പാലക്കാട്: കുടുംബവഴക്കിനെ തുടർന്നുണ്ടായ തർക്കത്തിനൊടുവിൽ ഭാര്യയെ വെട്ടിക്കൊന്ന ശേഷം ഭർത്താവ് ജീവനൊടുക്കി (Palakkad Aryambavu murder suicide). പാലക്കാട് ശ്രീകൃഷ്ണപുരത്തിനടുത്ത് ആര്യമ്പാവ് കുണ്ടൂർക്കുന്ന് റോഡിൽ കൊമ്പത്ത് പള്ളത്ത് കോളനിയിലാണ് നാടിനെ നടുക്കിയ ദാരുണ സംഭവം അരങ്ങേറിയത്. പള്ളത്ത് കോളനി സ്വദേശി ദീപ (42), ഭർത്താവ് സുകുമാരൻ (50) എന്നിവരാണ് മരണപ്പെട്ടത്. ഇന്ന് (ശനിയാഴ്ച) രാത്രി എട്ടരയോടെയായിരുന്നു കൊലപാതകവും പിന്നാലെയുള്ള ആത്മഹത്യയും നടന്നത്.
ദീർഘനാളായി ഇരുവരും തമ്മിൽ കടുത്ത കുടുംബപ്രശ്നങ്ങൾ നിലനിന്നിരുന്നതായി പോലീസ് വ്യക്തമാക്കുന്നു. ശനിയാഴ്ച രാത്രിയോടെ വീണ്ടും തർക്കം രൂക്ഷമാവുകയും, പ്രകോപിതനായ സുകുമാരൻ വീട്ടിലുണ്ടായിരുന്ന വെട്ടുകത്തിയെടുത്ത് ദീപയെ ക്രൂരമായി വെട്ടിപ്പരിക്കേൽപ്പിക്കുകയുമായിരുന്നു. ദീപയുടെ നിലവിളി കേട്ട് ഓടിയെത്തിയ നാട്ടുകാർ ചോര വാർന്ന നിലയിൽ കണ്ടെത്തിയ ഇവരെ ഉടൻ തന്നെ മണ്ണാർക്കാട് വട്ടമ്പലത്തിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യയ്ക്ക് വെട്ടേറ്റതിന് പിന്നാലെ സുകുമാരൻ വീട്ടിനുള്ളിൽ തന്നെ തൂങ്ങിമരിക്കുകയായിരുന്നുവെന്നാണ് പോലീസിന്റെ പ്രാഥമിക നിഗമനം.
സംഭവം നടക്കുമ്പോൾ ദമ്പതികളുടെ 19 വയസ്സുള്ള മകൾ വീട്ടിൽ ഉണ്ടായിരുന്നു. മകളുടെ മുന്നിൽ വെച്ചാണ് ഈ ക്രൂരത നടന്നതെന്നാണ് വിവരം. അപ്രതീക്ഷിതമായുണ്ടായ അക്രമത്തിന്റെ ഞെട്ടലിലാണ് മകളും നാട്ടുകാരും. വിവരമറിഞ്ഞ് ശ്രീകൃഷ്ണപുരം പോലീസും വിരലടയാള വിദഗ്ധരും സ്ഥലത്തെത്തി ഇൻക്വസ്റ്റ് നടപടികൾ ആരംഭിച്ചിട്ടുണ്ട്. കുടുംബവഴക്കിന് പുറമെ മറ്റ് കാരണങ്ങൾ എന്തെങ്കിലുമുണ്ടോ എന്ന് പോലീസ് വിശദമായി അന്വേഷിച്ചുവരികയാണ്. മൃതദേഹങ്ങൾ പോസ്റ്റ്മോർട്ടം നടപടികൾക്കായി ജില്ലാ ആശുപത്രി മോർച്ചറിയിലേക്ക് മാറ്റും.
Story Summary: In a tragic incident at Aryambavu, Palakkad, a 50-year-old man named Sukumaran hacked his wife Deepa (42) to death following a domestic dispute and subsequently died by suicide. The incident took place around 8:30 PM in front of their 19-year-old daughter.
