ന്യൂഡൽഹി: ദേശീയ പരീക്ഷകളിലെ ക്രമക്കേടുകൾക്കെതിരെയും കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനിന്റെ രാജി ആവശ്യപ്പെട്ടും രാജ്യതലസ്ഥാനത്തെ ജന്തർ മന്തറിൽ വൻ പ്രതിഷേധവുമായി ജെൻ-സി തലമുറയുടെ ഡിജിറ്റൽ രാഷ്ട്രീയ മുന്നേറ്റമായ ‘കോക്രോച്ച് ജനത പാർട്ടി’ (Cockroach Janta Party Jantar Mantar Protest). സോഷ്യൽ മീഡിയയിലെ പരിഹാസരൂപേണയുള്ള മീമുകളിലൂടെ ആരംഭിച്ച് ലക്ഷക്കണക്കിന് യുവാക്കളുടെ പിന്തുണയോടെ ശക്തമായ രാഷ്ട്രീയ പ്രസ്ഥാനമായി മാറിയ സിജെപിയുടെ പ്രതിഷേധത്തിന് ഐക്യദാർഢ്യം പ്രഖ്യാപിച്ച് പ്രമുഖ പരിസ്ഥിതി പ്രവർത്തകൻ സോനം വാങ്ചുക്കും സിപഐ (എംഎൽ) ജനറൽ സെക്രട്ടറി ദീപങ്കർ ഭട്ടാചാര്യയും സമരപ്പന്തലിൽ എത്തിച്ചേർന്നു. അമേരിക്കയിലെ ഉപരിപഠനത്തിന് ശേഷം ശനിയാഴ്ച പുലർച്ചെ ഡൽഹിയിൽ തിരിച്ചെത്തിയ പാർട്ടി സ്ഥാപകൻ അഭിജീത് ദിപ്കെയുടെ നേതൃത്വത്തിലാണ് പ്രതിഷേധം സംഘടിപ്പിച്ചത്. പ്രതിഷേധത്തിനിടെ ക്രമസമാധാന പ്രശ്നങ്ങൾ ഒഴിവാക്കാൻ ഡൽഹി പോലീസ് ആറ് പേരെ മുൻകരുതലായി കസ്റ്റഡിയിലെടുത്തു.
നീറ്റ്-യുജി, സിയുഇടി, സിബിഎസ്ഇ, എസ്എസ്സി ജിഡി തുടങ്ങിയ പ്രധാന ദേശീയ പരീക്ഷകളിലെ ചോദ്യപേപ്പർ ചോർച്ചയും മൂല്യനിർണ്ണയത്തിലെ ക്രമക്കേടുകളും ദശലക്ഷക്കണക്കിന് വിദ്യാർത്ഥികളുടെ ഭാവി തകർത്തുവെന്ന് പ്രതിഷേധക്കാർ ആരോപിച്ചു. കൈകളിൽ ദേശീയ പതാകയും പുസ്തകങ്ങളും റോസാപ്പൂക്കളുമേന്തി സമാധാനപരമായ രീതിയിലാണ് നൂറുകണക്കിന് വിദ്യാർത്ഥികളും യുവ പ്രൊഫഷണലുകളും ജന്തർ മന്തറിൽ ഒത്തുകൂടിയത്. തങ്ങൾ വെറും പ്രാണികളാണെന്ന് ഭരണകൂടം കരുതിയേക്കാമെങ്കിലും തങ്ങൾ ജീവനുള്ളവരാണെന്നും അവകാശങ്ങൾക്കായി പോരാടുമെന്നും സമരക്കാരെ അഭിസംബോധന ചെയ്തുകൊണ്ട് അഭിജീത് ദിപ്കെ വ്യക്തമാക്കി. സോഷ്യൽ മീഡിയയിലെ തങ്ങളുടെ അക്കൗണ്ടുകൾ ഹാക്ക് ചെയ്യാനും പോസ്റ്റുകൾ ഇല്ലാതാക്കാനും സർക്കാരിന് കഴിഞ്ഞേക്കുമെന്നും എന്നാൽ തെരുവിലിറങ്ങിയ ജനങ്ങളുടെ ശബ്ദത്തെ ഇല്ലാതാക്കാൻ കഴിയില്ലെന്നും അദ്ദേഹം കൂട്ടിച്ചേർത്തു. ജനാധിപത്യപരവും മതേതരവുമായ ആശയങ്ങളൂന്നിയ തങ്ങളുടെ യുവാക്കളുടെ കൂട്ടായ്മ തൊഴിലില്ലായ്മയ്ക്കും വിലക്കയറ്റത്തിനുമെതിരെ തുടർന്നും ശക്തമായി പോരാടുമെന്ന് സിജെപി വക്താക്കൾ പ്രഖ്യാപിച്ചു.
Summary: The Gen-Z led satirical political movement, Cockroach Janta Party (CJP), staged a massive protest at Delhi’s Jantar Mantar demanding Education Minister Dharmendra Pradhan’s resignation over recent examination irregularities. Joined by climate activist Sonam Wangchuk and student groups, the peaceful demonstration saw heavy police deployment and the preventive detention of six individuals.
