ദുരൂഹ സാഹചര്യത്തിൽ കാണാതായ ആളൂർ പോലീസ് സ്റ്റേഷനിലെ സീനിയർ സിപിഒയെ കണ്ടെത്തി
മെയ് എട്ട് മുതൽ ദുരൂഹ സാഹചര്യത്തിൽ കാണാതായ ആളൂർ പോലീസ് സ്റ്റേഷനിലെ സീനിയർ സിപിഒയെ കണ്ടെത്തി. വിജയരാഘവപുരം സ്വദേശി പി എ സലേഷിനെ (34) ബുധനാഴ്ച ഉച്ചയോടെ തമിഴ്‌നാട്ടിലെ തഞ്ചാവൂരിൽ നിന്നാണ് കണ്ടെത്തിയത്. ചാലക്കുടി ഡിവൈഎസ്പിയുടെ നേതൃത്വത്തിലുള്ള സംഘം തഞ്ചാവൂർ പുതിയ ബസ് സ്റ്റാൻഡിന് സമീപത്തെ ലോഡ്ജിൽ നിന്നാണ് ഇയാളെ കണ്ടെത്തിയത്. സലേഷിനെ വിശദമായി ചോദ്യം ചെയ്താലേ ഹാജരാകാത്തതിൻ്റെ കാരണം വ്യക്തമാകൂ.
കഴിഞ്ഞ ദിവസം എടിഎം കാർഡ് ഉപയോഗിച്ചപ്പോൾ സലേഷ് തഞ്ചാവൂർ മേഖലയിലുണ്ടെന്ന് പൊലീസ് കണ്ടെത്തി. ഇതേ തുടർന്ന് ഇയാളെ കണ്ടെത്താൻ ചാലക്കുടി ഡിവൈഎസ്പിയുടെ നേതൃത്വത്തിലുള്ള സംഘം തഞ്ചാവൂരിലെത്തി വിശദമായ പരിശോധന നടത്തി. പാലത്തിങ്കൽ അയ്യപ്പൻ്റെ മകനാണ് സലേഷ്. മെയ് എട്ടിന് ഡ്യൂട്ടിക്കായി പൊലീസ് സ്റ്റേഷനിൽ പോയ സലേഷ് തിരിച്ചെത്താത്തതിനെ തുടർന്ന് ബന്ധുക്കൾ പരാതി നൽകി. ചാലക്കുടി പോലീസ് കേസെടുത്ത് അന്വേഷണം ആരംഭിച്ചെങ്കിലും നാളിതുവരെ ഇരുട്ടിൽ തപ്പുകയായിരുന്നു.
ചാലക്കുടി കെഎസ്ആർടിസി ബസ് സ്റ്റാൻഡിനു സമീപം കണ്ടെത്തിയ സലേഷിൻ്റെ ബൈക്ക് പൊലീസ് സ്റ്റേഷനിലെത്തിച്ചു. സലേഷിൻ്റെ മൊബൈൽ ഫോണിൽ ബന്ധപ്പെടാൻ ശ്രമിച്ചെങ്കിലും സ്വിച്ച് ഓഫ് ആയിരുന്നു. ഇടയ്ക്ക് ഫോൺ ഓൺ ചെയ്തിട്ടും ലൊക്കേഷൻ കണ്ടെത്താനായില്ല. നേരത്തെ സലേഷും മാള സ്റ്റേഷനിൽ ജോലി ചെയ്തിരുന്നു. അവധിയെടുക്കാതെ പോയത് ഉന്നത പൊലീസ് ഉദ്യോഗസ്ഥരുടെ മാനസിക സമ്മർദത്തെ തുടർന്നാണെന്ന ആരോപണവും അന്വേഷിക്കണമെന്ന ആവശ്യവും ഉയർന്നു.