പട്ന: ബിഹാർ നിയമസഭാ ഉപതെരഞ്ഞെടുപ്പിൽ ബിജെപിയുടെ ശക്തികേന്ദ്രമായ ബങ്കിപ്പൂർ മണ്ഡലത്തിൽ ജൻ സുരാജ് പാർട്ടി സ്ഥാപകനായ പ്രശാന്ത് കിഷോർ ചരിത്രവിജയം സ്വന്തമാക്കി (Prashant Kishor Bankipur bypoll). ബിജെപി സ്ഥാനാർഥിയും യുവ നേതാവുമായ നീരജ് കുമാറിനെ 19,324 വോട്ടുകൾക്ക് പരാജയപ്പെടുത്തിയാണ് പ്രശാന്ത് കിഷോർ മണ്ഡലം പിടിച്ചെടുത്തത്.
2025ലെ നിയമസഭാ തിരഞ്ഞെടുപ്പിൽ നിലവിലെ ബിജെപി ദേശീയ അധ്യക്ഷൻ നിതിൻ നബിൻ 51,936 വോട്ടിന്റെ ഭൂരിപക്ഷത്തിൽ വിജയിച്ച മണ്ഡലമാണിത്. രാജ്യസഭാംഗമായി തെരഞ്ഞെടുക്കപ്പെട്ടതിനെ തുടർന്ന് നിതിൻ നബിൻ രാജിവെച്ച ഒഴിവിലേക്കാണ് ഉപതെരഞ്ഞെടുപ്പ് നടന്നത്. വർഷങ്ങളായി ബിജെപിയുടെ ഉറച്ച കോട്ടയായി കണക്കാക്കപ്പെട്ടിരുന്ന ബങ്കിപ്പൂരിലെ ഈ പരാജയം പാർട്ടിക്ക് വലിയ രാഷ്ട്രീയ തിരിച്ചടിയായാണ് വിലയിരുത്തപ്പെടുന്നത്.
വോട്ടെണ്ണൽ പൂർത്തിയായപ്പോൾ പ്രശാന്ത് കിഷോർ 64,151 വോട്ടുകൾ നേടിയപ്പോൾ ബിജെപിയുടെ നീരജ് കുമാർ 44,827 വോട്ടുകളാണ് നേടിയത്. ആർജെഡി സ്ഥാനാർഥി രേഖ കുമാരി 14,273 വോട്ടുകളുമായി മൂന്നാം സ്ഥാനത്തെത്തി.
ജൻ സുരാജ് പാർട്ടി രൂപീകരിച്ചതിന് ശേഷം ആദ്യമായാണ് പ്രശാന്ത് കിഷോർ നേരിട്ട് തെരഞ്ഞെടുപ്പ് രംഗത്തിറങ്ങുന്നത്. 2025ലെ ബിഹാർ നിയമസഭാ തിരഞ്ഞെടുപ്പിൽ പാർട്ടി 243ൽ 238 മണ്ഡലങ്ങളിൽ മത്സരിച്ചെങ്കിലും ഒരു സീറ്റിലും വിജയിക്കാനായിരുന്നില്ല. മൂന്ന് ശതമാനത്തിൽ അല്പം കൂടുതൽ വോട്ടുകൾ മാത്രമാണ് അന്ന് പാർട്ടിക്ക് ലഭിച്ചത്. അത്തരമൊരു സാഹചര്യത്തിൽ ബിജെപിയുടെ ശക്തികേന്ദ്രത്തിൽ നേടിയ ഈ വിജയം ജൻ സുരാജിന്റെ രാഷ്ട്രീയ ഭാവിക്ക് നിർണായക നേട്ടമായാണ് വിലയിരുത്തപ്പെടുന്നത്.
ദാതിയയിൽ കോൺഗ്രസിന് വിജയം
മധ്യപ്രദേശിലെ ദാതിയ നിയമസഭാ ഉപതെരഞ്ഞെടുപ്പിൽ കോൺഗ്രസ് സ്ഥാനാർഥി ഘനശ്യാം സിംഗ് 6,016 വോട്ടുകളുടെ ഭൂരിപക്ഷത്തിൽ വിജയിച്ചു. ബിജെപിയുടെ അശുതോഷ് തിവാരിയാണ് രണ്ടാം സ്ഥാനത്തെത്തിയത്. ഈ ഫലവും ബിജെപിക്ക് മറ്റൊരു തിരിച്ചടിയായി മാറി.
മഞ്ചൽപുരിയിൽ ബിജെപി മുന്നേറ്റം തുടർന്നു
അതേസമയം, ഗുജറാത്തിലെ മഞ്ചൽപൂർ ഉപതെരഞ്ഞെടുപ്പിൽ ബിജെപി വിജയം നിലനിർത്തി. ബിജെപി സ്ഥാനാർഥി സതീഷ് പട്ടേൽ കോൺഗ്രസ് സ്ഥാനാർഥി ഭിഖാഭായ് റാബറിയെ 30,000ത്തിലധികം വോട്ടുകൾക്ക് പരാജയപ്പെടുത്തി മണ്ഡലം നിലനിർത്തി.
Story Summary:
Prashant Kishor secured a landmark victory for the Jan Suraj Party by defeating the BJP in its traditional stronghold of Bankipur, Bihar. The Congress won the Datia bypoll in Madhya Pradesh, while the BJP retained Manjalpur in Gujarat.
