ന്യൂഡൽഹി: പെട്രോളിൽ 20 ശതമാനം എഥനോൾ ചേർത്ത ‘E20’ ഇന്ധനം ഉപയോഗിക്കുന്നത് കാരണം രാജ്യത്ത് ഏതെങ്കിലും ഒരു കാറിന് കേടുപാടുകൾ സംഭവിച്ചിട്ടുണ്ടോ എന്ന് കേന്ദ്രമന്ത്രി നിതിൻ ഗഡ്കരി. ഇത്തരത്തിൽ ഇന്ധനം ഉപയോഗിച്ച് തകരാറിലായ ഒരൊറ്റ കാറിന്റെ പേര് പറയാൻ വിമർശകരെ വെല്ലുവിളിച്ച കേന്ദ്ര ഉപരിതല ഗതാഗത മന്ത്രി, എഥനോൾ മിശ്രിതത്തിനെതിരെ നടക്കുന്നത് വ്യാജപ്രചാരണങ്ങളാണെന്നും കുറ്റപ്പെടുത്തി.(Nitin Gadkari Challenges Critics Name One Car Damaged By E20 Ethanol Petrol)
ഡൽഹിയിൽ നടന്ന ‘വികസിത് ഭാരത് കോൺക്ലേവിൽ’ സംസാരിക്കുകയായിരുന്നു അദ്ദേഹം. എഥനോൾ ചേർത്ത പെട്രോൾ ഉപയോഗിക്കുന്നത് വഴി വാഹനങ്ങളുടെ മൈലേജ് കുറയുന്നുണ്ടെന്നും, പ്രത്യേകിച്ചും 2023-ന് മുൻപിറങ്ങിയ പഴയ വാഹനങ്ങളുടെ എഞ്ചിനുകളെ ഇത് ദോഷകരമായി ബാധിക്കുന്നുണ്ടെന്നുമുള്ള ചർച്ചകൾ രാജ്യത്ത് ശക്തമാകുന്നതിനിടയിലാണ് മന്ത്രിയുടെ ഈ ശക്തമായ പ്രതിരോധം.
“E20 പെട്രോൾ ഉപയോഗിച്ചതുകൊണ്ട് ഇന്ത്യയിൽ ഏതെങ്കിലും ഒരു കാറിന് എഞ്ചിൻ തകരാറോ മറ്റ് പ്രശ്നങ്ങളോ നേരിട്ടിട്ടുണ്ടോ? ഉണ്ടെങ്കിൽ ഒരൊറ്റ കാറിന്റെ പേര് വ്യക്തമാക്കൂ. ഉയർന്ന തോതിൽ എഥനോൾ ചേർത്ത പെട്രോൾ വിതരണം ചെയ്യുന്നതിനെതിരെ രാജ്യത്ത് തെറ്റായ നരേഷനുകൾ പടച്ചുവിടുകയാണ്. ഇന്ധന ഇറക്കുമതിക്കായി ഇന്ത്യ പ്രതിവർഷം 22 ലക്ഷം കോടി രൂപയാണ് ചിലവഴിക്കുന്നത്. ഈ ഭീമമായ സാമ്പത്തിക ബാധ്യതയും പരിസ്ഥിതി മലിനീകരണവും കുറയ്ക്കാൻ ബദൽ ഇന്ധനങ്ങൾ അത്യന്താപേക്ഷിതമാണ്. കരിമ്പ്, ചോളം, നെല്ല് എന്നിവയിൽ നിന്നാണ് എഥനോൾ ഉത്പാദിപ്പിക്കുന്നത്. ചോളത്തിൽ നിന്ന് എഥനോൾ നിർമ്മിക്കാൻ തുടങ്ങിയതോടെ വിപണിയിൽ ചോളത്തിന്റെ വില ക്വിന്റലിന് 1200 രൂപയിൽ നിന്നും 2800 രൂപയായി ഉയർന്നു. ഉത്തർപ്രദേശ്, ബിഹാർ തുടങ്ങിയ സംസ്ഥാനങ്ങളിലെ കർഷകർക്ക് ഇതിലൂടെ 45,000 കോടി രൂപയുടെ അധിക വരുമാനമാണ് ലഭിച്ചത്.” തന്റെ കുടുംബാംഗങ്ങളുടെ ഉടമസ്ഥതയിലുള്ള പഞ്ചസാര മില്ലുകളെ സഹായിക്കാനാണ് എഥനോൾ നയത്തെ പിന്തുണയ്ക്കുന്നതെന്ന ആരോപണങ്ങളും ഗഡ്കരി തള്ളി.
തന്റെ കുടുംബത്തിന് പഞ്ചസാര ഫാക്ടറികൾ ഉണ്ടെന്നത് നേരാണെന്നും എന്നാൽ അവ എഥനോൾ ഉത്പാദനത്തെ മാത്രം ആശ്രയിച്ചല്ല നിലനിൽക്കുന്നതെന്നും വ്യക്തിപരമായ താല്പര്യങ്ങളല്ല സർക്കാർ നയങ്ങളെ സ്വാധീനിക്കുന്നതെന്നും അദ്ദേഹം കൂട്ടിച്ചേർത്തു. ഇറക്കുമതി കുറയ്ക്കാനും കർഷകരെ സഹായിക്കാനും ലക്ഷ്യമിട്ട് സർക്കാർ രാജ്യവ്യാപകമായി പെട്രോളിൽ 20% എഥനോൾ കലർത്തുന്ന പ്രക്രിയ പൂർത്തിയാക്കിയിട്ടുണ്ട്. നിലവിൽ രാജ്യത്തെ പമ്പുകളിൽ ഇതാണ് സ്റ്റാൻഡേർഡ് ഇന്ധനമായി ലഭിക്കുന്നത്.
Story Summary
Union Minister Nitin Gadkari challenged critics to name a single car damaged by E20 ethanol-blended petrol, dismissing performance concerns as part of a “false narrative”. He defended the policy, highlighting that it reduces India’s Rs 22 lakh crore oil import bill and has boosted farmers’ income across states like UP and Bihar.
