ന്യൂയോർക്ക്: ജയിൽശിക്ഷ അനുഭവിക്കവെ 2019-ൽ മരിച്ച ജെഫ്രി എപ്സ്റ്റീന്റെ കോടിക്കണക്കിന് രൂപയുടെ സ്വത്ത് മുൻ കാമുകിയും ദന്തഡോക്ടറുമായ കരീന ഷുലിയാക്കിന് (37) ലഭിച്ചേക്കുമെന്ന് റിപ്പോർട്ട്. യു.എസ് നീതിന്യായ വകുപ്പ് അടുത്തിടെ പുറത്തുവിട്ട ലക്ഷക്കണക്കിന് പേജുകളുള്ള അന്വേഷണ രേഖകളെ അടിസ്ഥാനമാക്കി ആണ് വാർത്ത പുറത്തുവിട്ടത്. എപ്സ്റ്റീൻ മരിക്കുന്നതിന് തൊട്ടുമുമ്പ് അവസാനമായി ഫോണിൽ സംസാരിച്ചതും കരീനയോടായിരുന്നു.(Jeffrey Epstein Estate Karyna Shuliak To Inherit Millions Reveal US Files)
എപ്സ്റ്റീന്റെ മരണപത്രത്തിലെ പ്രധാന ഗുണഭോക്താവായി കരീനയെ ഉൾപ്പെടുത്തിയിട്ടുണ്ട്. ഇതിലൂടെ എപ്സ്റ്റീന്റെ ശേഷിക്കുന്ന സ്വത്തിൽ നിന്നും 100 ദശലക്ഷം ഡോളർ കരീനയ്ക്ക് ലഭിച്ചേക്കാം. വിവാഹ നിശ്ചയത്തിന്റെ ഭാഗമായി നൽകിയ 33 കാരറ്റ് വജ്രമോതിരവും ഇതിൽ ഉൾപ്പെടുന്നു. നിലവിൽ എപ്സ്റ്റീന്റെ ആകെ സ്വത്തുവകകൾ 120 ദശലക്ഷം മുതൽ 200 ദശലക്ഷം ഡോളർ വരെയായി കണക്കാക്കപ്പെടുന്നു.
ആരാണ് കരീന ഷുലിയാക്?
ബെലാറസ് സ്വദേശിയായ കരീന 2010-ലാണ് സ്റ്റുഡന്റ് വിസയിൽ ന്യൂയോർക്കിലെത്തുന്നത്. 2011-ൽ എപ്സ്റ്റീനുമായി പരിചയത്തിലായ ഇവർ 8 വർഷത്തോളം ഇയാളുമായി അടുത്ത ബന്ധം പുലർത്തി. കരീനയുടെ പഠനം, ആഡംബര യാത്രകൾ, വിസ ലഭിക്കാനുള്ള വഴി എന്നിവയ്ക്കെല്ലാം പണം ചെലവഴിച്ചത് എപ്സ്റ്റീനായിരുന്നു. കൊളംബിയ സർവകലാശാലയിലെ ഡെന്റൽ കോളേജിൽ കരീനയ്ക്ക് പ്രവേശനം ലഭിക്കാൻ എപ്സ്റ്റീൻ ദശലക്ഷക്കണക്കിന് ഡോളറുകൾ സംഭാവന നൽകിയെന്നും രേഖകൾ വ്യക്തമാക്കുന്നു.
കരീനയ്ക്ക് യു.എസ് ഗ്രീൻ കാർഡ് ലഭിക്കുന്നതിനായി തന്റെ വനിതാ അസിസ്റ്റന്റുമാരിൽ ഒരാളെക്കൊണ്ട് കരീനയെ വിവാഹം കഴിപ്പിക്കാനും എപ്സ്റ്റീൻ വഴിയൊരുക്കി. പിന്നീട് 2018-ൽ യു.എസ് പൗരത്വം ലഭിച്ച ശേഷം ഈ വിവാഹബന്ധം വേർപെടുത്തി. എപ്സ്റ്റീന്റെ സ്വത്തുക്കളുടെ മേൽനോട്ടം വഹിക്കാനും കരീന സഹായിച്ചിരുന്നു.
2019 ജൂലൈയിൽ എപ്സ്റ്റീൻ അറസ്റ്റിലായപ്പോൾ ജയിലിൽ നിന്ന് അവസാനമായി വിളിച്ചതും കരീനയെ ആയിരുന്നു. ധൈര്യമായിരിക്കാനും സുരക്ഷിതമായ മറ്റൊരു സ്ഥലത്തേക്ക് മാറാനുമായിരുന്നു ഇയാൾ നൽകിയ നിർദ്ദേശം. പിന്നാലെ എപ്സ്റ്റീനെ ജയിൽ മുറിയിൽ മരിച്ച നിലയിൽ കണ്ടെത്തുകയായിരുന്നു. എപ്സ്റ്റീന്റെ മരണശേഷം ദന്തഡാക്ടറായി ജോലി തുടരുന്ന കരീന 2025-ലാണ് ന്യൂയോർക്കിൽ ലൈസൻസ് നേടി പ്രാക്ടീസ് ആരംഭിച്ചത്.
Story Summary
Belarus-born dentist Dr. Karyna Shuliak could inherit up to $100 million from Jeffrey Epstein’s remaining estate, according to newly released US Justice Department files. The documents detail an eight-year relationship where Epstein funded her education, green card arrangements, and living expenses before amending his will in her favor prior to his 2019 death in jail.
