കൊല്ലം: കനത്ത മഴയ്ക്കിടെ മൺറോതുരുത്തിൽ വിനോദസഞ്ചാരികളുമായി സഞ്ചരിച്ച ശിക്കാര വള്ളം ചരിഞ്ഞ് വെള്ളം കയറി മുങ്ങി (Munroe Island Shikara Boat Capsized). കല്ലടയാറ്റിലെ പുത്തനാറിൽ നിന്ന് അഷ്ടമുടിക്കായലിലേക്ക് പ്രവേശിക്കുന്നതിനിടെ കക്കാട്ട് കടവിന് സമീപം ഞായറാഴ്ച വൈകീട്ട് നാലരയോടെയായിരുന്നു നാടിനെ നടുക്കിയ അപകടം ഉണ്ടായത്. കാരൂത്രക്കടവിൽ നിന്നും പത്തോളം വിനോദസഞ്ചാരികളുമായി എസ് വളവിലേക്ക് തുഴഞ്ഞുപോയ വള്ളമാണ് അപകടത്തിൽപ്പെട്ടത്. ശക്തമായ മഴ പെയ്യുന്നതിനിടെ വള്ളം അമിതമായി ഉലയുന്നത് കണ്ട് കരയിലുണ്ടായിരുന്ന നാട്ടുകാർ വള്ളം ഉടനടി കടവിലേക്ക് അടുപ്പിക്കാൻ ആവശ്യപ്പെട്ടെങ്കിലും ജീവനക്കാർ ഇത് അവഗണിച്ച് മുന്നോട്ടുപോവുകയായിരുന്നു. തുടർന്ന് നിയന്ത്രണം നഷ്ടമായി വള്ളം ഒരു വശത്തേക്ക് ചരിഞ്ഞ് ഉള്ളിലേക്ക് വെള്ളം കയറിയതോടെ ജീവനക്കാരും വിനോദസഞ്ചാരികളും സഹായത്തിനായി നിലവിളിക്കുകയായിരുന്നു.
അപകടം ശ്രദ്ധയിൽപ്പെട്ട ഉടൻ തന്നെ കായലിലേക്ക് നീന്തിയും ചെറുവള്ളങ്ങളിൽ തുഴഞ്ഞുമെത്തിയ നാട്ടുകാർ ഒട്ടും സമയം കളയാതെ രക്ഷാപ്രവർത്തനം ആരംഭിച്ചു. വള്ളത്തിലുണ്ടായിരുന്ന മുഴുവൻ വിനോദസഞ്ചാരികളെയും സുരക്ഷിതമായി കരയിലെത്തിക്കാൻ കഴിഞ്ഞതിനാൽ വലിയൊരു ദുരന്തമാണ് ഒഴിവായത്. അപകടം നടന്നത് കടവിന് തൊട്ടടുത്തായതും കായൽത്തീരത്ത് നാട്ടുകാരുടെ സാന്നിധ്യമുണ്ടായിരുന്നതും വിനോദസഞ്ചാരികൾക്ക് തുണയായി. വിവരമറിഞ്ഞ് കിഴക്കേ കല്ലട പൊലീസും കുണ്ടറയിൽ നിന്നുള്ള അഗ്നിശമന സേനയും സംഭവസ്ഥലത്ത് എത്തിച്ചേർന്നിരുന്നു. കനത്ത മഴയെ തുടർന്ന് കായലിലും നദികളിലും ജലനിരപ്പ് ഉയർന്നിരിക്കുന്ന സാഹചര്യത്തിൽ ഹൗസ് ബോട്ടുകളും ശിക്കാര വള്ളങ്ങളും കൂടുതൽ ജാഗ്രത പുലർത്തണമെന്ന് അധികൃതർ കർശന നിർദ്ദേശം നൽകിയിട്ടുണ്ട്.
Summary: A shikara boat carrying around ten tourists capsized and sank in the Kallada River near Munroe Island amidst heavy rainfall. Local residents immediately rushed to the spot in small boats and rescued all the passengers as the vessel began to tilt and flood near Kakkat Kadavu. The Kizhakke Kallada Police and Kundara Fire Force personnel arrived at the scene shortly after the incident to ensure the safety of the tourists.
