ബാഴ്സലോണ: ഇംഗ്ലണ്ട് ദേശീയ ടീമിന്റെ പ്രമുഖ വിങ്ങർ ആന്റണി ഗോർഡനെ സ്പാനിഷ് വമ്പന്മാരായ എഫ്.സി ബാഴ്സലോണ സ്വന്തമാക്കി (Anthony Gordon Barcelona Transfer). ഇംഗ്ലീഷ് പ്രീമിയർ ലീഗ് ക്ലബ്ബായ ന്യൂകാസിൽ യുണൈറ്റഡിൽ നിന്നുമാണ് ഇരുപത്തഞ്ചുകാരനായ ഗോർഡനെ അഞ്ച് വർഷത്തെ കരാറിൽ ബാഴ്സലോണ തങ്ങളുടെ ക്യാമ്പിലെത്തിച്ചത്. ഔദ്യോഗികമായി തുക പുറത്തുവിട്ടിട്ടില്ലെങ്കിലും ഏകദേശം 80 മില്യൺ യൂറോയും (ഏകദേശം 93.29 മില്യൺ ഡോളർ) മറ്റ് ആഡ്-ഓണുകളും അടങ്ങുന്ന വൻ തുകയ്ക്കാണ് ഈ ട്രാൻസ്ഫർ നടന്നതെന്ന് ബ്രിട്ടീഷ് മാധ്യമങ്ങൾ റിപ്പോർട്ട് ചെയ്യുന്നു. ബാഴ്സലോണയിൽ കളിക്കുക എന്നത് തന്റെ കുട്ടിക്കാലം മുതലുള്ള സ്വപ്നമായിരുന്നുവെന്ന് ക്ലബ്ബിന്റെ ഔദ്യോഗിക അവതരണ ചടങ്ങിൽ ഗോർഡൻ മാധ്യമങ്ങളോട് പറഞ്ഞു. മാധ്യമപ്രവർത്തകരെ അത്ഭുതപ്പെടുത്തിക്കൊണ്ട് സ്പാനിഷ് ഭാഷയിലാണ് താരം വാർത്താസമ്മേളനത്തിൽ സംസാരിച്ചത്. കുട്ടിക്കാലം തൊട്ടേ ബാഴ്സയിൽ കളിക്കുമെന്ന് ഉറപ്പായിരുന്നതിനാൽ താൻ മുൻകൂട്ടി സ്പാനിഷ് ഭാഷ പഠിച്ചിരുന്നുവെന്നും ഗോർഡൻ വെളിപ്പെടുത്തി.
കഴിഞ്ഞ സീസണിൽ ന്യൂകാസിൽ യുണൈറ്റഡിനായി ചാമ്പ്യൻസ് ലീഗിലെ 12 മത്സരങ്ങളിൽ നിന്ന് 10 ഗോളുകൾ ഉൾപ്പെടെ ആകെ 17 ഗോളുകൾ നേടി ഗോർഡൻ മികച്ച പ്രകടനമാണ് കാഴ്ചവെച്ചത്. ചാമ്പ്യൻസ് ലീഗിൽ ബാഴ്സലോണയ്ക്കെതിരെ താരം നടത്തിയ മികച്ച പ്രകടനങ്ങളാണ് സ്പാനിഷ് ക്ലബ്ബിനെ ഗോർഡനിലേക്ക് ആകർഷിച്ചത്. നിലവിൽ ഇംഗ്ലണ്ടിന്റെ ലോകകപ്പ് സ്ക്വാഡിലും അംഗമാണ് ഈ താരം. ബാഴ്സലോണയിൽ ലാമിൻ യമാൽ അടക്കമുള്ള ലോകോത്തര താരങ്ങൾക്കൊപ്പം കളിക്കാൻ സാധിക്കുന്നതിൽ വലിയ ആവേശമുണ്ടെന്നും ഗോർഡൻ കൂട്ടിച്ചേർത്തു. 2023 ജനുവരിയിൽ എവർട്ടണിൽ നിന്നും ന്യൂകാസിലിൽ എത്തിയ ഗോർഡൻ അവർക്കായി 152 മത്സരങ്ങളിൽ നിന്ന് 39 ഗോളുകളും 28 അസിസ്റ്റുകളും നേടിയിട്ടുണ്ട്. കഴിഞ്ഞ വർഷം ന്യൂകാസിലിന് ലീഗ് കപ്പ് കിരീടം നേടിക്കൊടുക്കുന്നതിലും താരം പ്രധാന പങ്കുവഹിച്ചു. മറ്റൊരു ഇംഗ്ലണ്ട് താരം മാർക്കസ് റാഷ്ഫോർഡും നിലവിൽ ലോണിൽ ബാഴ്സലോണയിലുണ്ട്.
Summary: Spanish champions Barcelona have signed England winger Anthony Gordon from Newcastle United on a five-year contract for an estimated initial fee of 80 million euros. The 25-year-old top scorer for Newcastle last season expressed his excitement about fulfilling his childhood dream and playing alongside stars like Lamine Yamal. Gordon, who surprised journalists by speaking fluent Spanish during his unveiling, is also a part of England’s upcoming World Cup squad.
