മുംബൈ: ഇന്ത്യൻ ട്വന്റി20 ക്രിക്കറ്റ് ടീമിന്റെ ഭാവി ക്യാപ്റ്റൻസി സ്ഥാനത്തേക്ക് മലയാളി താരം സഞ്ജു സാംസൺ അനുയോജ്യനാണെന്ന് മുൻ ഇന്ത്യൻ പരിശീലകനും മുൻ ഓൾറൗണ്ടറുമായ രവി ശാസ്ത്രി (Sanju Samson India T20 Captaincy). ഐസിസി റിവ്യൂവിൽ സഞ്ജന ഗണേശനുമായി നടത്തിയ സംഭാഷണത്തിലാണ് സഞ്ജുവിന്റെ ക്യാപ്റ്റൻസി മികവിനെയും ബാറ്റിങ്ങിലെ പുതിയ സ്ഥിരതയെയും ശാസ്ത്രി പ്രശംസിച്ചത്. സൂര്യകുമാർ യാദവിന്റെ നേതൃത്വത്തിൽ രണ്ട് മാസം മുൻപ് ഇന്ത്യ ടി20 ലോകകപ്പ് സ്വന്തമാക്കിയിരുന്നെങ്കിലും, 2028-ലെ അടുത്ത ലോകകപ്പ് ലക്ഷ്യമിട്ട് പുതിയൊരു ക്യാപ്റ്റനെ ഇന്ത്യ തിരയുമ്പോൾ സഞ്ജു സാംസൺ ആ സ്ഥാനത്തേക്ക് ഏറ്റവും യോഗ്യനാണെന്ന് അദ്ദേഹം വ്യക്തമാക്കി. ഐപിഎല്ലിൽ രാജസ്ഥാൻ റോയൽസിനെ അഞ്ച് സീസണുകളിൽ നയിച്ചുള്ള സഞ്ജുവിന്റെ പരിചയസമ്പത്ത് ഇതിന് തുണയാകുമെന്നും ശാസ്ത്രി കൂട്ടിച്ചേർത്തു.
ഇന്ത്യൻ ജയങ്ങളിൽ നിർണ്ണായക പങ്കുവഹിച്ച സഞ്ജു സാംസൺ ആയിരുന്നു കഴിഞ്ഞ ടി20 ലോകകപ്പിലെ ‘പ്ലെയർ ഓഫ് ദി ടൂർണമെന്റ്’. സൂപ്പർ എട്ടിലെ വെസ്റ്റ് ഇൻഡീസിനെതിരെയുള്ള മത്സരം മുതൽ ന്യൂസിലാൻഡിന് എതിരെയുള്ള ഫൈനൽ വരെ തുടർച്ചയായി മൂന്ന് അർധസെഞ്ചുറികൾ ഉൾപ്പെടെ അഞ്ച് ഇന്നിങ്സുകളിൽ നിന്ന് 321 റൺസാണ് താരം അടിച്ചുകൂട്ടിയത്. നിലവിൽ ഐപിഎല്ലിൽ ചെന്നൈ സൂപ്പർ കിങ്സിന് വേണ്ടി കളിക്കുന്ന സഞ്ജു തകർപ്പൻ ഫോമിലാണ്. ഈ സീസണിൽ 11 ഇന്നിങ്സുകളിൽ നിന്ന് രണ്ട് സെഞ്ചുറികളും ഒരു അർധസെഞ്ചുറിയും ഉൾപ്പെടെ 169.29 സ്ട്രൈക്ക് റേറ്റിൽ 430 റൺസ് താരം നേടിക്കഴിഞ്ഞു. 2026-ൽ മൊത്തം 21 ടി20 ഇന്നിങ്സുകളിൽ നിന്നായി 797 റൺസാണ് സഞ്ജുവിന്റെ സമ്പാദ്യം.
മുൻകാലങ്ങളിൽ സഞ്ജുവിന്റെ ബാറ്റിങ്ങിലെ സ്ഥിരതയില്ലായ്മയെക്കുറിച്ച് വിമർശനങ്ങൾ ഉയർന്നിരുന്നെങ്കിലും, ഇപ്പോഴത്തെ പ്രകടനത്തോടെ താരം ആ ചോദ്യചിഹ്നങ്ങളെയെല്ലാം കാറ്റിൽപ്പറത്തിയെന്ന് രവി ശാസ്ത്രി നിരീക്ഷിച്ചു. സഞ്ജുവിന്റെ പ്രതിഭയെക്കുറിച്ച് ആർക്കും സംശയമുണ്ടായിരുന്നില്ലെന്നും എന്നാൽ ഇപ്പോൾ ബാറ്റിങ്ങിൽ കാണിക്കുന്ന പക്വതയും ലോകകപ്പിലെയും ഐപിഎല്ലിലെയും മികച്ച പ്രകടനങ്ങളും ഭാവിയിൽ ഇന്ത്യൻ ടീമിനെ നയിക്കാനുള്ള അദ്ദേഹത്തിന്റെ അർഹത അടിവരയിട്ടുറപ്പിക്കുന്നതാണെന്നും ശാസ്ത്രി പറഞ്ഞു. ശ്രേയസ് അയ്യരുമായുള്ള ക്യാപ്റ്റൻസി ചർച്ചകൾക്കിടയിലാണ് സഞ്ജുവിനെ പൂർണ്ണമായി പിന്തുണച്ച് മുൻ പരിശീലകൻ രംഗത്തെത്തിയത്.
Summary: Former Indian head coach Ravi Shastri strongly backed Sanju Samson as a top contender for India’s future T20I captaincy. Speaking to The ICC Review, Shastri highlighted Samson’s extensive leadership experience with Rajasthan Royals and his phenomenal form as the ‘Player of the Tournament’ in India’s recent 2026 T20 World Cup victory. Currently driving Chennai Super Kings’ batting line-up in the IPL with 430 runs in 11 innings, Samson has silenced critics regarding his consistency, displaying a newfound maturity that makes him a clear leadership choice for the 2028 cycle.
