കൊൽക്കത്ത: പശ്ചിമ ബംഗാൾ നിയമസഭാ തിരഞ്ഞെടുപ്പിൽ നേരിട്ട കനത്ത തിരിച്ചടിക്ക് പിന്നാലെ തൃണമൂൽ കോൺഗ്രസ് അധ്യക്ഷ മമത ബാനർജിയെ സന്ദർശിച്ച് സമാജ്വാദി പാർട്ടി അധ്യക്ഷൻ അഖിലേഷ് യാദവ് (Mamata Banerjee West Bengal Election Loss). കൊൽക്കത്തയിലെ മമതയുടെ വസതിയിൽ വെച്ചായിരുന്നു നിർണ്ണായക കൂടിക്കാഴ്ച. മമത പരാജയപ്പെട്ടിട്ടില്ലെന്നും പ്രശംസനീയമായ പോരാട്ടമാണ് കാഴ്ചവെച്ചതെന്നും അഖിലേഷ് യാദവ് മാധ്യമങ്ങളോട് പറഞ്ഞു.
തിരഞ്ഞെടുപ്പിന് ശേഷമുള്ള ബംഗാളിലെ ക്രമസമാധാന നിലയും ദേശീയതലത്തിൽ ബിജെപിക്കെതിരെയുള്ള പ്രതിപക്ഷ സഖ്യത്തിന്റെ സാധ്യതകളും കൂടിക്കാഴ്ചയിൽ ചർച്ചയായി. തൃണമൂൽ കോൺഗ്രസ് ജനറൽ സെക്രട്ടറി അഭിഷേക് ബാനർജിയും ചർച്ചയിൽ പങ്കെടുത്തു.
തിരഞ്ഞെടുപ്പിൽ ബിജെപി വ്യാപകമായി ക്രമക്കേട് നടത്തിയെന്നാണ് മമത ബാനർജിയുടെ ആരോപണം. തോൽവി അംഗീകരിക്കാൻ തയ്യാറാകാത്ത മമത, ബംഗാളിൽ രാഷ്ട്രപതി ഭരണം ആവശ്യപ്പെട്ട് സുപ്രീംകോടതിയെ സമീപിക്കാൻ ഒരുങ്ങുകയാണ്.ബിജെപിയുടെ വിജയത്തെ രാഷ്ട്രീയമായി നേരിടാൻ മമതയ്ക്ക് പൂർണ്ണ പിന്തുണ നൽകുമെന്ന് അഖിലേഷ് യാദവ് വ്യക്തമാക്കി. ബിജെപി വിരുദ്ധ വോട്ടുകൾ ഏകോപിപ്പിക്കുന്നതിൽ മമതയുടെ പങ്ക് നിർണ്ണായകമാണെന്നും അദ്ദേഹം കൂട്ടിച്ചേർത്തു.
ബംഗാളിലെ തോൽവിക്ക് പിന്നാലെ ദേശീയ രാഷ്ട്രീയത്തിൽ തന്റെ സ്വാധീനം ഉറപ്പിക്കാനും ഇതര സംസ്ഥാനങ്ങളിലെ പ്രാദേശിക പാർട്ടികളുടെ പിന്തുണ തേടാനുമാണ് മമതയുടെ നീക്കം.തിരഞ്ഞെടുപ്പ് ഫലം പുറത്തുവന്നതിന് പിന്നാലെ ബംഗാളിലെ വിവിധയിടങ്ങളിൽ സംഘർഷം നിലനിൽക്കുന്നുണ്ട്. ഈ സാഹചര്യത്തിൽ മമത നടത്തുന്ന നിയമപോരാട്ടവും പ്രതിപക്ഷ നേതാക്കളുടെ സന്ദർശനവും രാഷ്ട്രീയ ഇന്ത്യ ഉറ്റുനോക്കുകയാണ്.
Story Summary: Samajwadi Party leader Akhilesh Yadav met Mamata Banerjee in Kolkata following the TMC’s defeat in the West Bengal Assembly elections. Akhilesh praised Mamata’s fight and discussed opposition unity against the BJP. Meanwhile, Mamata Banerjee has refused to accept the election results, alleging manipulation by the BJP, and is planning to move the Supreme Court seeking President’s rule in the state.
