തിരുവനന്തപുരം: തിരുവനന്തപുരം പാലോട് പ്രാഥമിക ആരോഗ്യ കേന്ദ്രത്തിൽ മൊബൈൽ ഫോൺ വെളിച്ചത്തിൽ രോഗിക്ക് ചികിത്സ നൽകിയെന്ന പരാതിയിൽ അടിയന്തര അന്വേഷണത്തിന് ഉത്തരവിട്ട് ആരോഗ്യ വകുപ്പ് മന്ത്രി കെ. മുരളീധരൻ (Palode phc mobile flashlight treatment). സംഭവത്തിൽ ഡിഎച്ച്എസിനോട് (DHS) അന്വേഷിച്ച് റിപ്പോർട്ട് സമർപ്പിക്കാൻ ആവശ്യപ്പെട്ടിട്ടുണ്ടെന്നും, ആശുപത്രിയുടെ ഭാഗത്ത് വീഴ്ച സംഭവിച്ചിട്ടുണ്ടെങ്കിൽ കർശന നടപടിയെടുക്കുമെന്നും മന്ത്രി വാർത്താസമ്മേളനത്തിൽ പറഞ്ഞു.
വൈദ്യുതി തടസ്സമുണ്ടായാലും ആശുപത്രികളിലെ അത്യാഹിത ചികിത്സയോ മറ്റ് പരിചരണങ്ങളോ മുടങ്ങാൻ പാടില്ല. പവർകട്ട് ഉണ്ടാകുന്ന സാഹചര്യങ്ങളെ നേരിടാൻ ആവശ്യമായ ജനറേറ്റർ സംവിധാനം കൃത്യമായി ഒരുക്കേണ്ട ഉത്തരവാദിത്തം ആശുപത്രി അധികൃതർക്കുണ്ടെന്നും അദ്ദേഹം കൂട്ടിച്ചേർത്തു.
ഇന്ന് രാവിലെയാണ് പാലോട് പ്രാഥമിക ആരോഗ്യ കേന്ദ്രത്തിൽ ടോർച്ച് വെട്ടത്തിൽ രോഗിയുടെ മുറിവ് ഡ്രസ്സ് ചെയ്തുവെന്ന വാർത്ത പുറത്തുവന്നത്. അപകടത്തിൽപ്പെട്ട രോഗിയുടെ മുറിവ് തുന്നിക്കെട്ടുന്നതിനും ഡ്രസ്സ് ചെയ്യുന്നതിനുമിടയിലാണ് പെട്ടെന്ന് കറന്റ് പോയത്. ഈ സമയം ആശുപത്രിയിലെ ജനറേറ്ററും പ്രവർത്തനരഹിതമായതോടെയാണ് ജീവനക്കാർ മൊബൈൽ ഫോണിന്റെ ടോർച്ച് വെളിച്ചം ഉപയോഗിച്ച് പരിചരണം തുടരേണ്ടി വന്നത്.
അതേസമയം, സംഭവത്തിൽ വിശദീകരണവുമായി ആശുപത്രി അധികൃതർ രംഗത്തെത്തി. വൈദ്യുതി തടസ്സപ്പെട്ടത് കേവലം രണ്ട് മിനിറ്റ് മാത്രമാണെന്നും, പെട്ടെന്നുണ്ടായ സാങ്കേതിക തടസ്സം മൂലം ജനറേറ്റർ പ്രവർത്തിക്കാൻ നിമിഷങ്ങളുടെ താമസം നേരിട്ടതിനാലാണ് ടോർച്ച് ഉപയോഗിക്കേണ്ടി വന്നതെന്നും കറന്റ് പുനഃസ്ഥാപിച്ച ഉടൻ തന്നെ സാധാരണ രീതിയിൽ ചികിത്സ പൂർത്തിയാക്കിയെന്നും അധികൃതർ വ്യക്തമാക്കി.
Story Summary: Health Minister K. Muraleedharan ordered a DHS probe into the incident where doctors at Palode Primary Health Centre treated a patient using mobile flashlight due to power failure and a faulty generator. The hospital clarified that the power outage lasted only two minutes.
