ന്യൂഡൽഹി: ശബരിമല യുവതി പ്രവേശനവുമായി ബന്ധപ്പെട്ട നിയമപരമായ ചോദ്യങ്ങൾ പരിഗണിക്കുന്ന ഒൻപതംഗ സുപ്രീം കോടതി ബെഞ്ചിന് മുൻപാകെ സംസ്ഥാനത്തെ ഭരണമാറ്റം ചൂണ്ടിക്കാട്ടി സർക്കാർ അഭിഭാഷകൻ (Sabarimala Case Supreme Court May 2026). സംസ്ഥാനം ഒരു രാഷ്ട്രീയ മാറ്റത്തിലൂടെ കടന്നുപോകുന്നതിനാൽ ശബരിമലയുമായി ബന്ധപ്പെട്ട തർക്കവിഷയങ്ങളിൽ ഇപ്പോൾ നേരിട്ട് മറുപടി നൽകുന്നതിന് പരിമിതികളുണ്ടെന്ന് സർക്കാരിന് വേണ്ടി ഹാജരായ മുതിർന്ന അഭിഭാഷകൻ ജയ്ദീപ് ഗുപ്ത കോടതിയെ അറിയിച്ചു.
സംസ്ഥാനത്ത് പുതിയ സർക്കാർ അധികാരമേറ്റെടുക്കുന്ന സാഹചര്യത്തിൽ, മുൻപത്തെ നിലപാടുകളിൽ മാറ്റമുണ്ടോ എന്ന സൂചനയാണ് അഭിഭാഷകന്റെ വാക്കുകളിൽ നിഴലിച്ചത്. യുവതി പ്രവേശനത്തെ അനുകൂലിക്കാനായിരുന്നല്ലോ മുൻപ് ലഭിച്ചിരുന്ന നിർദ്ദേശമെന്ന് കോടതി ചോദിച്ചപ്പോൾ, നിലവിലെ സാഹചര്യത്തിൽ തനിക്ക് കൂടുതൽ സ്വാതന്ത്ര്യത്തോടെ കോടതിയെ സഹായിക്കാൻ കഴിയുമെന്നും ഒരു നിശ്ചിത രാഷ്ട്രീയ നിലപാടിൽ ഉറച്ചുനിൽക്കാൻ ഇപ്പോൾ ബാധ്യതയില്ലെന്നും അദ്ദേഹം കൂട്ടിച്ചേർത്തു.
വാദത്തിനിടെ ബെഞ്ചിലെ ഏക വനിതാ ജഡ്ജിയായ ജസ്റ്റിസ് ബി.വി. നാഗരത്ന നടത്തിയ നിരീക്ഷണങ്ങൾ ഏറെ ശ്രദ്ധേയമായി.
പത്തിനും അമ്പതിനും ഇടയിൽ പ്രായമുള്ള, യഥാർത്ഥ അയ്യപ്പ വിശ്വാസികളായ സ്ത്രീകൾ ശബരിമലയിൽ പ്രവേശിക്കില്ലെന്ന് ജസ്റ്റിസ് നാഗരത്ന നിരീക്ഷിച്ചു. നൂറ്റാണ്ടുകൾ പഴക്കമുള്ള ആചാരങ്ങളെ തുറന്നുവെച്ച് പരിശോധിക്കേണ്ടതില്ലെന്നും, ഒരു വിശ്വാസി തന്റെ ദൈവത്തെയോ ദൈവത്തിന്റെ ഇഷ്ടത്തെയോ ചോദ്യം ചെയ്യുമോ എന്നും അവർ വാക്കാൽ ചോദിച്ചു.
അനിവാര്യമായ മതാചാരങ്ങൾ ഏതൊക്കെയാണെന്ന് കോടതികളല്ല തീരുമാനിക്കേണ്ടതെന്നും അത് മതപണ്ഡിതർക്ക് വിടണമെന്നുമുള്ള അഭിഭാഷകന്റെ വാദവും കോടതിയുടെ പരിഗണനയ്ക്ക് വന്നു.
യഥാർത്ഥ വിശ്വാസികളല്ലാത്തവർ നൽകുന്ന പൊതുതാൽപര്യ ഹർജികളെ (PIL) കോടതി രൂക്ഷമായി വിമർശിച്ചു. വിശ്വാസമില്ലാത്തവർക്ക് എങ്ങനെയാണ് ഇത്തരമൊരു ഹർജി നൽകാൻ കഴിയുകയെന്നും, ഈ ഹർജി തുടക്കത്തിലേ ചവറ്റുകുട്ടയിൽ എറിയേണ്ടതായിരുന്നുവെന്നും ചീഫ് ജസ്റ്റിസ് സൂര്യകാന്ത് നിരീക്ഷിച്ചു. പൊതുതാൽപര്യ ഹർജികൾ ഇപ്പോൾ വ്യക്തിപരമായ താൽപര്യങ്ങൾക്കും പണത്തിനും രാഷ്ട്രീയത്തിനുമായി ദുരുപയോഗം ചെയ്യപ്പെടുകയാണെന്ന് ജസ്റ്റിസ് നാഗരത്നയും കുറ്റപ്പെടുത്തി.
സംസ്ഥാനത്തെ തിരഞ്ഞെടുപ്പ് ഫലത്തിന് പിന്നാലെ പുതിയ സർക്കാർ വരാനിരിക്കുന്ന പശ്ചാത്തലത്തിൽ, ശബരിമല വിഷയത്തിൽ കേരളത്തിന്റെ വരാനിരിക്കുന്ന സത്യവാങ്മൂലം കേസിൽ നിർണ്ണായകമാകും.
Story Summary: During the Supreme Court hearing on Sabarimala, Senior Advocate Jaideep Gupta informed the 9-judge bench that Kerala is undergoing a transition in government, which limits immediate responses on specific stances. Justice BV Nagarathna observed that true women devotees of the 10-50 age group would not enter the shrine and questioned the validity of PILs filed by those without faith.
