ന്യൂഡൽഹി: നീറ്റ്-യുജി പരീക്ഷാ ക്രമക്കേടിൻ്റെ പശ്ചാത്തലത്തിൽ കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ്റെ രാജി ആവശ്യപ്പെട്ട് പ്രമുഖ പരിസ്ഥിതി പ്രവർത്തകൻ സോനം വാങ്ചുക് നടത്തുന്ന നിരാഹാര സമരം വെള്ളിയാഴ്ച ഇരുപതാം ദിവസത്തിലേക്ക് കടന്നു. വാങ്ചുകിന്റെ ആരോഗ്യനില അതീവ ഗുരുതരമായ ഘട്ടത്തിലാണെന്നും സമരം തുടർന്നാൽ ആന്തരികാവയവങ്ങളുടെ പ്രവർത്തനത്തെ ബാധിക്കുമെന്നും ഡോക്ടർമാർ മുന്നറിയിപ്പ് നൽകിയിട്ടുണ്ട്.(Sonam Wangchuk Hunger Strike Over NEET Exam Paper Leak Enters Twentieth Day)
ജൂൺ 28-നാണ് അദ്ദേഹം ജന്തർ മന്തറിൽ അനിശ്ചിതകാല നിരാഹാര സമരം ആരംഭിച്ചത്. ‘കോക്രോച്ച് ജനതാ പാർട്ടി’ എന്ന സംഘടനയുടെ നേതൃത്വത്തിൽ വിദ്യാർത്ഥികളുമായി ചേർന്നാണ് പ്രതിഷേധം. കടുത്ത ആരോഗ്യപ്രശ്നങ്ങൾ നേരിടുന്നുണ്ടെങ്കിലും സമരം അവസാനിപ്പിക്കില്ലെന്ന നിലപാടിലാണ് വാങ്ചുക്. സർക്കാർ അനുകൂലമായി പ്രതികരിക്കാതെ സമരം നിർത്തുന്നത് തെറ്റായ സന്ദേശം നൽകുമെന്നും, ജൂലൈ 20-ന് നിശ്ചയിച്ചിരിക്കുന്ന പാർലമെന്റ് മാർച്ചിലേക്ക് കൂടുതൽ ആളുകൾ എത്തണമെന്നും അദ്ദേഹം ആവശ്യപ്പെട്ടു.
സമരം ആരംഭിച്ചതിനു ശേഷം അദ്ദേഹത്തിന് ഒൻപത് കിലോയിലധികം ശരീരഭാരം കുറഞ്ഞതായി മെഡിക്കൽ ബുള്ളറ്റിനിൽ വ്യക്തമാക്കുന്നു. അതേസമയം, വാങ്ചുകിന്റെ ആരോഗ്യനില ദിവസേന നിരീക്ഷിക്കാനും ആവശ്യമായ ചികിത്സകൾ വൈകിക്കാതെ നൽകാനും ഡൽഹി ഹൈക്കോടതി അധികൃതർക്ക് നിർദ്ദേശം നൽകി. മുൻ ഡൽഹി മുഖ്യമന്ത്രി അരവിന്ദ് കെജ്രിവാൾ, സമാജ്വാദി പാർട്ടി എംപി ഡിംപിൾ യാദവ്, കർഷക നേതാവ് രാകേഷ് ടിക്കായത്ത് എന്നിവർ സമരപ്പന്തൽ സന്ദർശിച്ച് പിന്തുണ അറിയിച്ചു.
Story Summary
Educationist Sonam Wangchuk’s hunger strike demanding the resignation of Union Education Minister Dharmendra Pradhan over the NEET-UG paper leak entered its 20th day. Despite strict medical warnings regarding potential organ damage and extreme weight loss, Wangchuk refused to end the protest at Jantar Mantar while opposition leaders extended their strong solidarity.
