തിരുവനന്തപുരം: പത്തനംതിട്ട ജില്ലയിൽ അടുത്ത മൂന്ന് മണിക്കൂറിൽ ഇടിമിന്നലോട് കൂടിയ അതിശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ് (Pathanamthitta heavy rain warning). മണിക്കൂറിൽ 50 കിലോമീറ്റർ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിനും സാധ്യതയുണ്ടെന്നാണ് ഏറ്റവും പുതിയ റഡാർ ചിത്രങ്ങളുടെ അടിസ്ഥാനത്തിൽ പുറപ്പെടുവിച്ച മുന്നറിയിപ്പിൽ വ്യക്തമാക്കുന്നത്.
കഴിഞ്ഞ മൂന്ന് ദിവസത്തിനിടെ പത്തനംതിട്ടയിൽ സാധാരണ ലഭിക്കേണ്ടതിനേക്കാൾ അഞ്ചിരട്ടിയിലേറെ, അതായത് 533 ശതമാനം അധിക മഴ പെയ്തിറങ്ങിയതായി കാലാവസ്ഥാ വകുപ്പ് ചൂണ്ടിക്കാട്ടുന്നു. വരും മണിക്കൂറുകളിലും ശക്തമായ മഴ തുടരുമെന്നാണ് പ്രവചനം.
അടിയന്തര ജാഗ്രതാ നിർദ്ദേശങ്ങൾ:
ഗതാഗത തടസ്സം: പ്രധാന റോഡുകളിൽ വെള്ളക്കെട്ടിനും കാഴ്ച മങ്ങുന്നതിനും സാധ്യതയുള്ളതിനാൽ ഗതാഗതക്കുരുക്ക് രൂപപ്പെടാം. അത്യാവശ്യമല്ലാത്ത യാത്രകൾ പൂർണ്ണമായും ഒഴിവാക്കുക.
വെള്ളപ്പൊക്ക ഭീഷണി: താഴ്ന്ന പ്രദേശങ്ങളിലും നദീതീരങ്ങളിലും പെട്ടെന്ന് വെള്ളം ഉയരാൻ സാധ്യതയുണ്ട്.
മരങ്ങളും വൈദ്യുതിയും: ശക്തമായ കാറ്റിൽ മരങ്ങൾ കടപുഴകി വീഴാനും വൈദ്യുതി ബന്ധം തടസ്സപ്പെടാനും വീടുകൾക്ക് കേടുപാടുകൾ സംഭവിക്കാനും സാധ്യതയുണ്ട്.
മണ്ണിടിച്ചിൽ ഭീഷണി: മലയോര മേഖലകളിൽ ഉരുൾപൊട്ടലിനും മണ്ണിടിച്ചിലിനും സാധ്യതയുള്ളതിനാൽ ജനങ്ങൾ സുരക്ഷിത സ്ഥാനങ്ങളിലേക്ക് മാറണം.
മറ്റ് മുൻകരുതലുകൾ: കന്നുകാലികളെ സുരക്ഷിത മേഖലകളിലേക്ക് മാറ്റിപ്പാർപ്പിക്കാനും അധികൃതരുടെ നിർദ്ദേശങ്ങൾ കൃത്യമായി പാലിക്കാനും നിർദ്ദേശമുണ്ട്.
Story Summary:
The IMD has issued a severe weather alert for Pathanamthitta for the next three hours, forecasting heavy rain, lightning, and winds up to 50 km/h. Pathanamthitta recorded 533% excess rainfall over the last three days, prompting authorities to issue warnings against landslides, waterlogging, and uprooted trees.
