കൊൽക്കത്ത: പശ്ചിമ ബംഗാൾ നിയമസഭാ തിരഞ്ഞെടുപ്പിലെ കടുത്ത പരാജയത്തിന് പിന്നാലെ ഭരണകക്ഷിയായ തൃണമൂൽ കോൺഗ്രസിൽ മമത ബാനർജിക്കെതിരെ വൻ വിമത നീക്കം (Trinamool Congress Mutiny). പ്രതിപക്ഷ നേതാവിനെ തെരഞ്ഞെടുക്കുന്നതുമായി ബന്ധപ്പെട്ട തർക്കമാണ് പാർട്ടിയെ കൂട്ടത്തകർച്ചയിലേക്ക് നയിച്ചിരിക്കുന്നത്. പാർട്ടിയിലുണ്ടായിരുന്ന 80 എംഎൽഎമാരിൽ ഭൂരിഭാഗവും നിലവിൽ മമത ബാനർജിക്കെതിരെ രംഗത്തുവന്നതായാണ് റിപ്പോർട്ടുകൾ. പാർട്ടിയിൽ നിന്നും പുറത്താക്കപ്പെട്ട ഋതബ്രത ബാനർജിയെ പ്രതിപക്ഷ നേതാവാക്കാൻ ഒരു വിഭാഗം എംഎൽഎമാർ ഒപ്പുവെച്ചതോടെയാണ് തർക്കം തെരുവിലേക്ക് നീണ്ടത്. തങ്ങൾ ഇപ്പോഴും ‘ദീദി’യെ ബഹുമാനിക്കുന്നുണ്ടെങ്കിലും കലിഘട്ടിലെ (മമതയുടെ വസതി) നേതൃത്വവുമായി സുരക്ഷിതമായ അകലം പാലിക്കാൻ ആഗ്രഹിക്കുന്നുവെന്നാണ് വിമത എംഎൽഎമാർ വ്യക്തമാക്കുന്നത്.
സംസ്ഥാനത്തെ മാറിയ രാഷ്ട്രീയ സാഹചര്യവും തൃണമൂലിനെതിരെയുള്ള ജനരോഷവുമാണ് എംഎൽഎമാരെ പാർട്ടി നേതൃത്വത്തിൽ നിന്നും അകറ്റുന്നത്. അടുത്തിടെ പാർട്ടിയുടെ നാഷണൽ ജനറൽ സെക്രട്ടറി അഭിഷേക് ബാനർജിക്ക് നേരെ ദക്ഷിണ 24 പർഗാനാസിൽ വെച്ച് ജനങ്ങൾ ചെരിപ്പും കല്ലും കോഴിമുട്ടയും എറിഞ്ഞ് അക്രമിച്ച സംഭവം തങ്ങളുടെ സുരക്ഷയെക്കുറിച്ചുള്ള ഭയം വർദ്ധിപ്പിച്ചതായി എംഎൽഎമാർ സമ്മതിക്കുന്നു. വ്യാജ ഒപ്പിട്ടതുമായി ബന്ധപ്പെട്ട് പുതിയ എംഎൽഎമാരുടെ വീടുകളിൽ സിഐഡി പരിശോധന നടത്തുന്നതും, മമതയുടെ വിശ്വസ്തനും മുൻ മന്ത്രിയുമായ ജാവേദ് ഖാൻ ഉൾപ്പെടെയുള്ള മുതിർന്ന നേതാക്കളുടെ അനധികൃത സ്വത്തുക്കൾക്കെതിരെ നഗരവികസന മന്ത്രി അഗ്നിമിത്ര പോൾ ബുൾഡോസർ നടപടിയുമായി രംഗത്തുവന്നതും പാർട്ടിക്കുള്ളിലെ ഭീതി വർദ്ധിപ്പിച്ചിട്ടുണ്ട്. പ്രതിസന്ധി ഘട്ടങ്ങളിൽ അണികളെ സംരക്ഷിക്കാൻ നേതൃത്വം മുന്നോട്ടുവരുന്നില്ലെന്ന ആക്ഷേപവും ശക്തമാണ്. തർക്കങ്ങൾക്കിടയിലും സംഘടനയിൽ ഭേദഗതി വരുത്തി ചന്ദ്രിമ ഭട്ടാചാര്യയെ പുതിയ സംസ്ഥാന പ്രസിഡന്റായും ഡെറക് ഒബ്രയൻ, ഡോള സെൻ എന്നിവരെ നാഷണൽ ജോയിന്റ് സെക്രട്ടറിമാരായും മമത നിയമിച്ചിട്ടുണ്ടെങ്കിലും അസംതൃപ്തി പുകയുകയാണ്.
Summary: The Trinamool Congress (TMC) is facing an unprecedented internal mutiny following its West Bengal Assembly election debacle, as a majority of its 80 MLAs have distanced themselves from party supremo Mamata Banerjee. The revolt, triggered by a dispute over the Leader of the Opposition post and an alleged signature scandal endorsing expelled leader Ritabrata Banerjee, has left the party in an all-out meltdown.
