തിരുവനന്തപുരം: സംസ്ഥാനത്ത് കാലവർഷം ഉടൻ എത്തുമെന്ന് കേന്ദ്ര കാലാവസ്ഥാ വകുപ്പ്. അടുത്ത അഞ്ച് ദിവസത്തിനുള്ളിൽ തെക്കുപടിഞ്ഞാറൻ കാലവർഷം കേരളത്തിൽ പ്രവേശിക്കാൻ അനുകൂല സാഹചര്യമാണുള്ളതെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ജൂൺ മൂന്നുവരെ കേരളത്തിലും മാഹിയിലും ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്നും മുന്നറിയിപ്പിൽ പറയുന്നു.(Monsoon Expected To Reach Kerala In Five Days According To IMD Forecast)
കാലവർഷം ലക്ഷദ്വീപ്, കന്യാകുമാരി, ബംഗാൾ ഉൾക്കടലിന്റെ ഭൂരിഭാഗം മേഖലകൾ എന്നിവിടങ്ങളിലേക്ക് ഇതിനകം വ്യാപിച്ചുകഴിഞ്ഞു. അറബിക്കടലിലും ബംഗാൾ ഉൾക്കടലിലുമായി നിലനിൽക്കുന്ന വിവിധ ചക്രവാതച്ചുഴികളാണ് കാലവർഷം വേഗത്തിലാകാൻ കാരണം. മധ്യ-കിഴക്കൻ ബംഗാൾ ഉൾക്കടൽ, തെക്കുകിഴക്കൻ അറബിക്കടൽ, തെക്കുപടിഞ്ഞാറൻ അറബിക്കടൽ എന്നിവിടങ്ങളിൽ നിലവിൽ ചക്രവാതച്ചുഴികൾ സജീവമാണ്.
ബംഗാൾ ഉൾക്കടലിലെ ചക്രവാതച്ചുഴിയിൽ തുടങ്ങി കന്യാകുമാരി വഴി ലക്ഷദ്വീപ് വരെ നീളുന്ന ഒരു ന്യൂനമർദ്ദ പാത്തി സമുദ്രനിരപ്പിൽ നിന്ന് 5.8 കിലോമീറ്റർ ഉയരത്തിൽ സ്ഥിതി ചെയ്യുന്നുണ്ട്. ഇത് മഴ ശക്തിപ്പെടാൻ കാരണമാകും. ഈ പ്രതിഭാസങ്ങളുടെ ഫലമായി വരും ദിവസങ്ങളിൽ സംസ്ഥാനത്തുടനീളം കാലവർഷം കൂടുതൽ സജീവമാകും. മുന്നറിയിപ്പിന്റെ അടിസ്ഥാനത്തിൽ തീരദേശങ്ങളിലും മലയോര മേഖലകളിലും ജാഗ്രത പാലിക്കാൻ അധികൃതർ നിർദ്ദേശം നൽകി.
Story Summary
The India Meteorological Department (IMD) has announced that the southwest monsoon is expected to reach Kerala within the next five days. Supported by active cyclonic circulations and a trough extending across the Bay of Bengal and Arabian Sea, the state is likely to witness widespread isolated heavy rainfall until June 3.
