ടെഹ്റാൻ: ഇസ്രായേലും അമേരിക്കയും ചേർന്ന് നടത്തിയ വ്യോമാക്രമണത്തിൽ കൊല്ലപ്പെട്ട ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെയും കുടുംബാംഗങ്ങളുടെയും വിലാപയാത്ര തലസ്ഥാനമായ ടെഹ്റാനിൽ ആരംഭിച്ചു. ഫെബ്രുവരി 28-നാണ് യുദ്ധത്തിന്റെ തുടക്കത്തിൽ ഉണ്ടായ വ്യോമാക്രമണത്തിൽ ഖമേനിയും കുടുംബവും കൊല്ലപ്പെട്ടത്. ഖമേനിയുടെയും കുടുംബത്തിന്റെയും മൃതദേഹങ്ങൾ അടങ്ങിയ പെട്ടികൾ ദേശീയ പതാക പുതപ്പിച്ച് പ്രത്യേക ട്രക്കിലാണ് ടെഹ്റാൻ തെരുവുകളിലൂടെ മെഹ്റാബാദ് അന്താരാഷ്ട്ര വിമാനത്താവളത്തിലേക്ക് കൊണ്ടുപോകുന്നത്.(Ayatollah Ali Khamenei Funeral Procession Starts In Tehran Amid Retaliation Threats)
ഭരണകൂടത്തിന് അനുകൂലമായ ജനപിന്തുണ പ്രകടിപ്പിക്കുന്നതിനായി ദശലക്ഷക്കണക്കിന് ആളുകളെയാണ് വിലാപയാത്രയിൽ പങ്കെടുപ്പിക്കാൻ ഇറാന്റെ അധികാരികൾ ലക്ഷ്യമിടുന്നത്. ഔദ്യോഗിക വിലാപയാത്ര ആരംഭിച്ചതായി ഇറാൻ ഔദ്യോഗിക ടെലിവിഷൻ സ്ഥിരീകരിച്ചു. 86-കാരനായ ഖമേനിയുടെ വിലാപച്ചടങ്ങുകളോട് അനുബന്ധിച്ച് ശനിയാഴ്ച മുതൽ രാജ്യത്ത് കർശന നിയന്ത്രണങ്ങളാണ് ഏർപ്പെടുത്തിയിരിക്കുന്നത്. വ്യാഴാഴ്ച വരെ നീളുന്ന ദുഃഖാചരണത്തിന്റെ ഭാഗമായി പ്രധാന റോഡുകളും വ്യോമാതിർത്തിയും അടച്ചിട്ടിരിക്കുകയാണ്. ഖമേനിയുടെ ജന്മസ്ഥലമായ മഷാദിലെ ഇമാം റെസ മസ്ജിദിലാണ് ഭൗതികശരീരം അടക്കം ചെയ്യുക.
അതേസമയം, ഖമേനിയുടെ മരണത്തിന് പകരമായി യുഎസ് പ്രസിഡന്റ് ഡൊണാൾഡ് ട്രംപിനെയും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനെയും വധിക്കണമെന്ന് വിലാപയാത്രയിൽ പങ്കെടുത്ത ജനക്കൂട്ടം മുദ്രാവാക്യങ്ങളിലൂടെയും പ്ലക്കാർഡുകളിലൂടെയും ആവശ്യപ്പെടുന്നുണ്ട്. പ്രതികാര ഭീഷണികൾക്കിടയിലും ഹോർമുസ് കടലിടുക്ക് പൂർണ്ണമായും തുറക്കുന്നതിനും ഇറാന്റെ ആണവ പദ്ധതികൾ മരവിപ്പിക്കുന്നതിനും യുദ്ധത്തിന് സ്ഥിരമായ അറുതി വരുത്തുന്നതിനുമായി അമേരിക്ക ഇറാനുമായി ചർച്ചകൾക്ക് ശ്രമിക്കുന്നുണ്ട്.
Story Summary
Iran has commenced the funeral procession of the late Supreme Leader Ayatollah Ali Khamenei and his family through Tehran, following their deaths in a US-Israeli airstrike on February 28. Amid massive crowds and heightened security, mourners have openly called for the assassination of US President Donald Trump and Israeli PM Benjamin Netanyahu to avenge the deaths.
