കൊൽക്കത്ത: പശ്ചിമ ബംഗാളിലെ സൗത്ത് 24 പർഗാനാസ് ജില്ലയിൽ നിർമ്മാണത്തിലിരിക്കുന്ന ക്രൈസ്തവ ദേവാലയത്തിന് നേരെ ഹിന്ദു ജാഗരൺ മഞ്ച് പ്രവർത്തകരുടെ നേതൃത്വത്തിൽ ആൾക്കൂട്ട ആക്രമണവും വൻ നാശനഷ്ടവും. കൊൽക്കത്തയിൽ നിന്നും 30 കിലോമീറ്റർ അകലെയുള്ള സോനാർപൂർ സുഭാസ്ഗ്രാമിലെ ‘ബുരി ബോട്ട് തോല’ എന്ന സ്ഥലത്താണ് സംഭവം. നൂറോളം പേരടങ്ങുന്ന സംഘം പള്ളിയിലേക്ക് ഇരച്ചുകയറുകയും വൻതോതിൽ അക്രമം അഴിച്ചുവിടുകയുമായിരുന്നു.(Under Construction Church Vandalized By Mob In West Bengal Sonarpur Over Conversion Allegations)
പ്രസ്ബിറ്റീരിയൻ ചർച്ച് ഓഫ് ഇന്ത്യയുടെ കീഴിൽ ഈ വർഷം മാർച്ച് മുതൽ നിർമ്മാണം ആരംഭിച്ച ചെറിയ പള്ളിക്ക് നേരെയാണ് ആക്രമണമുണ്ടായത്. കെട്ടിടത്തിന്റെ പെയിന്റിംഗ് ജോലികൾ നടക്കുകയായിരുന്ന സമയത്ത് എത്തിയ സംഘം, പ്രദേശത്ത് നിർബന്ധിത മതപരിവർത്തനം നടക്കുന്നുണ്ടെന്ന് ആരോപിച്ചായിരുന്നു അക്രമം നടത്തിയത്. പള്ളിയുടെ മരപ്പണികൾ ചെയ്ത വാതിലുകൾ തല്ലിത്തകർക്കുകയും, ഉള്ളിലുണ്ടായിരുന്ന ഗോവണി ഉപയോഗിച്ച് മേൽക്കൂരയിൽ കയറി അവിടെ സ്ഥാപിച്ചിരുന്ന മൂന്ന് കുരിശുകൾ അടിച്ചുതകർക്കുകയും ചെയ്തു. കൂടാതെ മുറ്റത്ത് നിർമ്മിച്ചിരുന്ന രണ്ട് വലിയ തൂണുകളും സംഘം തറയിലിട്ട് തകർത്തു കളഞ്ഞു.
പതിറ്റാണ്ടുകളായി പ്രദേശത്ത് താമസിക്കുന്ന തങ്ങൾ പരമ്പരാഗതമായി ഹിന്ദു ചിഹ്നങ്ങളായ ‘ശാഖ-പോള’, സിന്ദൂരം എന്നിവ ധരിക്കാറുണ്ടെന്നും എന്നാൽ തങ്ങൾ പണം നൽകി ആരെയും മതപരിവർത്തനം നടത്തുന്നില്ലെന്നും പ്രാദേശിക വിശ്വാസികൾ പറഞ്ഞു. സംഭവത്തിൽ സോനാർപൂർ പൊലീസ് കേസ് രജിസ്റ്റർ ചെയ്യുകയും പ്രദേശവാസികളായ മൂന്ന് യുവാക്കളെ കസ്റ്റഡിയിലെടുക്കുകയും ചെയ്തു. എന്നാൽ ഹിന്ദു ജാഗരൺ മഞ്ച് നേതാക്കൾ ഇടപെട്ട് ഇവരെ പിന്നീട് സ്റ്റേഷനിൽ നിന്നും ഇറക്കി. അനധികൃതമായാണ് പള്ളി നിർമ്മിക്കുന്നതെന്നും അതിനെതിരെ തങ്ങൾ മുൻപ് തന്നെ അധികൃതർക്ക് പരാതി നൽകിയിരുന്നു എന്നുമാണ് ഹിന്ദു ജാഗരൺ മഞ്ചിന്റെ വാദം.
സംഭവത്തിൽ ശക്തമായ പ്രതിഷേധവുമായി ക്രൈസ്തവ സംഘടനകൾ രംഗത്തെത്തിയിട്ടുണ്ട്. ബംഗാൾ ക്രിസ്ത്യൻ കൗൺസിൽ പ്രതിനിധികൾ സ്ഥലം സന്ദർശിച്ചു. ജൂലൈ 14-ന് കൊൽക്കത്തയിൽ ശക്തമായ പ്രതിഷേധ റാലി സംഘടിപ്പിക്കുമെന്നും സംസ്ഥാന ഗവർണർക്ക് നേരിട്ട് നിവേദനം സമർപ്പിക്കുമെന്നും ക്രൈസ്തവ സംഘടനാ നേതാക്കൾ അറിയിച്ചു. നിലവിൽ പ്രദേശത്ത് കൂടുതൽ പൊലീസ് സന്നാഹത്തെ വിന്യസിച്ചിട്ടുണ്ട്.
Story Summary
An under-construction Presbyterian church in Sonarpur, West Bengal, was vandalized by a mob of around 100 people allegedly linked to the Hindu Jagran Manch over conversion allegations. The attackers damaged the wooden doors, pulled down pillars, and destroyed three crosses on the roof, drawing sharp protests from Christian outfits who planned a rally on July 14.
