റിപ്പോർട്ട്: അൻവർ ഷരിഫ്
കൊണ്ടോട്ടി: അതിതീവ്ര മഴയെ തുടർന്ന് ചാലിയാർ നദിയിലെ ജലനിരപ്പ് ഉയരുകയും മണ്ഡലത്തിന്റെ വിവിധ ഭാഗങ്ങളിൽ വെള്ളക്കെട്ടും മണ്ണിടിച്ചിൽ ഭീഷണിയും രൂക്ഷമാകുകയും ചെയ്ത സാഹചര്യത്തിൽ ദുരിതബാധിത പ്രദേശങ്ങൾ ടിപി അഷ്റഫലി എം.എൽ.എ സന്ദർശിച്ചു. വിവിധ മേഖലകളിലെ സ്ഥിതിഗതികൾ നേരിൽ വിലയിരുത്തിയ അദ്ദേഹം പ്രദേശവാസികളുമായി ആശയവിനിമയം നടത്തി. (TP Ashrafali MLA rain affected area visit)
കഴിഞ്ഞ രണ്ട് ദിവസമായി തുടരുന്ന ശക്തമായ മഴയിൽ കൊണ്ടോട്ടി മണ്ഡലത്തിലെ നിരവധി പ്രദേശങ്ങൾ വെള്ളത്തിനടിയിലായി. മൂളപ്പുറം, തിരുത്തിയാട്, പുഞ്ചപ്പാടം, കുനിത്തലക്കടവ്, എളങ്കാവ് ചെങ്ങലാരി, നെടിയിരുപ്പ് ഉന്നതി തുടങ്ങിയ പ്രദേശങ്ങളിലെ വെള്ളക്കയറ്റവും മണ്ണിടിച്ചിൽ ഭീഷണിയും എം.എൽ.എ നേരിൽ വിലയിരുത്തി. നെടിയിരുപ്പ് ജി.ഡബ്ല്യു.യു.പി. സ്കൂളിൽ പ്രവർത്തിക്കുന്ന ദുരിതാശ്വാസ ക്യാമ്പും എം.എൽ.എ സന്ദർശിച്ചു. ക്യാമ്പിലുള്ളവരുടെ സാഹചര്യം അന്വേഷിച്ച അദ്ദേഹം ആവശ്യമായ സഹായങ്ങളും സൗകര്യങ്ങളും ഉറപ്പാക്കാൻ ബന്ധപ്പെട്ട ഉദ്യോഗസ്ഥർക്ക് നിർദേശം നൽകി.
അപകടസാധ്യത നിലനിൽക്കുന്ന മേഖലകളിൽ തുടർച്ചയായ നിരീക്ഷണം നടത്തണമെന്നും ആവശ്യമായ ഇടങ്ങളിൽ ജനങ്ങളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിക്കണമെന്നും എം.എൽ.എ നിർദേശിച്ചു. രക്ഷാപ്രവർത്തനങ്ങളും ദുരിതാശ്വാസ നടപടികളും കൂടുതൽ ശക്തിപ്പെടുത്താൻ ബന്ധപ്പെട്ട വകുപ്പുകൾ ഏകോപിതമായി പ്രവർത്തിക്കണമെന്നും അദ്ദേഹം ആവശ്യപ്പെട്ടു. വിവിധ പ്രദേശങ്ങളിലെ സന്ദർശനത്തിൽ എം.കെ. മൂസ്സ ഫൗലദ്, ടി.സി. മുർഷിദ്, ബഷീർ, മുനീർ വിളയിൽ, സൈതലവി എളങ്കാവ്, ഗഫൂർ മടത്തിൽ, പി.എ. സാജിദ്, സി. കുഞ്ഞോയി, എം.കെ. നൗഷാദ്, നവാസ് പുത്തലത്ത്, സലീം കെ.സി. എന്നിവർ എം.എൽ.എയെ അനുഗമിച്ചു.
Summary: Kondotty MLA T.P. Ashrafali visited several rain-affected areas in the constituency after heavy rainfall caused flooding and increased the threat of landslides. He inspected relief camps, interacted with affected residents and directed officials to strengthen rescue, relief and monitoring measures.
