ചിലി: ലോകത്തിലെ ഏറ്റവും വലിയ ഡിജിറ്റൽ ക്യാമറ ഉപയോഗിച്ച് പ്രപഞ്ചത്തിന്റെ അപൂർവവും വിസ്മയിപ്പിക്കുന്നതുമായ ദൃശ്യരേഖ പുറത്തുവിട്ട് ചിലിയിലെ വെറാ സി. റൂബിൻ ഒബ്സർവേറ്ററി (World Largest Digital Camera Space Photo). ഒരൊറ്റ ആഴക്കാഴ്ചയിൽ അഞ്ച് ലക്ഷത്തിലധികം ഗാലക്സികളെയും 50,000-ത്തിലധികം നക്ഷത്രങ്ങളെയും പകർത്തിയ ചിത്രം ശാസ്ത്രലോകത്തിന്റെ ശ്രദ്ധ നേടിയിരിക്കുകയാണ്.
റൂബിൻ ഒബ്സർവേറ്ററിയിലെ 3.2 ഗിഗാപിക്സൽ (320 കോടി പിക്സൽ) എൽഎസ്എസ്ടി ക്യാമറ ഉപയോഗിച്ചാണ് ചിത്രം തയ്യാറാക്കിയത്. ഒറ്റത്തവണ പകർത്തിയ ചിത്രമല്ല ഇത്. നൂറുകണക്കിന് വ്യത്യസ്ത ചിത്രങ്ങൾ ഒന്നിനുമുകളിൽ മറ്റൊന്നായി സംയോജിപ്പിച്ചാണ് ഈ വിശാലമായ പ്രപഞ്ചദൃശ്യം സൃഷ്ടിച്ചത്. ഇതിലൂടെ സാധാരണ ചിത്രങ്ങളിൽ വ്യക്തമായി കാണാൻ കഴിയാത്ത മങ്ങിയതും വളരെ അകലെയുള്ളതുമായ ഗാലക്സികളുടെ പ്രകാശവും രേഖപ്പെടുത്താനായി.
ചിത്രത്തിൽ സർപ്പിളാകൃതിയിലുള്ള ഗാലക്സികൾ, ദീർഘവൃത്താകൃതിയിലുള്ള ഗാലക്സികൾ, പരസ്പരം കൂട്ടിയിടിക്കുന്ന ഗാലക്സികൾ, പ്രപഞ്ചത്തിന്റെ വിദൂരഭാഗങ്ങളിൽ നിന്നുള്ള മങ്ങിയ ചുവന്ന ഗാലക്സികൾ എന്നിവ ഉൾപ്പെട്ടിട്ടുണ്ട്. നമ്മുടെ ക്ഷീരപഥത്തിലെ ഏതാനും പ്രകാശമേറിയ നക്ഷത്രങ്ങൾ മാത്രമാണ് ചിത്രത്തിന്റെ മുൻഭാഗത്ത് കാണപ്പെടുന്നത്. പ്രപഞ്ചത്തിന്റെ വിശാലതയും ഗാലക്സികളുടെ അസംഖ്യ സാന്നിധ്യവും ഒരൊറ്റ ഫ്രെയിമിൽ വ്യക്തമാക്കുന്നതാണ് ഈ ദൃശ്യത്തിന്റെ പ്രത്യേകത.
COSMOS ഫീൽഡ് എന്നറിയപ്പെടുന്ന ആകാശമേഖലയാണ് ചിത്രത്തിൽ ഉൾപ്പെടുത്തിയിരിക്കുന്നത്. 2003 മുതൽ ഹബിൾ ബഹിരാകാശ ദൂരദർശിനി ഉൾപ്പെടെ ലോകത്തിലെ പ്രമുഖ ദൂരദർശിനികൾ ഈ മേഖലയെ നിരീക്ഷിച്ചുവരികയാണ്. ക്ഷീരപഥത്തിലെ നക്ഷത്രസാന്ദ്രതയും പൊടിപടലങ്ങളും താരതമ്യേന കുറവുള്ള മേഖലയായതിനാൽ വിദൂര ഗാലക്സികളെ വ്യക്തമായി നിരീക്ഷിക്കാൻ ഇത് സഹായിക്കുന്നു. ചില ഗാലക്സികളിൽ നിന്നുള്ള പ്രകാശം ഭൂമിയിലെത്താൻ കോടിക്കണക്കിന് വർഷങ്ങൾ എടുത്തതായാണ് ശാസ്ത്രജ്ഞർ പറയുന്നത്. അതിനാൽ ബഹിരാകാശത്തിന്റെ ആഴങ്ങളിലേക്ക് നോക്കുന്നത് പ്രപഞ്ചത്തിന്റെ ഭൂതകാലത്തിലേക്കുള്ള ഒരു ജനാല തുറക്കുന്നതിന് തുല്യമാണ്.
റൂബിൻ ഒബ്സർവേറ്ററിയുടെ പത്ത് വർഷത്തെ ലെഗസി സർവേ ഓഫ് സ്പേസ് ആൻഡ് ടൈം (LSST) പദ്ധതിയുടെ ഭാഗമായാണ് തുടർച്ചയായ നിരീക്ഷണങ്ങൾ നടക്കുന്നത്. ഒരേ ആകാശമേഖലയെ വീണ്ടും വീണ്ടും പകർത്തുന്നതിലൂടെ കാലക്രമത്തിൽ സംഭവിക്കുന്ന മാറ്റങ്ങൾ രേഖപ്പെടുത്താനും സൂപ്പർനോവ പോലുള്ള ഹ്രസ്വകാല പ്രപഞ്ച പ്രതിഭാസങ്ങളെ കണ്ടെത്താനും ഗവേഷകർക്ക് സാധിക്കും.
2025 ഏപ്രിൽ മുതൽ 2026 ജനുവരി വരെ ശേഖരിച്ച ശാസ്ത്രീയ വിവരങ്ങൾ ഉൾപ്പെടുത്തി തയ്യാറാക്കിയ ആദ്യകാല ഡാറ്റാ പ്രിവ്യൂവിന്റെ ഭാഗമായാണ് ചിത്രം പുറത്തുവിട്ടത്. ഏകദേശം 3,000 ചതുരശ്ര ഡിഗ്രി വിസ്തൃതിയുള്ള ആകാശമേഖലയാണ് ഈ നിരീക്ഷണത്തിലൂടെ രേഖപ്പെടുത്തിയത്. വരും വർഷങ്ങളിൽ കൂടുതൽ ആഴത്തിലുള്ള നിരീക്ഷണങ്ങളിലൂടെ ഇതിലും മങ്ങിയ ഗാലക്സികളെയും പ്രപഞ്ചത്തിലെ അപൂർവ സംഭവങ്ങളെയും കണ്ടെത്താൻ കഴിയുമെന്ന പ്രതീക്ഷയിലാണ് ശാസ്ത്രലോകം.
Summary: The Vera C. Rubin Observatory has released a remarkable deep-space image containing more than 500,000 galaxies and over 50,000 stars. Created by stacking hundreds of images captured with the world’s largest digital camera, the view offers scientists a powerful new window into the universe and its evolution.
