തിരുവനന്തപുരം: കേരളത്തിൽ സൂര്യതാപത്തിൽ നിന്നുള്ള അൾട്രാവയലറ്റ് (UV) രശ്മികളുടെ തീവ്രത വർധിക്കുന്നു. മൂന്നാർ ഉൾപ്പെടെ സംസ്ഥാനത്തെ നാല് പ്രദേശങ്ങളിൽ നിലവിൽ അതീവ ജാഗ്രതാനിർദ്ദേശമായ ഓറഞ്ച് അലർട്ട് പ്രഖ്യാപിച്ചു. ഇന്നലെ സംസ്ഥാനത്ത് ഏറ്റവും ഉയർന്ന യുവി സൂചിക രേഖപ്പെടുത്തിയത് മൂന്നാറിലാണ്.(UV radiation is extremely intense in Kerala, Orange alert in four places including Munnar)
മൂന്നാറിൽ ഇന്നലെ ഉച്ചയ്ക്ക് യുവി സൂചിക 9 രേഖപ്പെടുത്തി. മുൻദിവസം ഇത് 8 ആയിരുന്നു. സൂചിക 11-ലേക്ക് എത്തിയാൽ മൂന്നാറിൽ റെഡ് അലർട്ട് പ്രഖ്യാപിക്കുകയും പകൽ പുറത്തിറങ്ങുന്നതിന് കർശന നിയന്ത്രണം ഏർപ്പെടുത്തുകയും ചെയ്യും. കോന്നി, ചെങ്ങന്നൂർ, ചങ്ങനാശ്ശേരി പ്രദേശങ്ങളിൽ യുവി സൂചിക 8-ൽ തുടരുകയാണ്. കണ്ണൂർ ധർമ്മടത്ത് സൂചിക 8-ൽ നിന്നും 5-ലേക്ക് കുറഞ്ഞത് ആശ്വാസകരമാണ്.
ഒരു നിശ്ചിത സ്ഥലത്തും സമയത്തും ഭൂമിയിൽ പതിക്കുന്ന സൂര്യതാപത്തിലെ അൾട്രാവയലറ്റ് വികിരണത്തിന്റെ അളവാണ് യുവി സൂചിക എന്നറിയപ്പെടുന്നത്. ഇതിന്റെ അളവ് കൂടുന്നത് മനുഷ്യശരീരത്തിന് ഹാനികരമാണ്. ഉയർന്ന അളവിൽ അൾട്രാവയലറ്റ് രശ്മികൾ ഏൽക്കുന്നത് കാഴ്ചശക്തിയെ പ്രതികൂലമായി ബാധിക്കുമെന്നും ചർമ്മരോഗങ്ങൾ ഉൾപ്പെടെയുള്ള ആരോഗ്യപ്രശ്നങ്ങൾക്ക് കാരണമാകുമെന്നും വിദഗ്ധർ മുന്നറിയിപ്പ് നൽകുന്നു.
