മലപ്പുറം പുലാമന്തോളിൽ മോഷണത്തിൽ അസാധാരണ സ്വഭാവം കാണിക്കുന്ന ഒരു കള്ളൻ പോലീസിന് തലവേദനയാകുന്നു. താൻ മോഷ്ടിച്ച വാഹനത്തേക്കാൾ മികച്ച മറ്റൊന്ന് കണ്ടാൽ പഴയത് വഴിയിൽ ഉപേക്ഷിച്ചു പുതിയത് കവരുന്ന വിചിത്ര ശീലമാണ് ഇയാൾക്കുള്ളത്. ഷൊർണൂർ കുളപ്പുള്ളിയിൽ നിന്ന് മോഷ്ടിച്ച സ്കൂട്ടിയുമായി എത്തിയ ഇയാൾ, പുലാമന്തോൾ ചക്കമ്പലത്തിന് സമീപം നിർത്തിയിട്ട പൾസർ ബൈക്ക് കണ്ട് സ്കൂട്ടി അവിടെ ഉപേക്ഷിച്ച് ബൈക്കുമായി കടന്നുകളയുകയായിരുന്നു. (Malappuram Unique theft)
വാഹനം ഉടമസ്ഥൻ തിരച്ചിൽ നടത്തുന്നതിനിടയിലാണ് ഉപേക്ഷിക്കപ്പെട്ട നിലയിൽ പഴയ സ്കൂട്ടി കണ്ടെത്തിയത്. അന്വേഷണത്തിൽ ഈ സ്കൂട്ടി നേരത്തെ കുളപ്പുള്ളിയിൽ നിന്ന് മോഷ്ടിക്കപ്പെട്ടതാണെന്ന് തെളിഞ്ഞു. സിസിടിവി ദൃശ്യങ്ങൾ പരിശോധിച്ചതിൽ നിന്ന് മോഷ്ടാവ് ബൈക്കുമായി കൊളത്തൂർ പോലീസ് സ്റ്റേഷൻ ജംഗ്ഷൻ വരെ എത്തിയതായി വ്യക്തമായിട്ടുണ്ടെങ്കിലും, അതിനുശേഷം എങ്ങോട്ടാണ് പോയതെന്ന് വ്യക്തമല്ല. പെരിന്തൽമണ്ണ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. ഈ മേഖലയിൽ സമാനരീതിയിലുള്ള വാഹനമോഷണങ്ങൾ വർദ്ധിച്ചുവരുന്ന സാഹചര്യത്തിൽ പോലീസ് ജാഗ്രത ശക്തമാക്കിയിട്ടുണ്ട്.
Summary: A thief with a strange habit has become a challenge for the police in Malappuram, Pulamanthole. The suspect, who steals vehicles, has been abandoning older stolen vehicles in exchange for newer, more attractive ones found on the way. Recently, he abandoned a stolen scooter in Pulamanthole to escape with a parked Bajaj Pulsar bike. Police have registered a case and are reviewing CCTV footage, which tracked the suspect up to the Kolathur police station junction.
