ന്യൂഡൽഹി: കേരളത്തിന്റെ അടുത്ത മുഖ്യമന്ത്രിയെ തീരുമാനിക്കാനുള്ള നിർണ്ണായക ചർച്ചകൾ ഡൽഹിയിൽ പുരോഗമിക്കുന്നു (Kerala CM Candidate 2026). സമവായമുണ്ടാകുമെന്നും എഐസിസി ഉടൻ പ്രഖ്യാപനം നടത്തുമെന്നും കെപിസിസി അധ്യക്ഷൻ സണ്ണി ജോസഫ് അറിയിച്ചു. പരസ്യമായ പ്രതിഷേധങ്ങൾ ഒഴിവാക്കണമെന്ന് ഹൈക്കമാൻഡ് നേതാക്കൾക്ക് കർശന നിർദ്ദേശം നൽകിയിട്ടുണ്ട്.
കോൺഗ്രസ് അധ്യക്ഷൻ മല്ലികാർജുൻ ഖാർഗെ ഇന്ന് വൈകുന്നേരം നേതാക്കളുമായി കൂടിക്കാഴ്ച നടത്തും. വി.ഡി. സതീശൻ, രമേശ് ചെന്നിത്തല, കെ.സി. വേണുഗോപാൽ എന്നിവരുടെ നിലപാടുകൾ അദ്ദേഹം നേരിട്ട് ചോദിച്ചറിയും. അതേസമയം , മുഖ്യമന്ത്രി സ്ഥാനത്തേക്ക് 99 ശതമാനം സാധ്യതയും കെ.സി വേണുഗോപാലിനാണെന്നാണ് അദ്ദേഹത്തെ അനുകൂലിക്കുന്നവരുടെ അവകാശവാദം. എംഎൽഎമാരുടെ ഭൂരിപക്ഷ പിന്തുണ തങ്ങൾക്കാണെന്നും ഉപതിരഞ്ഞെടുപ്പ് വെല്ലുവിളിയാകില്ലെന്നും ഇവർ ഹൈക്കമാൻഡിനെ അറിയിച്ചു.
മുഖ്യമന്ത്രി പദവി ലഭിച്ചില്ലെങ്കിൽ മന്ത്രിസഭയിലേക്കില്ലെന്ന കടുത്ത നിലപാടിലാണ് വി.ഡി. സതീശൻ. ഘടകകക്ഷികളുടെ പിന്തുണ തനിക്കാണെന്നും എംഎൽഎമാരുടെ എണ്ണം മാത്രം നോക്കി തീരുമാനമെടുക്കരുതെന്നും അദ്ദേഹം ആവശ്യപ്പെടും. സീനിയോറിറ്റി പരിഗണിക്കണമെന്നാണ് ചെന്നിത്തലയുടെ ആവശ്യം. പാർട്ടി അച്ചടക്കം പാലിച്ച് തീരുമാനത്തിനായി കാത്തിരിക്കുകയാണെന്നും ആളെക്കൂട്ടി പ്രകടനം നടത്താൻ തങ്ങൾ മുതിർന്നില്ലെന്നും ചെന്നിത്തല പക്ഷം ചൂണ്ടിക്കാട്ടുന്നു.
ഫ്ലക്സ് ബോർഡുകൾ കീറിയ സംഭവവും നിരീക്ഷകർക്കെതിരെ പ്രചാരണം നടത്തിയെന്ന പരാതിയും ഗ്രൂപ്പുകൾ പരസ്പരം ആയുധമാക്കുന്നുണ്ട്. മല്ലികാർജുൻ ഖാർഗെ സമർപ്പിക്കുന്ന റിപ്പോർട്ടിന്റെ അടിസ്ഥാനത്തിൽ ഹൈക്കമാൻഡ് ആത്യന്തിക തീരുമാനം കൈക്കൊള്ളും.
Story Summary: The race for Kerala’s Chief Minister post has shifted to Delhi, with KPCC President Sunny Joseph stating that the AICC will make the final announcement soon. Mallikarjun Kharge is set to meet key contenders K.C. Venugopal, V.D. Satheesan, and Ramesh Chennithala. While the KC faction claims majority MLA support, Satheesan relies on the backing of allied parties, and Chennithala seeks consideration based on seniority. High command has strictly warned against public protests.
