ജക്കാർത്ത: ഇന്തോനേഷ്യൻ പ്രസിഡന്റ് പ്രബോവോ സുബിയാന്തോയുടെ അഭിമാന പദ്ധതിയായ ‘സൗജന്യ പോഷകാഹാര പദ്ധതി’ വലിയ അഴിമതിയിലേക്കും ക്രമക്കേടുകളിലേക്കും കൂപ്പുകുത്തുന്നതായി റിപ്പോർട്ട് (Indonesia Free Meal Scandal). 15 ബില്യൺ ഡോളർ ചെലവുവരുന്ന ഈ പദ്ധതിയിൽ വൻതോതിലുള്ള സാമ്പത്തിക തിരിമറികളും മാനേജ്മെന്റ് വീഴ്ചകളും കണ്ടെത്തിയതോടെ ഇന്തോനേഷ്യയുടെ സമീപകാലത്തെ ഏറ്റവും വലിയ അഴിമതിയായി ഇത് മാറിക്കഴിഞ്ഞു.
കുട്ടികളിലെ പോഷകാഹാരക്കുറവും വളർച്ചാ മുരടിപ്പും പരിഹരിക്കുക എന്ന ലക്ഷ്യത്തോടെ 2025-ൽ ആരംഭിച്ച പദ്ധതിക്കെതിരെ ഗുരുതരമായ ആരോപണങ്ങളാണ് ഉയരുന്നത്. പദ്ധതിയുടെ നടത്തിപ്പിനായി ചുമതലപ്പെടുത്തിയ നാഷണൽ ന്യൂട്രിഷൻ ഏജൻസിയുടെ തലവനെയും രണ്ട് ഡെപ്യൂട്ടിമാരെയും 56 ദശലക്ഷം ഡോളറിന്റെ അഴിമതി നടത്തിയതിന് ജൂൺ മാസത്തിൽ അധികൃതർ അറസ്റ്റ് ചെയ്തിരുന്നു. സംഭവത്തിൽ ഉന്നത പോലീസ്, സൈനിക ഉദ്യോഗസ്ഥർക്കും പങ്കുള്ളതായി സംശയിക്കുന്നതിനെത്തുടർന്ന് അന്വേഷണം വ്യാപിപ്പിച്ചിരിക്കുകയാണ്.
പദ്ധതിയുടെ ഭാഗമായി രാജ്യത്തുടനീളം 28,000-ഓളം അടുക്കളകൾ സ്ഥാപിച്ചെങ്കിലും, അർഹരായവരിലേക്ക് കാര്യക്ഷമമായി സഹായമെത്തിക്കാൻ അധികൃതർക്ക് കഴിഞ്ഞില്ല. പദ്ധതിയുടെ പകുതിയിലധികം അടുക്കളകളും സാമ്പത്തികമായി മുന്നിട്ടുനിൽക്കുന്ന ജാവ ദ്വീപിലാണ് പ്രവർത്തിക്കുന്നത്. അതേസമയം, പോഷകാഹാരക്കുറവ് ഏറ്റവും രൂക്ഷമായ കിഴക്കൻ പപ്പുവ പോലുള്ള ഒറ്റപ്പെട്ട പ്രദേശങ്ങളിൽ വളരെ കുറച്ചു സൗകര്യങ്ങൾ മാത്രമാണ് ഒരുക്കിയിട്ടുള്ളത്. ഇതോടെ ആവശ്യമില്ലാത്ത സ്ഥലങ്ങളിൽ കൂടുതൽ അടുക്കളകൾ തുറന്ന് വൻതോതിൽ പണം ധൂർത്തടിക്കുന്നുവെന്ന വിമർശനവും ശക്തമായിട്ടുണ്ട്.
ഭക്ഷണത്തിൽ നിന്നുള്ള അണുബാധയെത്തുടർന്ന് 33,000-ഓളം കേസുകൾ റിപ്പോർട്ട് ചെയ്തതും പദ്ധതിയുടെ വിശ്വാസ്യതയെ ബാധിച്ചു. നിലവിലുള്ള സ്കൂൾ കാന്റീനുകൾ ഉപയോഗിക്കാതെ പുതിയ അടുക്കളകൾ സ്ഥാപിച്ചത് അഴിമതി ലക്ഷ്യമിട്ടാണെന്ന ആരോപണവും ഉയർന്നിട്ടുണ്ട്. സാമ്പത്തിക പ്രതിസന്ധിയും അഴിമതി ആരോപണങ്ങളും ശക്തമായതോടെ, പദ്ധതിയുടെ ബജറ്റ് സർക്കാർ വെട്ടിക്കുറയ്ക്കുകയാണ്. എന്നിരുന്നാലും, വിശക്കുന്ന വയറുകൾക്ക് ഭക്ഷണം നൽകുന്നതിനേക്കാൾ അടിയന്തിരമായി മറ്റൊന്നുമില്ലെന്ന് ചൂണ്ടിക്കാട്ടി പ്രസിഡന്റ് പ്രബോവോ പദ്ധതിയെ ന്യായീകരിക്കുന്നത് തുടരുകയാണ്.
Story Summary: Indonesia’s $15bn ‘Free Nutritious Meals’ programme is facing a massive corruption scandal involving high-level officials, procurement fraud, and gross mismanagement. Critics argue the initiative is plagued by waste, with kitchens concentrated in affluent regions while under-serving the most vulnerable areas, alongside thousands of food poisoning incidents.
