ന്യൂ ഡൽഹി: സാങ്കേതിക തടസ്സങ്ങളെ തുടർന്ന് സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ പരീക്ഷാ പുനർമൂല്യനിർണ്ണയത്തിനുള്ള അപേക്ഷകൾ സ്വീകരിക്കുന്ന തീയതി നീട്ടി (CBSE Revaluation Date Postponed June 1). പുതുക്കിയ അറിയിപ്പ് പ്രകാരം ജൂൺ ഒന്ന് മുതൽ വിദ്യാർത്ഥികൾക്ക് പുനർമൂല്യനിർണ്ണയത്തിനായി അപേക്ഷിക്കാവുന്നതാണ്. ഈ മാസം 26 മുതൽ 29 വരെ അപേക്ഷ നൽകാമെന്നായിരുന്നു ബോർഡ് ആദ്യം വ്യക്തമാക്കിയിരുന്നതെങ്കിലും ഔദ്യോഗിക വെബ്സൈറ്റിലെ സാങ്കേതിക പ്രശ്നങ്ങൾ കാരണം തീയതി മാറ്റുകയായിരുന്നു.
പുനർമൂല്യനിർണ്ണയത്തിനുള്ള ഓൺലൈൻ പോർട്ടൽ ജൂൺ ഒന്ന് മുതൽ പൂർണ്ണ സജ്ജമാകുമെന്ന് സിബിഎസ്ഇ അറിയിച്ചു. അതേസമയം, പരീക്ഷാ നടത്തിപ്പിലെയും ഓൺ സ്ക്രീൻ മാർക്കിംഗ് സംവിധാനത്തിലെയും ഗുരുതരമായ വീഴ്ചകളെ തുടർന്ന് കരാർ കമ്പനിയായ ഹൈദരാബാദ് ആസ്ഥാനമായുള്ള ‘കോംപ്റ്റ് എജ്യുടെക്’ എന്ന സ്ഥാപനത്തിന് പിഴ ചുമത്താൻ ബോർഡ് തീരുമാനിച്ചിട്ടുണ്ട്. വ്യക്തതയില്ലാതെ സ്കാൻ ചെയ്ത അയ്യായിരത്തോളം ഉത്തരക്കടലാസുകൾ കണ്ടെത്തുകയും 23 വിദ്യാർത്ഥികൾക്ക് മാറിപ്പോയ ഉത്തരക്കടലാസുകൾ തിരികെ നൽകേണ്ടി വരികയും ചെയ്ത സാഹചര്യത്തിലാണ് കമ്പനിക്കെതിരെ നടപടി.
മുൻപ് തെലങ്കാന സർക്കാർ കരിമ്പട്ടികയിൽ പെടുത്തിയ സ്ഥാപനത്തിന് സിബിഎസ്ഇ കരാർ നൽകിയതിൽ അഴിമതിയുണ്ടെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി ആരോപിച്ചെങ്കിലും കേന്ദ്രമന്ത്രി കിരൺ റിജിജു ഇത് നിഷേധിച്ചു. കരിമ്പട്ടികയിൽ പെട്ട കമ്പനിയാണെങ്കിൽ കോൺഗ്രസ് ഭരിക്കുന്ന സംസ്ഥാനങ്ങൾ എന്തിനാണ് ഇവർക്ക് കരാർ നൽകിയതെന്ന് ബിജെപി മറുചോദ്യം ഉന്നയിച്ചു. പരീക്ഷാഫലത്തിലെ വ്യാപകമായ പിഴവുകൾ കേന്ദ്രമന്ത്രി തന്നെ സമ്മതിച്ച സാഹചര്യത്തിൽ ഗ്രേസ് മാർക്ക് നൽകണമെന്ന് വിദ്യാർത്ഥികൾ ആവശ്യപ്പെടുമ്പോൾ, പരാജയപ്പെട്ട ഒഎസ്എം സംവിധാനത്തെ പുകഴ്ത്തി റീലുകളും വീഡിയോകളും ചെയ്യാൻ സ്കൂളുകൾക്ക് സിബിഎസ്ഇ ടൂൾകിറ്റ് നൽകിയത് വലിയ വിമർശനങ്ങൾക്ക് വഴിവെച്ചിട്ടുണ്ട്.
Summary: The Central Board of Secondary Education (CBSE) has postponed the commencement date for revaluation applications to June 1 due to technical glitches on its official website. Additionally, CBSE has decided to penalize Hyderabad-based Coempt Edutech for massive errors and poor scanning quality in the On-Screen Marking (OSM) system. Amid political controversy and corruption allegations raised by Rahul Gandhi, students are now strongly demanding grace marks to compensate for the evaluation discrepancies.
