മേപ്പാടി: വയനാട് കള്ളാടിയിൽ വൻ മണ്ണിടിച്ചിലും ഉരുൾപൊട്ടലുമുണ്ടായ പ്രദേശത്ത് വീണ്ടും കനത്ത മഴ പെയ്യുന്നത് രക്ഷാപ്രവർത്തനത്തിന് കനത്ത പ്രതിസന്ധി സൃഷ്ടിക്കുന്നു. സുരക്ഷ മുൻനിർത്തി ദുരന്തബാധിത മേഖലയിൽ നിന്നും ആളുകളെ അടിയന്തരമായി സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു തുടങ്ങി. മൺകൂന ശക്തമായ മഴയിൽ കുത്തിയൊലിച്ച് താഴേക്ക് നിരങ്ങി വന്നതാണ് ദുരന്തത്തിന്റെ ആക്കം കൂട്ടിയത്.(Wayanad Kalladi Landslide Buses Trapped House Mosque Destroyed Heavy Rain)
അപകടത്തിൽ പ്രദേശത്തെ ഒരു വീടും പള്ളിയും പൂർണ്ണമായും തകർന്നു. കള്ളാടിയിലെ ബസ് സ്റ്റോപ്പും മീനാക്ഷി പാലവും പൂർണ്ണമായി മണ്ണിനടിയിലായിരിക്കുകയാണ്. അപകടസമയത്ത് നിർമ്മാണ കമ്പനിയുടെ ക്യാബിനുള്ളിൽ 15-ഓളം ജീവനക്കാർ ഉണ്ടായിരുന്നു എന്നാണ് ഒടുവിൽ ലഭിക്കുന്ന വിവരം. ഇതിന് പുറമെ പ്രദേശത്ത് തട്ടുകട നടത്തിയിരുന്ന ഒരു കുടുംബവും മണ്ണിനടിയിൽ പെട്ടിട്ടുണ്ടോ എന്ന് സംശയമുണ്ട്. തൊഴിലാളികളുമായി എത്തിയ രണ്ട് ബസുകൾ പൂർണ്ണമായും മൺകൂനയ്ക്കടിയിലാണ്. അതേസമയം, വയനാടും കോഴിക്കോടും റെഡ് അലർട്ട് പ്രഖ്യാപിച്ചിട്ടുണ്ട്.
മണ്ണിനടിയിൽ നിന്നും രക്ഷപ്പെടുത്തിയ 6 അതിഥി തൊഴിലാളികളെ ആശുപത്രിയിൽ പ്രവേശിപ്പിച്ചു. ഇതിൽ ഒരാളുടെ നില ഗുരുതരമാണ്. ഇനിയും നിരവധി പേർ മൺകൂനയ്ക്കടിയിൽ കുടുങ്ങിക്കിടക്കുന്നുണ്ടെന്നാണ് ആശങ്ക. ദുരന്തത്തിന്റെ പശ്ചാത്തലത്തിൽ സ്ഥിതിഗതികൾ വിലയിരുത്താൻ മുഖ്യമന്ത്രി വി.ഡി. സതീശൻ റവന്യൂ, കൃഷി മന്ത്രിമാരോട് അടിയന്തരമായി വയനാട്ടിലെത്താൻ നിർദേശം നൽകി. ജില്ലയിൽ നിന്നുള്ള മന്ത്രി ടി. സിദ്ദിഖുമായി മുഖ്യമന്ത്രി തിരുവനന്തപുരത്ത് അടിയന്തര കൂടിക്കാഴ്ച നടത്തി. കോഴിക്കോട് നിന്നുള്ള എൻ.ഡി.ആർ.എഫ് സംഘത്തോടും അടിയന്തരമായി വയനാട്ടിലേക്ക് തിരിക്കാൻ നിർദേശിച്ചിട്ടുണ്ട്. വയനാട് ജില്ലാ കളക്ടറുമായി ഫോണിൽ സംസാരിച്ച മുഖ്യമന്ത്രി രക്ഷാപ്രവർത്തനം യുദ്ധകാലാടിസ്ഥാനത്തിൽ ഏകോപിപ്പിക്കാൻ നിർദേശം നൽകി.
Story Summary
A massive landslide near the Kalladi tunnel project in Wayanad has destroyed a house and a mosque, leaving a bus stop and a bridge completely buried. Two buses carrying workers are trapped under the debris, and around 15 workers were reportedly inside a cabin during the incident. Six migrant laborers have been shifted to Meppadi WIMS hospital, with one in critical condition. Heavy rains are hampering rescue operations as Chief Minister VD Satheesan directed ministers and NDRF teams to rush to the spot.
