഷക്കണക്കിന് ആളുകൾക്ക് കൃത്യമായ മാനസികാരോഗ്യ പിന്തുണയോ ചികിത്സയോ നൽകുന്നതിൽ ജയിൽ അധികൃതർ പരാജയപ്പെടുന്നതാണ് ഈ ദാരുണമായ സാഹചര്യത്തിന് കാരണമെന്ന് പൊതുജനാരോഗ്യ വിദഗ്ദ്ധർ ചൂണ്ടിക്കാണിക്കുന്നു.
കോവിഡ് ബാധിച്ച് ഐസൊലേഷനിൽ കഴിയവെ തന്റെ അമ്മയോട് സംസാരിക്കാൻ അനുവാദം ചോദിച്ച അധികൃതർ നിരസിച്ചതിനെ തുടർന്ന് ആത്മഹത്യ ചെയ്ത കൊളംബിയൻ സ്വദേശിയായ ബ്രയാൻ റേയോ ഗാർസൺ എന്ന ഇരുപത്തിയാറുകാരന്റെ മരണം ഉൾപ്പെടെയുള്ള നിരവധി ഉദാഹരണങ്ങൾ റിപ്പോർട്ടിൽ വ്യക്തമാക്കുന്നുണ്ട്. തടവുകാരുടെ എണ്ണം വർദ്ധിച്ചതനുസരിച്ച് ജയിലുകളിലെ അടിസ്ഥാന സൗകര്യങ്ങളുടെ കുറവ്, ഭാഷാപരമായ തടസ്സങ്ങൾ മൂലം ആശയവിനിമയം നടത്താൻ സാധിക്കാത്ത അവസ്ഥ, ക്രൂരമായ ഒറ്റപ്പെടുത്തലുകൾ എന്നിവ തടവുകാരെ കടുത്ത നിരാശയിലേക്കും ആത്മഹത്യയിലേക്കും നയിക്കുന്നു. എന്നാൽ കസ്റ്റഡിയിലെ ആത്മഹത്യകൾ വളരെ അപൂർവ്വമാണെന്നും തടവുകാർക്ക് ആവശ്യമായ വൈദ്യസഹായം ഉറപ്പാക്കുന്നുണ്ടെന്നുമാണ് യുഎസ് ആഭ്യന്തര സുരക്ഷാ മന്ത്രാലയം പ്രതികരിക്കുന്നത്. എന്നിരുന്നാലും, സ്വകാര്യ കരാറുകാരും കൗണ്ടി ജയിലുകളും നടത്തുന്ന തടങ്കൽ പാളയങ്ങളിൽ ഐസിഇ സ്വന്തം മാനദണ്ഡങ്ങൾ പോലും ലംഘിക്കുന്നതായാണ് അന്വേഷണത്തിൽ കണ്ടെത്തിയിരിക്കുന്നത്.
Summary: An investigation by the Associated Press revealed a sharp rise in suicides among ICE detainees since President Donald Trump took office in January 2025. At least 10 detainees, mostly young Hispanic men, have died by suicide due to extreme mental distress and systemic neglect in overcrowded detention facilities. Despite federal claims of adequate healthcare provision, reports indicate critical failures in early medical screening, communication access, and inmate monitoring.
