തിരുവനന്തപുരം: നിയമസഭാ തിരഞ്ഞെടുപ്പിൽ വൻ ഭൂരിപക്ഷത്തോടെ അധികാരത്തിലേറുന്ന പുതിയ കോൺഗ്രസ് മന്ത്രിസഭയുടെ മുഖ്യമന്ത്രിയായി വി.ഡി സതീശനെ പ്രഖ്യാപിച്ചതിന് പിന്നാലെ സോഷ്യൽ മീഡിയയിൽ ഉയർന്ന സൈബർ ആക്രമണങ്ങൾക്കെതിരെ രമേശ് ചെന്നിത്തലയ്ക്ക് പിന്തുണയുമായി നടനും സംവിധായകനുമായ സന്തോഷ് പണ്ഡിറ്റ്. ഏറെ നാളത്തെ ചർച്ചകൾക്കൊടുവിൽ 102 സീറ്റുകളുടെ തിളക്കമാർന്ന വിജയവുമായി വി.ഡി സതീശൻ തിങ്കളാഴ്ച സത്യപ്രതിജ്ഞ ചെയ്ത് അധികാരമേൽക്കാൻ ഒരുങ്ങുമ്പോൾ, മുഖ്യമന്ത്രി സ്ഥാനാർത്ഥിയായി പരിഗണിക്കപ്പെട്ടിരുന്ന രമേശ് ചെന്നിത്തലയെ പരിഹസിച്ചുകൊണ്ട് ചില കോണുകളിൽ നിന്ന് ട്രോളുകളും കമന്റുകളും ഉയർന്നിരുന്നു. ഇതിന് മറുപടിയെന്നോണമാണ് സന്തോഷ് പണ്ഡിറ്റ് തന്റെ ഫേസ്ബുക്ക് കുറിപ്പിലൂടെ ചെന്നിത്തലയെ ശക്തമായി പിന്തുണച്ച് രംഗത്തെത്തിയത്.(Santhosh Pandit Extends Strong Support To Ramesh Chennithala Against Social Media Trolling)
രമേശ് ചെന്നിത്തലയെ ഏറ്റവും സീനിയറും സൗമ്യനും കഴിവുള്ളതുമായ ഒരു ജനനായകനായാണ് സന്തോഷ് പണ്ഡിറ്റ് വിശേഷിപ്പിക്കുന്നത്. തന്റെ രാഷ്ട്രീയ കരിയറിൽ ഇന്നുവരെ ഒരു മോശം റിമാർക്ക് പോലുമില്ലാത്ത നേതാവാണ് അദ്ദേഹം. പല നേതാക്കളും സ്ഥാനമാനങ്ങൾക്കായി ബഹളം വെക്കുമ്പോൾ ചെന്നിത്തല ഒരിക്കലും അതിനായി ശ്രമിച്ചിട്ടില്ലെന്നും കരിയറിൽ ഒരിക്കൽ പോലും അദ്ദേഹം പി.ആർ (PR) വർക്കുകളെ ആശ്രയിച്ചിട്ടില്ലെന്നും സന്തോഷ് പണ്ഡിറ്റ് ചൂണ്ടിക്കാട്ടി.
ഇന്നത്തെ തലമുറയിലെ ചില ‘ന്യൂജെൻ പാൽക്കുപ്പികൾ’ ചെന്നിത്തലയുടെ രാഷ്ട്രീയ പാരമ്പര്യം മനസ്സിലാക്കണമെന്ന കടുത്ത വിമർശനവും പണ്ഡിറ്റ് ഉന്നയിക്കുന്നുണ്ട്. ഏതാണ്ട് 40 വർഷങ്ങൾക്ക് മുൻപ് തന്നെ മന്ത്രി പദവിയിലെത്തിയ വ്യക്തിയാണ് രമേശ് ചെന്നിത്തല. കേരളത്തിലെ എത്രയോ കോൺഗ്രസ് മുഖ്യമന്ത്രിമാരുടെ കൂടെ കട്ടയ്ക്ക് നിന്ന് പ്രവർത്തിച്ച ജനനായകനാണ് അദ്ദേഹം. കഴിഞ്ഞ നിയമസഭയിൽ മികച്ചൊരു പ്രതിപക്ഷ നേതാവ് എന്ന പേര് ഉണ്ടാക്കിയെടുക്കാനും അദ്ദേഹത്തിന് സാധിച്ചിട്ടുണ്ടെന്ന് കുറിപ്പിൽ ഓർമ്മിപ്പിക്കുന്നു.
“പാർട്ടി നിങ്ങളെ മുഖ്യമന്ത്രി ആക്കിയാലും ഇല്ലെങ്കിലും നിങ്ങൾ എന്നും ലക്ഷങ്ങളുടെ മനസ്സിൽ ഗ്രേറ്റ് ലീഡർ തന്നെയാണ്” എന്ന് പറഞ്ഞുകൊണ്ടാണ് സന്തോഷ് പണ്ഡിറ്റ് തന്റെ പോസ്റ്റ് അവസാനിപ്പിക്കുന്നത്. വി.ഡി സതീശന്റെ കടന്നുവരവോടെ കോൺഗ്രസിനുള്ളിൽ ചർച്ചകൾ സജീവമാകുന്നതിനിടെ സോഷ്യൽ മീഡിയയിൽ വൈറലായ ഈ കുറിപ്പ് രാഷ്ട്രീയ കേന്ദ്രങ്ങളിലും വലിയ ശ്രദ്ധ നേടിയിട്ടുണ്ട്.
Story Summary
Actor Santhosh Pandit came out in support of senior Congress leader Ramesh Chennithala amid social media trolling following VD Satheesan’s designation as Chief Minister. Pandit praised Chennithala’s 40-year political legacy, labeling him a clean leader who never relied on PR campaigns or created noise for power.
